Read lango Wer Koko 1 Bible Online

Wer Koko 1 - lango bible

Wer Koko 1

¹Jerucalem dok odoŋ nono nadi! Aco yam yo iye mom kwanne ba! Koŋ inen aman doŋ calo dako ame cware oto, kadi yam nyiŋe rwo meicel i akina orok, aco yam twon boma moro ame calo agoŋ i akina boma ocele luŋ, aman kom doŋ olokere odok opii.

²Kok doŋ anaka dyewor-gu, pig waŋe bedo mol amola i leme; mom tye ŋattoro odoŋ kadi acel i akina jo a yam mare ame romo kweyo cunye, owote mere daŋ en a doŋ oketo erupe i kome, gin luŋ doŋ olokere odoko okworrere.

³Jo Juda doŋ otero oko wot neno can i lobo ocele kede tiyo tic apek okato kare; aman doŋ gin bedo i akina orok ata, mom doŋ otye kede kannoro a myero owe iye, okworgi doŋ oridogi tuŋŋi kede tuŋŋi, mom doŋ otye kede yo moro me put.

⁴Jo luŋ ame woto Cion tye ka kumo, pien mom doŋ tye ŋattoro ame bino pi kwero kare me ecuban a Rwot iye, mom doŋ tye ŋattoro ame woto i doggola ot Obaŋa olamdog iye cur doŋ ociro oko, anyira ame yam ower iye tye doŋ aneno can, aco en Cion ikome can doŋ oride atek meicel.

⁵Loc daŋ tye i ciŋ okworrere, omone mere doŋ tye gigi aber pien Rwot oketo can i kom Cion pi balere a mom kwanne, itino mere atino daŋ doŋ otero-gu oko, me bedo opii okworgi ame oterogi.

⁶Kwogo a boma me Cion luŋ doŋ mom tye kadi acel, rwode mere luŋ doŋ calo atil ame ariŋo odwar aryemogi, kun mom onwoŋo atelloro, aco kono doŋ ogoro meicel.

⁷I kare me can kede cwercuny, Jerucalem doŋ ocako poyo jami mere luŋ me wel, ame rik etye kede i kare okato, I kare ame jo mere opoto i ciŋ okwor, kun mom tye ŋattoro ame konye i can ame opoto i kome, okworrere otiŋo waŋgi onene ote ŋalle aŋala.

⁸Jerucalem otimo twon bal adwoŋ meicel, omio ojebere oko, mom daŋ cil kadi acel. Jo luŋ a yam wore doŋ cae acaa, pien oneno kome doŋ tye nono; nen en ikome daŋ doŋ tye acur acura kun wiro waŋe neno teŋe.

⁹Gin ame en ojebere kede tye daŋ i lak boŋo mere, en yam mom otamo ni kwo mere bino gik i can kit man, mannono omio can opoto i kome lik meicel, ŋattoro ame kweo cunye-gu pe, “Ama Rwot, bol waŋi inen can ame orida wok-ki ba, okworra gire doŋ oloa oko.”

¹⁰Okwor doŋ oryeo ciŋgi oko, i kom jami mere abeco mege; en gire oneno rok apapat kun donyo i kabedo acil, aco gin jo ame yam Rwot ogeŋo ni kur dony i akina lwakkere.

¹¹Jo mere luŋ doŋ tye acur acura, kun oyenyo cam me acama, ocato jamigi abeco oko pi cam, atot ya onwoŋ dok teko. “Bol waŋi inen ba, Ama Rwot, pien doŋ ocaa meicel.”

¹²“Wun luŋ ame ibeo ikato wunu-ni, koŋ inena wunu ba! Tye cwercunnyoro ame rom i cwercuny ame atye kede-ni, ame Rwot ogoa kede i ikare ame akemo mere olyeto agwa meicel-li?

¹³“En ocwao mac i malo i polo naka piny iyi cogona twal, ociko bwo piny me mako tyena, te reta piny ataro, oweka ata, kun awile oko dok rem daŋ ocira oko dyeceŋ luŋ.

¹⁴“Balla luŋ onwoŋo doŋ otweo oko i kom kol, ame ocokogi, te tweyogi luŋ karacel i ciŋe, eka te rwakogi i ŋuta, mannono te miyo tekona tum oko, Rwot omia i ciŋ jo ame mom aromo cuŋ i nyimgi.

¹⁵“Rwot ocao jona atek i lweny acaa, kun an daŋ atye i akinagi, ocwano lwak me bino cokere lweny i koma, me oŋiny awobena oko, Rwot ojejebo nya jo Juda calo ŋat ame nyono olok me biyo pige.

¹⁶“Mannono en omio atye ka koko ame pig waŋa tye aony aonya, pien ŋat a kono kwe cunya mom tye kadi acel, ŋat ame kono koŋ dok mi cunya dok atek. Itinona doŋ onyobere oko, pien okworwa doŋ onuogi oko.

¹⁷“Cion oryeo ciŋe, cite ŋattoro ame kweo cunye mom tye, Rwot yam olwoŋo okwor i kabedo luŋ me bino i kom Yakobo Jerucalem doŋ odoko boma ojebere oko i akinagi.

¹⁸“Gin ame Rwot tye ka tiyo tye kakare, pien an onwoŋo ajem akwero winyo koppere. Doŋ pi mannono ba, wun rok luŋ myero iwiny wunu, nen wunu cwercuny ame atye kede; pien anyirana kede awobena, gin luŋ doŋ otero oko iyi opii.

¹⁹“Alwoŋo jo ame mara, cite gin mom oye konya, olamdogga kede odoŋena oto luŋ i boma kun onwoŋo otye oyenyo cam me medo tekogi.

²⁰“Nen ba, Ama Rwot, pien can odia meicel, cunya doŋ ojebere arac meicel, etaona doŋ agoye ni tuktuk, pien abedo jem kare luŋ, Pala lweny tye alwero jo alwera dye yo, to tye daŋ naka iyi ot.

²¹“Tim ber, iwiny ba curra, mom gire tye ŋattoro ame romo kweyo cunya. Okworra luŋ doŋ otyeko winyo pi can opoto i koma, cunygi yom meicel pien itima kittono, Mi doŋ nino ame rik irabo pire-ni bin oko me gin daŋ obed calo an.

²²“Mi bal luŋ ame gin otimo bin oko i nyimi; timgi kite ame tiima kede pi balla luŋ. Abedo doŋ cucura tyen apol meicel, cunya doŋ oto oko inon.”