Read lango Wer Koko 3 Bible Online

Wer Koko 3 - lango bible

Wer Koko 3

¹An dano ame doŋ abeo i can, ame Obaŋa goo i dano ka akemo omako.

²En oryema te tera naka kan acol icuc, aboŋo lero moro kadi acel.

³Ateteni, en ogoa meicel, obedo dok i koma i lut naka ceŋ iyul.

⁴Obabalo riŋo koma kede del koma oko, te daŋ tuturo cogona oko.

⁵Ogura te wumere oko i koma, kun cunye kec bala mwonya oko alutu.

⁶En omia abedo kan acol, acalo jo a rik oto con.

⁷Ogero apama cel ogura dyere, me kur alwi oko, kun otwea-gu oko twoni jegele mogo apek.

⁸Kadi bed awot dwona ni konya, cite kokona mom romo winyere oko,

⁹En gire ocego yo oko i kidi ame opao, omio doŋ awire awira calo twol ame otoŋo yibe.

¹⁰En doŋ kura akura calo ajaraŋuu, calo eŋatu ame opono oko.

¹¹Okwanya oko i yona te wot kikilo an atitino, te doŋ weka ata ame konya moro pe.

¹²Otelo akud atero mere atek, te pima kede atero mere.

¹³Ocela atero mere naka i etaona twal, atero ame owoto iyi akuro.

¹⁴An doŋ adoko gi-anyera orok luŋ, nyiŋa doŋ odoko me aweragi kare luŋ,

¹⁵Omio akako kaŋo twon ginnoro akec meicel, omio ayeŋ adiltoŋ.

¹⁶Omio amwodo kwoyo amwoda i alaka, te juku waŋa-gu kede buru.

¹⁷Mom doŋ aparo pi kuc kadi acel, wia doŋ owil oko i kom gin ame olwoŋo ni yomcuny.

¹⁸Mannono omio doŋ akobo ni, “Kwogo a yam atye kede doŋ ogik gire oko, mom doŋ atye kede gen me nwoŋo ginnoro i baŋ Rwot.”

¹⁹Po ba pi canna kede keckoma, karacel adiltoŋ kede epio ame abedo kako,

²⁰Abedo tamo pire i cunya didik, mom rwenyo i cunya kadi acel.

²¹Pien kop man mom twero rwenyo i cunya, mannono omio pwod amedde bedo i gen.

²²Mar a Rwot a mom lokere, mom gire gik kadi acel, kica mere daŋ mom gik.

²³Obedo gigi anyen anyena ru-piny i ru-piny dok en genne meicel.

²⁴Akobo i cunya ni, “Rwot obedo dul ame opokka, pi mannono abino bedo kede gen pire.”

²⁵Rwot ber baŋ jo luŋ ame kure, kede baŋ jo ame cunygi tye i kome.

²⁶Ŋat a kuro Rwot me bino lare, myero kur mot a cunye opye.

²⁷Bedo ber ka ce dano opwonyo diyo cunye kun pwod tidi, calo twon ame opwonyo i wayo kweri.

²⁸Ka ce Rwot omio can opoto i komi, myero ibed keni, kun iliŋ mot,

²⁹myero ibut aryeba cuny kun dogi ogudo apua, atot onyo ca pwod dok itwero bedo kede gen;

³⁰myero ilok lemi baŋ ŋat ame mito bapi; me imat ayet calo pii,

³¹Pien Rwot ka abolo dano, mom gire bolo oko atwal.

³²Kadi bed en mio can poto dano, cite kica daŋ dok mako, pien marrere a mom lokere dwoŋ meicel.

³³En gire mom keto can i kom dano nono, akadi waŋo yi ŋattoro nono.

³⁴Rwot gire mom cwaka kadi acel tim me nyono obuc luŋ me wi loba i te tyen piny,

³⁵kede me kwanyo twer ame dano tye kede oko, i nyim Ŋat Amalo Meicel,

³⁶akadi geŋo dano loyo pido mere, cuny Rwot mom yom iye,

³⁷Ŋa kara ame kobo kop keken gin emito te timere, ka ce mom Rwot en ociko ni timere?

³⁸Mom gin abeco kede en areco luŋ, timere ka ce ŋat Amalo Meicel en okobo?

³⁹Kara dano akwo bedo kok, piŋo, ka ce oketo can i kome pi ballere?

⁴⁰Koŋ otem neno wunu kitewa, oŋi wunu daŋ kwowa, eka ote lokere wunu dok baŋ Rwot.

⁴¹Otiŋ wunu cunywa kede ciŋwa baŋ Obaŋa malo i wi polo, kun okobo ni,

⁴²“Wan giwa obalo, daŋ doŋ ojem, yin mom yam itimowa kica i balwa.

⁴³“Ibino doŋ i koma oko akemo, itye iryemo yorwa, kun inekowa aboŋo kica moro.

⁴⁴Iwumere doŋ oko i pol acol, ame kwacwa mom romo katto.

⁴⁵Yin doŋ imiowa odoko calo yugi, i akina rok luŋ.

⁴⁶“Okworwa doŋ ŋamo doggi alac, ame oŋalowa dok oyetowa-gu ayeta,

⁴⁷Lworo doŋ obabaŋowa oko, karacel i to piny ame obino me jwerowa oko,

⁴⁸Pig waŋa doŋ mollo calo pil i kulo, pien jona doŋ oneko oko luŋ.

⁴⁹“Pig waŋa gire bino bedo cwer acwera, kun medde ameda aboŋo gik,

⁵⁰tuno waŋ ame Rwot ame tye malo i polo okulo waŋe oneno piny.

⁵¹Waŋa doŋ bur keken, pi anyirana luŋ ame yam tye i bomana.

⁵²“Nen okworra doŋ dwara calo winyo aco kun mom aballigi ginnoro kadi acel.

⁵³Obola-gu i bur kun pwod akwo, eka ote nanapo an kede gweŋe.

⁵⁴Pii opoŋ i bur te mwonya oko, an ate kobo ni, ‘Doŋ ato oko doi!’

⁵⁵“Alwoŋo nyiŋi, Ama Rwot, kun atye piny i bur;

⁵⁶yin gire mom ite winyo kwacca. Kur icul yiti oko ba, Ama Rwot, ka akok baŋi ni ikonya.

⁵⁷Yin rik inoko ŋeta i kare ame alwoŋi, rik ite kobba ni, ‘Kur ilwor!’

⁵⁸“Yin doŋ ipido pira, Ama Rwot, yin doŋ ilakoro kwona oko.

⁵⁹Yin gire ineno gin arac ame obedo timo i koma, Ama Rwot, yin giri ŋol koppa,

⁶⁰Ityeko neno kite ame gin oculo kede kworgi luŋ, kede kop arac luŋ ame gin obedo poro i koma.

⁶¹“Yin iwinyo kite ame gin bedo ŋala kede, Ama Rwot, kede kop areco ame gin obedo poro i koma,

⁶²Jo ame lwenyo keda kobo kop, dok daŋ otamo tam i koma keken kare luŋ.

⁶³An doŋ adoko gi-aweragi kare luŋ, kadi ocuŋ acuŋa onyo obedo abeda.

⁶⁴“Yin en ibino culo kworra i komgi, Ama Rwot, kun iporo i gin ame gin otimo i koma.

⁶⁵Yin ibino miyogi odoko jo amiŋ, cen ame icenogi kede bino bedo i komgi.

⁶⁶Ibino ryemogi i twon akemo me nekogi, i piny i te polo kan, Ama Rwot.”