Read lango Wer Koko 5 Bible Online

Wer Koko 5 - lango bible

Wer Koko 5

¹Ama Rwot, po ba i kom can ame opoto i komwa, lok waŋi me inen lewic ame otye kede.

²Lobo ame rik oleo i baŋ kwariwa oloko doŋ odoko me a jo ocele, pacciwa doŋ odoko me orok.

³Wan doŋ odoko itino kic ame papagi pe, kun totowa calo mon a coggi oto.

⁴Nen pii ame omato-gu owilo awila, yen tedo daŋ owilo awila.

⁵Oryemowa atek kun lodi-gu tye i ŋutwa, ool atek ame mom oromo miyowa kare moro me weo.

⁶Ocikere i jo Miciri kede jo Acuria i ciŋwa, me wek onwoŋ cam me acama.

⁷Kwariwa yam obalo, ote to daŋ oko, wan otye oneno can pi balgi.

⁸Jo ame rom aroma opii en a doŋ loowa, ŋattoro ame twero larowa i ciŋgi mom tye.

⁹Wan ojalo kwowa ka owot yenyo cam, pien okiowa akia i pala lweny.

¹⁰Del komwa lyet kare luŋ calo keno tedo, pi lyeto me kec ame nekowa.

¹¹Omako mon tetek i Cion ote buto kedgi, kede anyira a mom ru oŋeye kede ico i boma me Juda.

¹²Rwode doŋ otye ka guro i kom yat i ciŋgi, odoŋe a lwak mom doŋ oworo kadi acel.

¹³Itino awobe doŋ odio tetek me rego kal, awobe woto ame ogate agata i yen apek ame oyeo i wi gwokgi.

¹⁴Jo oteggo mom doŋ bedo i cokeregi i dog boma, awobe daŋ mom doŋ wero kadi acel.

¹⁵Yomcunywa doŋ ogik gire oko, myelwa olokere odoko kumo.

¹⁶Tok kwogo opoto piny i wiwa, bal omiowa oneno can nadi!

¹⁷Mannono omio cunywa ojebere oko, omio waŋwa doŋ ocido oko.

¹⁸Pien kidi me Cion odoŋ nono, ekwe en ame doŋ bebea iye.

¹⁹Ama Rwot, locci gire bedo nakanaka, kom kwogoni perakino waŋ i waŋ pi jo me kare luŋ.

²⁰Piŋo wii owil oko i komwa atwal, kara piŋo iwekowa ata pi kare a rom man twal?

²¹Dwogowa doŋ baŋi ba, Ama Rwot. Roc karewa-ni bed anyen me odwog bani kite a rik tye kede con!

²²Doŋ ikwerowa oko atwal bo? Akemo doŋ omaki i komwa ame mom doŋ romo kwe bo?