Read lango Jeremia 9 Bible Online

Jeremia 9 - lango bible

Jeremia 9

¹Kono onwoŋo wia obedo waŋ akon ame pii mollo iye, do ber, kun waŋa obedo akon ame pig wan cwer iye, kono akok dyeceŋ kede dyewor pi jona ame doŋ oneko oko.

²Kono onwoŋo tye kannoro i tim otwo ame en abedo iye, do ber, acalo gony ame jo awoto iyo twero bedo iye, kono aweko jona ate wot oko i tene baŋgi. Pien gin luŋ doŋ odoko ocod cot atata onywako wot kede wegi erupe.

³Ololoko doggi calo akud atero, goba en a doŋ onya i lobo akaka kop ateni; pien oya i bal okobere akoba i bal, kun daŋ mom doŋ onea, man kop a Rwot okobo.

⁴Ŋat acel acel myero gwokere i kom awottere, dok myet o kur kob ni ageno ominnere, pien ŋat acel acel tye ka i cuny me mayo awottere calo Yakobo, dok dano mito ka rimo piny i nyiŋ awottere.

⁵Ŋat acel acel bwolo ŋat ame bedo i ŋete, mom tye ŋattoro ame kobo kop ateni, opwonyo doŋ lebgi ikobo ka goba; otimo bal ame mom doŋ oromo ŋut kadi oyelle niŋo.

⁶Omedde doŋ ameda iwuno joo kop go ba keken adoŋ odure caa ducu, okwero doŋ neya oko, man kop a Rwot okobo.

⁷Mannono omio Rwot me mony okobo ni, “Nen ba, abino liyogi calo nyonyo ate dok temogi, kara ŋo ocele ame dok aromo timo pi jona?

⁸Lebgi calo atero ame kwir a neko jo tye i lebe, kobo goba keken, dog ŋat acel acel nwoŋo alebo kop am it amita baŋ awottere cite i cunye nwoŋo oyikere me yenyo yo me neko oko,

⁹An mom abino keto can i komgi pi gin ame gin otimo-nono dok mom atwero culo kworra i kom rok acalo man?” Man kop ame Rwot okobo.

¹⁰Jeremia okobo ni, “Myero doŋ acak kok pi kiddi dok akok daŋ pi elet ame tye tim, pien doŋ odoŋ nono, mom doŋ tye ŋattoro ame bea iye kuno, koko a dok daŋ mom doŋ winyere kuno; leyi kede winy doŋ oriŋo oko iye, owoto oko teŋe.”

¹¹Rwot te kobo ni, “Abino miyo Jerucalem doko wi obur, kan ame ekwe bedo iye; abino miyo boma luŋ i Juda doŋ nono, aboŋo jo moro ame bedo i yigi.”

¹²Ŋa aryek meicel ame romo niaŋ kop man? Rwot okobo kop magi baŋ ŋa ce me en tuci? Piŋo kara lobo tye ame oballe oko dok odoŋ nono calo tim ame ŋattoro doŋ mom bea iye?

¹³Rwot te kobo ni, “Pien gin okwero winyo cikka ame amiogi, dok daŋ okwero winyo koppa dok mom olubo cikka i i gin ame gin tio,

¹⁴cite obedo gigi limo gin ame cunygi mito apala apa la, kun daŋ otye ka woro Baal kite ame kwarigi opwonyogi kede.

¹⁵Mannono omio Rwot me mony ame obedo Obaŋa a jo Icrael okobo ni ‘Nen ba, abino pito jo man kede gin akec, dok abino miyogi omato pii ame kwir tye iye.

¹⁶Abino keketogi i akina arok ame gin mom oŋeo dok kwarigi daŋ yam mom oŋeo; abino cwayo pala me lweny lubo yorgi, tuno ka atyekogi oko ducu.’ ”

¹⁷Rwot me mony okobo ni, “Koŋ itam wunu ite lwoŋo wunu mon ame ŋeo wer koko, me gin bin, lwoŋ wunu mon ame odiro bin.

¹⁸Gin myero ru bino oyotoyot, me obin owo i koko i wiwa, me pig waŋwa ony piny, kun opoko waŋwa opoŋ i pii.

¹⁹Koŋ iwiny koko tye ka winyere Cion, ni, ‘Doŋ otum oko doi! Twon lewic adwoŋ doŋ omakowa, pien wan oweko lobowa oko, dok kan ame wan obedo iye doŋ orereto oko piny.’

²⁰Wun mon, winy wunu kop a Rwot, yab wunu yitwu me iwiny wunu kop ame aya i doge; pwony wunu anyirawu kede koko, ŋat acel acel myero pwony wadgi i wer lyel.

²¹Pien to doŋ tye obino oko i diricawa luŋ, odonyo doŋ naka i udiwa adoŋo, kun tye ka neko itino oko i dye yo, naka awobe ame tye i dye boma.

²²Rwot okobo ni, ‘Kom jo oto bino rette piny calo cet dyaŋ ame oradde i poto, calo kal ame okac oweko i poto, ame ŋattoro mom dok romo cokogi.’ ”

²³Rwot okobo ni, “Dano aryek myero kur wakere pi ryeko ame en tye kede, Dano atek i lweny daŋ myero kur wakere pi teko mere-nono. Lo ame alonyo daŋ myero kur wakere pi lonyo mere.

²⁴Cite ŋat ame wakere myero wakere pira, pien enian dok daŋ enea, kun eneo ni an a Rwot ame tye ka nyuto mar a mom lokere i lobo, ŋolo kop atira kede kite atira; pien jami magi en ame yomoro cunya.

²⁵“Nen ba, kare tye abino ame abino keto can i kom jo ame kadi olirogi ocalo jo a mom oliro,

²⁶Abino keto can i kom jo Miciri, jo Juda, jo Edom, jo Amon, jo Moab, karacel kede jo luŋ ame bedo i tim otwo ame mworo yer wigi oko doŋ acegocego, Pien rok magi luŋ mom olirre, dok jo me ot Icrael luŋ daŋ mom olirre cunygi.”