Read lango Ejekeri 11 Bible Online

Ejekeri 11 - lango bible

Ejekeri 11

¹Cuny Obaŋa rik te tiŋa malo, te tera naka i dogcel ame tye tutuŋ kide me ot a Rwot. I kare ame atye kuno, i ŋet doggola me dogcel, ate neno jo pyeraryo wie abic, kun i akinagi onwoŋo tye iye Jajania wot Ajur, kede Pelatia wot a Benaya, ame onwoŋo obedo rwode ame loo lwak.

²Obaŋa te kobba ni, “Wot a dano we, magi gin otim tim areco ame tye ka yiko kop imuŋ me timo gin arac i kom boma man.

³Gin okobo ni, ‘Kare ame obino gero i udi doŋ ceggi, boma man tye acalo gulu me tedo, aco waŋ acalo riŋo ame tye iye.’

⁴Pi mannono ba, wot a dano, myero irab kop i komgi.”

⁵Cuny a Rwot rik te poto i koma, te kobba ni, “Kob ni Rwot okobo ni, ‘Wun jo Icrael aŋeo gin ame gin itye ka kobo wunu, kede gin ame itye ka timo wunu i muŋ.

⁶Wun itye ka medde wunu ameda me neko jo apol ame tye i boma man, ame imio wunu kom jo oto doŋ oradde arada atata i dye gudo.’

⁷“Doŋ Rwot Obaŋa okobo ni ba, Boma-ni doŋ odoko gulu me tedowu, cite kom jo ame ineneko wunu ite pyelo wunu i dye boma, obedo riŋo me atedawu. Myero iŋe wunu ni wun obino kwanyowu oko i dye boma.

⁸Yam ilworo wunu pala me lweny cite myero iŋe wunu ni abino kelo pala lweny i komwu. Man kop ame Rwot Obaŋa okobo.

⁹Abino kwanyowu oko i dye boma ate terowu oko, wot miyowu i ciŋ orok.

¹⁰An doŋ atyeko ŋolliwu kop me to, obino nekowu oko i lweny, kun onekowu i pala lweny i lobowu ikokome. Man bino miyo iŋeo wunu ni an a Rwot.

¹¹Boma man mom bino medde bedo gulu me tedowu, dok wun daŋ mom ibino bedo wunu riŋo ame obino tedo iye. Abino keto can i komwu i kabedo ducu ame ibino bedo wunu iye i lobo me Icrael.

¹²Mannono bino miyo iŋeo wunu ni an a Rwot, pien wun mom ibedo lubo wunu cikka kede gin ame onwoŋo an aciko ni timi wunu, ento ibedo wunu lubo cik a rok ocele ame tye i ŋetwu.”

¹³Kare okato anonok keken, ame an pwod atye arabo kop Obaŋa, Pelatia wot a Benaya te rette piny to oko, An daŋ ate rette piny aryeba cuny, ate mwoco koko malo i dwon aloŋo kun akok ni, “Ama Rwot Obaŋa, ibino doŋ tyeko jo me Icrael ame odoŋ oko?”

¹⁴Rwot te kop keda ni:

¹⁵“Wot a dano we, omegoni i kokome ame otero iyi opii, jo luŋ me ot Icrael, kede jo luŋ ame bedo i Jerucalem, otye ka kobo ni, ‘Gin doŋ otye kannabor meicel, ame mom doŋ oromo woro Rwot, kun en omiowa lobo man ni myero bed megwa’.

¹⁶Pi mannono, yin myero ikob kop ame an atye akobo-ni baŋ opi i wadwu: kadi bed atyeko kwanyogi cwayogi teŋe baŋ orok, kadi bed ake ketogi i lobo apapat, an onwoŋo aye ni gin owora i kabedo luŋ ame gin tye iye.

¹⁷Pi mannono ba, kobbigi kop man ame an Rwot atye ka kobo: ‘Abino rayowu oko i akina orok, kede i lobo apapat ame aketowu iye, ate miyowu lobo a jo Icrael.’

¹⁸Ka gin bino dok kunu, obino kwanyo ginnoro i kunu luŋ ame cilo tye iye, karacel kede ginnoro luŋ me kwer.

¹⁹Abino miyogi obedo i cuny acel, dok abino keto cuny anyen i yigi. Abino kwanyo cuny ame tek calo gweŋ oko i komgi ate miyogi cuny ame rom aroma i kom,

²⁰me wek obed jo ame lubo cikka, kun otio gin ame an aciko. Gin bino bedo jona, an abino bedo Obaŋagi.

²¹Aco jo ame bino medde keto cunygi woro gigi mogo a mom cil kede gigi mogo me kwer, an abino keto can i komgi pi balgi. Man kop ame Rwot Obaŋa okobo.”

²²Okerubi te cako yaro bwomgi me twarre malo kun okot daŋ tye i ŋetgi, kwongo Obaŋa me Icrael onwoŋo tye i wigi malo.

²³Kwogo Obaŋa me Icrael te ya oko i dye boma me Jerucalem, te wot cuŋ i wi kidi ame tye tutuŋ to.

²⁴An ate neno cuny Obaŋa tye ka tiŋa oko malo, te tera naka baŋ jo ame tye iyi opii, i lobo me Kaldaya. Gin ame onyutta-nono, te cako rwenyo oko i baŋa.

²⁵An ate kobbi jo ame tye iyi opii ginnoro luŋ ame Rwot onyutta.