Read lango Ejekeri 1 Bible Online

Ejekeri 1 - lango bible

Ejekeri 1

¹I nino dwe abic me dwe me aŋwen me mwaka pyeradek nono, onwoŋo an atye abedo i akina Ojudaya ame tye iyi opii i ŋet kulo me Cebar, i Babulon. Rik ate neno polo oyabere, ate neno gin ame Obaŋa onyutta.

²Mannono onwoŋo nino dwe abic me dwe me aŋwennono, me mwaka me abic, cakere i kare ame rik otero iye abaka Yekoyakin iyi opii.

³Rwot rik te kop keda an Ejekeri, ame rik an abedo alamdoggere, wot Abuji i lobo a jo Kaldaya, i ŋet kulo me Cebar, i kare-naca rik ate winyo teko a Rwot obino i koma.

⁴I kare ame atiŋo waŋa malo, nen ba, rik ate neno yamo kot ame akodo atek meicel kun bino i tutuŋ anyarodi, kot daŋ onwoŋo tye amemenya meicel kun pol obino adwoŋ meicel, kun mac ameny ipilpil tye anen tere tere, dok ginnoro iye tye aryeny calo mola.

⁵I akina pol, ate neno iye gigi mogo ame nen calo leyi aŋwen, Leyi-nono onwoŋo nen calo dano,

⁶ento acel acel i akinagi onwoŋo tye kede nyime aŋwen, kede bwome daŋ aŋwen.

⁷Tyengi onwoŋo ocuŋ atira, kun yi tyengi ame nyono piny calo me a roa. Leyi-nono onwoŋo komgi papara meicel calo kom mola ame ojwao.

⁸I te bwomgi aŋwen luŋ onwoŋo tye iye ciŋgi ame calo ciŋ dano, Leyi aŋwennono onwoŋo tye kede nyimgi kede bwomgi ame calo kit man:

⁹Bwom le acel acel onwoŋo ogudo me awottere, ka onwoŋo owot, owoto atira kun mom otwero lokere kadi acel.

¹⁰Aco cal nyimgi, onwoŋo kom rom aroma i me a dano ka ineno i tutuŋ nyime, nyimgi ame onwoŋo tye tutuŋ cem onwoŋo calo me eŋatu, nyimgi ame tye tutuŋ cam, onwoŋo calo me a twon, eka nyimgi ame tye tutuŋ ŋegi, te calli me a Cur.

¹¹Mannono en kite ame nyimgi onwoŋo nen kede, Bwomgi onwoŋo tye ame oyarre ayara, i akina bwomgi aŋwennono, aryo iye onwoŋo tye ame ogudo awottere tuŋŋi i tuŋŋi, eka bwomgi aryo ocele te yarre wumo komgi.

¹²Ŋat acel acel i akinagi onwoŋo woto atira, kun cuny ame telogi terogi iye kun mom olokere kadi acel.

¹³I akina leyi-nono, onwoŋo tye iye ginnoro ame nen calo mac ame alyel, calo mac rao ame awire tuŋŋi i tuŋŋi, i akina leyi-nono, Maccere onwoŋo tye alyel acil meicel, dok i akina maccono onwoŋo lutkot daŋ tye ameny iye.

¹⁴Leyi aŋwennono, onwoŋo tye apyepyea tuŋŋi i tuŋŋi calo lutkot ame amennyono.

¹⁵I kare ame onwoŋo atye aneno leyi aŋwennono, ate daŋ neno okot ame tye piny i lobo i ŋet leyi aŋwennono, kun okot acel acel tye i ŋet leyi aŋwennono,

¹⁶Kite ame otio kede okottono, kede kite onwoŋo nen kede onwoŋo tye kit man: Gin aŋwennono luŋ onwoŋo tye cacal, kun acel acel i akinagi onwoŋo memenya calo gweŋ alilia, dok otiogi acalo okot ame tye iyi okot wadgi.

¹⁷Gin okot aŋwennono luŋ ka owot, owoto tuŋŋoro keken ame gin okemo kabedo aŋwen luŋ, kun owoto atira ame mom romo lokere tuŋŋoro ocele.

¹⁸I kom okot aŋwennono, onwoŋo tye iye kan ame otutuca calo waŋgi, kun oromo kom okot luŋ irit, dok daŋ tire mere onwoŋo tye.

¹⁹Doŋ ka leyi aŋwen-ca tye awot, okot aŋwennono daŋ woto i ŋegi. Ka leyi aŋwen-ca oya oko i lobo, okot daŋ woto i ŋetgi.

²⁰Gin luŋ owoto kun ame cuny omito ni gin owot iye, kun okot daŋ ya woto kedgi, pien cuny ame telo leyi aŋwennono onwoŋo tye i kom okot aŋwennono.

²¹Ka leyi aŋwen-ca owoto, okot daŋ woto, ka gin ocuŋ okot daŋ cuŋ, ka gin oya i lobo, okot daŋ tiŋere malo ya karacel kedgi, pien cuny ame telo leyi aŋwen-ca onwoŋo tye i kom okot.

²²Tutuŋ wi leyi aŋwennono malo, onwoŋo tye iye ginnogo ame opette, ame memenya calo gweŋ amimila, ame oyarre i wigi malo.

²³I te gin opettenono, bwomgi onwoŋo tye oyarre iye atira, kun man tikere owadgi. Lee acel acel onwoŋo tye kede bwome aryo ame owumo kome.

²⁴Ka gin tye awot, awinyo kite ame bwomgi tye awoo kede, kun calo pii ame tye amol atek. Winyere calo twon mony adwoŋ meicel ame aciro, onyo calo dwon Obaŋa Won Twer Ducu. Ka ce gin ocuŋ odolo bwomgi,

²⁵dwonnoro te bino i ŋe gin ame opette ame tye i wi leyi aŋwennono, i kare ame gin ocuŋ mot, gin te dwoko bwomgi oko piny.

²⁶I wi gin opette-malo-nono, i wi leyi aŋwen-ca, ginnoro onwoŋo tye iye calli i kom loc ame nen bululubululu calo capir, ginnoro onwoŋo tye ame obedo i wie, ame cal acala i dano.

²⁷Cakere i pyere dok kede malo, aneno ginnoro ame tye amimila calo mola, calo mac ame omano kome luŋ, aco cakere i pyere dok kede piny, ate neno ginnoro acalo mac, kun amemenya i kabedo luŋ i ŋete kuno.

²⁸Raŋi apapat onwoŋo tye anen i kom gin ame amennyono ame calo etaloka ame nen i polo ka kot obino, Mannono kite ame kwogo Obaŋa onen kede baŋa. Kare ame aneno, arette piny aryeba cuny, ate winyo dwonnoro ame tye akop.