Read lango Jeremia 8 Bible Online

Jeremia 8 - lango bible

Jeremia 8

¹“I kare-naca, co go kom obakki me Juda, cogo kom rwode, cogo kom olamdog, cogo kom odwarpiny kede cogo kom jo luŋ ame onwoŋo bedo i Jerucalem obino kwanyo oko i lyel ote kela kannaler;

²ote canogi i wan cen, dwe kede lwak acer luŋ ame tye i po lo, ame rik onwoŋo gin omaro dok daŋ obedo woro i karegi, ame rik gin obedo lubo, obedo yenyo ote bedo woro. Mom dok obino coko co go komgi-nono, dok mom obino yiko. Gin doŋ bino bedo kittono acalo cet dyaŋ ame oradde i lobo,

³Jo luŋ me rok man arac-ci ame obwottege, ame tye i lobo apapat ame yam aryemogi aterogi iye, gin luŋ obino mito ni kono oto gigi oko akaka bedo kwo, man kop a Rwot me mony.

⁴“Yin Jeremia ibino kobo baŋgi ni Rwot okobo ni, Ka dano orette piny, mom dok ya malobo? Ka ce dano ogak oko, mom dok lokere dwogo cen bo?

⁵Kara doŋ ŋo omio jona tye ka wot awota teŋe, kun omedde ameda i dok cen? Olido goba ikiŋ ame mom omito weko, okwero gigi dwogo oko cen.

⁶Abedo tero yita me winyo kopgi, cite mom okobo kop ame tye atira; mom tye ŋattoro ame ŋut i gin arac ame etimo kun penyo ni, ‘Ŋo kara ame atimo?’ Ŋat acel acel tye ka lubo yo ame cunye mito, calo aguragura ame tye ka riŋo adwir i lweny.

⁷Kadi etolo ame bedo malo i polo daŋ ŋeo kare mere me dwogo, awele, aculegwec kede ogoro, gin daŋ gwoko kare me binogi; cite jona mom ŋeo kadi acel cik luŋ ame yam Rwot omio.

⁸“Kara doŋ itwero kobo niŋo ni, ‘Wan giwa oryek, dok cik a Rwot daŋ tye baŋwa?’ Cite, nen ba, opwony cik a mom genne otyeko loko cik a Rwot luŋ odoko goba i cocgi.

⁹Obino miyo lewic maka jo aryek, cunygi bino poto ote makogi oko; nen ba, gin otyeko kwero kop a Rwot, kara doŋ ryeko aŋonnono ame gin dok tye kede?

¹⁰Pi mannono ba, abino miyo mongi baŋ jo ocele, kede pottigi, baŋ jo oloogi i lweny, pien cakere i kom jo atino tuno kede i kom jo adoŋo, ŋat acel acel i akinagi owor awora inwoŋo lim i yore a mom atira; dok cakere i kom odwarpiny tuno kede i kom olamdog, ŋat acel acel mom genne kadi acel i tic ame en tio.

¹¹Otye ka cego bur i kom jona ame mom ocano aber, kun okobo ni, ‘Kuc, kuc’, aco kono kuccoro mom.

¹²Lewic mom makogi ka otimo tim me kwer, Lewic gire mom makogi kadi acel, waŋgi nwaŋ ka otimo tim me lewic. Pi mannono, gin daŋ obino poto calo jo ame doŋ otyeko poto, kare ame abino keto can i komgi.” Man kop ame Rwot okobo.

¹³Rwot okobo ni, “I kare ame onwoŋo myero acokgi iye, ocalo doŋ olok ame nyige moro mom iye, onyo oduro ame nyige mom, ame pote-gu oony oko luŋ, gin ame yam amiogi luŋ doŋ mom i ciŋgi.”

¹⁴Ŋo omio wan otye ka bedo mot? Ocokere wunu karacel me owot wunu i boma mogo ame ocecelo i cel atek, me wot oto wunu doŋ kuno. Pien Rwot Obaŋawa doŋ otyeko keto can i komwa kun mito ni wan oto oko, omiowa pii ame kwir tye iye ni wan omati, pien wan otimo bal i kom Rwot.

¹⁵Obedo yenyo kuc, cite mom tye ginnoro aber ame nen, oyenyo kare ame myero ocan iye, cite oluŋyo cop ka i gin a kela lworo keken.

¹⁶“Weo me akemo okworwa winnyere i Dan twal, ka aguraguragi okok, lobo luŋ yeŋere, Gin obino me bino balo lobo odoco naka ginnoro luŋ iye, boma karacel kede jo luŋ ame bedo iye.

¹⁷Nen ba, atye ka cwayo twole i akinawu, ororo ame kwirrere mom romo geŋere kadi acel, twolle-nogo bino kayowu.” Man kop ame Rwot okobo.

¹⁸Can ame atye kede doŋ mom romo can kadi acel, atye i two me cwercuny adwoŋ meicel i cunya.

¹⁹Koŋ doŋ iwiny koko a jona, ame winnyere doŋ i kabedo luŋ ni, “Rwot doŋ mom i Cion bo? Abaka me Cion doŋ mom iye bo?” Rwot ame obedo abakagi te gamo ni, “Piŋo kara gin obedo roka me akemo maka i cal joggigi, kede cal jogi a rok ocele?”

²⁰Jo doŋ tye ka kobo ni, “Nen kare me kac okato oko, oro daŋ doŋ ogik oko, cite mom ru olarowa.”

²¹Cunya tye ka rem calo bur tye iye, pien bur doŋ tye i kom jona, kumo pi can doŋ ocira oko, cunya doŋ tye ka poto atata,

²²Yat me caŋo jo doŋ mom i Gilead be? Dakatalloro daŋ doŋ mom kuno Piŋo jona mom tye ka can i two ame gin tye kede?