Read lango Ejekeri 12 Bible Online

Ejekeri 12 - lango bible

Ejekeri 12

¹Rwot dok te kop keda, kun kobo ni,

²“Wot a dano we, yin ibino iyi akina jo me ot ame maro jem, ame tye i waŋgi cite mom oneno ginnoro, otye kede yitgi, ento mom owinyo ginnoro,

³pien gin obedo jo me ot ame maro jem. Pi mannono ba, wot a dano, yikere itwe yecci acalo me ariŋ ayela, ite cako wot, kun joni neno, me wot i lobo ocele. Gwok onyo bino miyogi oniaŋ, kadi bed gin obedo jo ame maro jem, ibino cako wot-ti-nono i nyimgi dyeceŋ.

⁴Ibino tero yecci-nono dyeceŋ kun gin aneno, acalo yec ariŋ ayela; dok ibino wot i nyimgi kun gin anenni, kite ame jo woto kede me wot i lobo ocele i kare me riŋo ayela i lobogi.

⁵Dok ituc kor apama ame gin anenno, eka yin ite bea i kan ame ituco-nono.

⁶Ibino tiŋo yecci i wi bwoki kun gin aneno, eka ite yeyo dyewor, ibino tweyo waŋi oko ame mom iromo neno lobo ame ateri iye, pien aketi me bedo gin ame jo Icrael twero neno, ame twero nyuto gin ame bino timere.”

⁷An ate timo ginnoro luŋ ame Rwot ocika ni atim. Akwanyo yecca, akelo oko dyecerj, kun atweo yecca calo ariŋ ayela, eka ate tuco kor apama, kun atuco kede ciŋa: ate cako wot dyewor, kun ayeo yecca i wi bwoka, ame gin daŋ otye onenno kede waŋgi.

⁸Odiko ocele Rwot dok te kop keda, kun kobo ni,

⁹“Wot a dano we, jo Icrael ame maro jem-mi, mom openyi ni yin itye ka timo gin aŋo?

¹⁰Yin myero igam kopgi kun ikobbigi kop man ame an a Rwot Obaŋa akobo: Kop man ame pire tek wok-ki, tiko rwot me Jerucalem, kede jo Icrael ame tye iye.

¹¹Kobbigi ni mannono, gin ame itimo-ni, itimo me nyuttigi gin ame bino timere i komgi; obino terogi luŋ iyi opii i lobo ocele.

¹²Dok rwot ame tye i akinagi bino tiŋo yeccere i wi bwoke dyewor, te cako wottere dyewor kite ame yin itimo kede, en bino tuco kor apama, te donnyo iye, en bino tweyo waŋe oko, me wek kur enen lobo-nono i waŋe.

¹³Abino ryeyo bwona make oko, en te moko oko iyi owic ame aciko. Abino tere naka i lobo me Babulon, ame obedo lobo a jo Kaldaya, kadi amannono, en mom bino neno lobo-naca naka to iye kuno.

¹⁴Abino keketo jo luŋ ame yam gure dyere, jo ame mie tam, kede jo ocele ame yam gwoke i yore apapat, Abino miyo okworgi yenyogi meicel i pala lweny.

¹⁵“Gin obino ŋeyo ni an a Rwot, i kare ame akeketogi atata i akina rok ocele, kede lobo ocele.

¹⁶Cite abino weko jo mogo i akinagi bwot i leb pala lweny, i kec, kede i too edeke, me i kare ame gin tye i akina orok kuno, otuc gigi mogo me kwer ame yam obedo timo, dok daŋ oŋe ni an abedo Rwot.”

¹⁷Rwot dok te medde kop keda, kun kobba ni,

¹⁸“Wot a dano we, cam ogatini ame komi amyel amyela, dok imat pii daŋ i twon lworo adwoŋ meicel, dok ame komi daŋ amyel amyela.

¹⁹Kobbi jo me lobo-nono kop man ame an Rwot Obaŋa akobo i kom jo ame bedo i Jerucalem, i lobo a jo Icrael: Gin obino camo camgi i twon lworo adwoŋ meicel, dok obino mato pii ame cunygi apoto apota. Pien obino yako jami luŋ ame tye i lobogi, lobogi te doŋ nono; man bino timere pi tim me byemi ame gin obedo timo.

²⁰Boma luŋ ame aman jo tye iye, obino jwero odoco, te doŋ acalo wi oburu, lobo te doŋ yie nono calo tim. Mannono bino miyogi oŋeo ni a Rwot.”

²¹Rwot dok te kop keda, kun kobo ni,

²²“Wot a dano we, man kara carokop aŋo ame iwinyo i kom lobo me Icrael, ame jo Icrael maro kobo kede ni kare tye ka kato akata, dok ginnoro luŋ ame otye ka nyuttigi i waŋ lek, mom tye ka cobere kadi acel?

²³Pi mannono kobbigi kop man ame an a Rwot Obaŋa akobo: Abino miyo kobo kop man i kom carokop gik oko, jo mom dok bino medde kobo carokop iyi Icrael luŋ, Yin kobbigi ni, kare doŋ tye ceggi acega, ame ginnoro luŋ a yam onyuto bino cobere iye.

²⁴Anyut me goba doŋ bino bedo mom, akadi tyettogo, ame obwolo kede jo abwola mom dok bino nen i akina jo me Icrael.

²⁵An Rwot ikoma en ame abino kobo gin ame amito kobo, dok daŋ jo bino timo gin ame akobo, Kop man mom dok bino gal kadi acel; abino gire timo gin ame aciko ni abino timo pi kare me kwowu, wun jo ame maro jem.” Man kop ame Rwot Obaŋa okobo.

²⁶Rwot dok te kop keda, kun kobo ni,

²⁷“Wot a dano we, nen jo me ot Icrael tye ka kobo gin ame otye ka nyutti-ni kede kop ame yin itye ka kobo, tye pi kare ame pwod bor meicel.

²⁸Pi mannono ba, kobbigi kop man ame an Rwot Obaŋa akobo: Mom tye kopporo ame an akobo ame pwod dok bino gal, ento ginnoro luŋ ame an akobo bino doŋ timere. Man kop ame Rwot Obaŋa okobo.”