Read lango Wer Koko 2 Bible Online

Wer Koko 2 - lango bible

Wer Koko 2

¹Rwot doŋ omio piny ocido oko icuc i Cion, pi akemo mere adwoŋ. Kwogo Icrael ame yam otuno naka i polo, en obolo oko piny. I kare ame akemo mere olyeto mom dok opoyo ni Cion yam obedo ka teno tyene.

²Rwot ojwero udi ajo a Yakobo luŋ, aboŋo kica moro kadi acel. Otuturo kabedo a jo Juda luŋ ame ocecelo atek i twon akemo meicel, owaogi oretogi piny i twon lewic adwoŋ meicel, karacel olocgi kede rwodegi.

³Odwoko teko a jo Icrael luŋ piny, i twon akemo agwa meicel okwero-gu konyogi oko, i kare ame okworgi doŋ tye i nyimgi, obedo waŋ i Yakobo calo mac ame alyel, kun waŋo jami luŋ i ŋete.

⁴Olunyo telo-gu atero mere atek i ciŋe tuŋ cem, otikowa kede calo okworrere. Oneko jo luŋ a yam miowa owakere i yomcuny; i kema me Cion luŋ, owuko akemo mere agwa iye calo mac.

⁵Rwot doŋ olokere i komwa calo akwor, ojwero jo Icrael oko, otyeko-gu udigi adoŋodoŋo oko luŋ, apama celgi a yam ocecelo atek doŋ odoko wi obur, onyao kumo kede koko odoko adwoŋ meicel iyi akina jo Juda.

⁶Oreto gony oko piny calo gonyo ame oreto i poto. Kabedo a yam okwero iye ecuban adoŋo luŋ, omio odoko wi obur, Rwot doŋ ogiko kwero ecuban adoŋo kede cen cabit oko i Cion, akemo mere agwa wokkono omio cunye ocao abaka kede olamdog oko.

⁷Rwot okwero gire keno lammere oko, okuno daŋ kebedo mere acil oko, ojalo udi mere adoŋodoŋo i ciŋ okworrere. Woo doŋ owinyere malo amala i ot a Rwot bala i kare me kwero ecuban adoŋo,

⁸Rwot onwoŋo doŋ omoko tammere oko, me mumuko apama cel me Cion odok wi obur; en onwoŋo doŋ oryeo tol opimo oko, mom odolo ciŋe kadi acel naka otyeko; omio gedo mogo Ocuŋ iguŋ malo kede apama cel, obuto piny i wi obur karacel.

⁹Dogcel luŋ doŋ odonyo oko piny i lobo, obabalo lodi me dogcel, otuturogi oko; abaka mere kede rwode mere tye doŋ i akina orok, cik Obaŋa nyiŋe doŋ mom winyere, odwarpiny mom doŋ neno anyuttoro oya i baŋ Rwot.

¹⁰Aco odoŋe a jo Juda, bedo doŋ piny ikuduru aboŋo ŋamo doggi, wigi doŋ apua keken, boŋo cola mom rwenyo i komgi, Anyira me Jerucalem, kulo doŋ wigi neno piny keken.

¹¹Waŋa doŋ ojwet oko pi bedo weyo pig waŋa, cunya doŋ ojebere arac meicel akemo doŋ omio ataona bedo goye agoa, pien otye ka jwero jona oko, pien itino atino kede en i kor tye owille atata, i dye yo luŋ i boma.

¹²Otye ka kok baŋ totogi kun okobo ni, “Cem kede koŋo olok kara tye kwene?” Kun owille i dye yo luŋ i boma, calo jo ame owaŋo, eka kwogi te tum okoi kor totogi.

¹³Kara ŋit atwero kobbi ŋo ba, yin Jerucalem? Kara atwero pori kede gin aŋo ba? Gin aŋo a myero akob ni irom kede ame romo kweyo cunyi. Ama wun jo me Jerucalem? Can ineno wunu doŋ dwoŋ calo nam, ŋa kara ame romo yiko?

¹⁴Anyuttogo ame odwarpinywu yam obedo neno pirwu, obedo ka anyut me goba keken, mom otwero tuco balwu kadi acel, atot ya gumwu dwogi, kop ame gin bedo rabbiwu obedo goba ame rwenyowu arwenya.

¹⁵Jo luŋ ame beo i dye yo bapo ciŋgi i wii; ojwiye kun oyeŋo wigi ocao Jerucalem; kun okobo ni, “Man mom boma ame rik okobo ni ber wok-ki, ame yomoro cuny jo me lobo luŋ?”

¹⁶Okworri luŋ ŋamo doggi alac i komi; ojwiye okao lakgi atek meicel, ote redo ni, “Ojwere doŋ oko! Man en kare ame wan yam obedo paro!”

¹⁷Rwot doŋ otimo gin ame rik eyiko, otyeko doŋ cobo gin emoko; kite ame yam oyiko kede con, ojwerowu kom aboŋo kica; omio okworwu olelo meicel i komwu, omio teko okworwu omedde atek ateka.

¹⁸Kok ba i dwon aloŋo baŋ Rwot! Yin boma me Cion! Wek pig waŋi mol ba piny calo pii i kulo, kun mol dyeceŋ kede dyewor; ame mom iwe kadi acel, dok pig waŋi-gu bedo cwer acwera!

¹⁹Ya malo ibed mwoco koko dyewor, i cuny dyewor ame nino doŋ mit wok-ki. Ony kop i cunyi luŋ calo pii i nyim Rwot. Tan ciŋi ibak dogi bane, pi kwo itinowu, ame kec omio tye awille awila, i akara yo ducu i dye boma,

²⁰Tiŋ waŋi inen koŋ ba, Ama Rwot! Ŋa ame yam koŋ itimo kit man? Mon myero cam itinogi bo, itino ame myero gin gwok i twon mar adwoŋ? Myero nek olamdog kede odwarpiny i kabedo acil bo, Ama Rwot?

²¹Kom itino atino kede me a jo adoŋo, tye oba bala iyi apua dye yo ata; anyirana kede awobena oneko gire oko i pala lweny, inekogi-gu i kare ame akemo ocira oko, inekogi aboŋo kica moro kadi acel.

²²Ilwoŋo okworra i koma, bala obino kwero ecuban me nino adwoŋ, ogura dyere, omio lworo ociri oko omio i nino ame akemo omako Rwot, ŋattoro mom obwot akadi doŋ akwo; itino ame yam atino, ame apito, gin luŋ okworra oneko oko.