Read lango Ejekeri 17 Bible Online

Ejekeri 17 - lango bible

Ejekeri 17

¹Rwot okobo keda kun kobo ni,

²“Wot a dano we, kob kop me temo wi dano, ame openyere kede ni koc, lit; dok ikob kop me carokop baŋ jo me ot Icrael,

³kun ikobbigi kop man ame Rwot Obaŋa okobo: Yam tye twon curroro adwoŋ meicel, ame bwome bocoboco daŋ meicel, dok yaro bwome alac okato kare. Yer kome onwoŋo nen amwonya meicel, kun raŋi mere papat. Currono rik te twarre, wot i Lebanon, te wot turo wi yat cedar me Lebanon oko.

⁴Oturo cuny wi yat cedar ame tye i wi yat me agikki malo, te wot kede oko naka i lobo ocatwil, te wot keto i boma ocatwil kuno.

⁵Te dok wot kwanyo nyig yat aberrere i lobo a jo Icrael te wot pito i lobo amwonya meicel kan ame pii onwoŋo dwoŋ iye, me doŋ kuno. En opito yattono kite ame opito kede yen ame doŋo i ŋet kulo,

⁶yattono te doŋo, te lokere doko olok ame ojany atek kun obuŋere olyao naka piny. Jaŋ yattono te kemo tuŋ kan ame Cur tye iye, kun lwite tye kan ame yat ocuŋ iye. Mannono en kite ame yattono odoko kede olok ame jaŋe pol meicel, dok pote daŋ olot atek ame obuŋere meicel.

⁷“Ento rik daŋ dok onwoŋo tye twon curroro ocele ame dwoŋ meicel dok daŋ tye kede bwome ame bocoboco, kede yer bwome daŋ abocoboco. Nen ba, lwit yat olokki rik te lokere dok tuŋ kun ame currono tye iye, jaŋ olokkono daŋ te wiro wigi luŋ kun ame currono tye iye, kun ogeno ni bino miyogi pii. En rik okwanyo yatti i kan ame ogeo pito iye,

⁸te tero kan ame pii dwoŋ iye, dok ame lobo mere ber, me wek jany atek meicel dok daŋ nyak nyige adwoŋ te doko twon olokkoro a pire tek meicel.”

⁹Rwot Obaŋa openyo peny man ni, “Yat man bino doŋo te bedo kannono nakanaka? Cur me agege-ca mom bino puto oko, te lwero jaŋe daŋ oko, me pote luŋ two oko? Puto yatti mom bino mito lo moro ame kome tek onyo lwak jo apol me puto i lwite luŋ.

¹⁰Nen ba, yatti ka onako ote tero kan ocele, ote pito, iye, twero bedo kuno nakanaka? Mom bino two oko ka ce yamo ame kodo i tutuŋ kide okodo, mom bino two oko i kan ame opito iye?”

¹¹Rwot dok te kop keda kun kobo ni,

¹²“Aman yin myero ikob baŋ jo man ame maro jem-mi, penygi ka ce oŋeo te kop me carokop man. Kobbigi ni abaka me Babulon obino i Jerucalem, te kwanyo abaka me Jerucalem oko karacel kede rwode me kuno te terogi luŋ baŋe i Babulon.

¹³En okwanyo atin me ot abaka acel te cikere kede kun mie ekwoŋo akwoŋa ni ebino gwoko cikere-nono. En omako daŋ jo adoŋo me Jerucalem te terogi oko,

¹⁴me rok doŋ bed mot, kun mom dok oyiyia nononono, dok daŋ ogwok cikkere me locgi cuŋ atek.

¹⁵Cite abaka me Juda ojem oko, te cwayo akwena i Miciri, me jo Miciri konye kede aguragura kede mony adwoŋ meicel. En bino loyo ateteni? Dano ame timo kodi tim man twero bwot?

¹⁶En twero turo cikere mere eka dok te bwot? Rwot Obaŋa okobo ni, ‘Kite acalo atye kwo-ni, abaka-nu gire bino to i Babulon, pien ocao kwoŋ ame rik ekwoŋo, dok oturo cikere ame rik en oketo iyi akina en kede abaka me Babulon, ame rik okete me bedo i wi kom me loc acalo abaka.

¹⁷Parao karacel kede lwak monnyere, kede lwak jo apol atata, mom bino konye i lweny, ka jo Babulon otoro lobo oguro cel oko, me onek lwak jo apipim ame onwoŋo bedo iye.

¹⁸Kite acalo en doŋ otyeko cayo kwoŋ ame ekwoŋo, dok daŋ oturo cikere ame rik ecikere kede, eka te timo jami magi luŋ, ateteni en gire mom bino bwot.’ ”

¹⁹Mannono omio Rwot Obaŋa okobo ni, “Kite acalo an Obaŋa atye kwoni, abino gire keto can i kome pi kwoŋ ame rik en okwoŋo i nyima ame aman en doŋ otyeko cayo kede pi cikerena ame aman en oturo.

²⁰Abino cikoboona me make, en bino moko iyi owic, eka ate tere i Babulon, ate cako ŋolo kop i kome kuno, pi timmere me erupe ame en obedo timo i koma.

²¹Jo mere me lweny ame oyero ayera obino neko oko i pala lweny, jo ame odoŋŋere, obino keto oko atata; mannono bino miyo iŋeo wunu ni an a Rwot Obaŋa atyeko kobo kop man.”

²²Rwot Obaŋa okobo ni, “An ikoma en ame abino kwanyo cuny yat cedar ame pwod toco mere, kun aturo i wie malo, an ikoma en a daŋ dok abino pito,

²³abino pito i wi kidi abor meicel ame tye iyi Icrael; abino pito kuno me jany iye, dok daŋ onyak nyige adwoŋ meicel, odok twon yattoro adwoŋ ame kit leyi luŋ me tim bino we i tere, kede kit winyo luŋ bino te bino gero wudigi i jaŋe.

²⁴Mannono bino miyo yen luŋ ame tye i tim ŋeo ni an atwero miyo yat ame odoŋo abor doko acecek, eka yat ame cecek te doko abor, dok atwero miyo yen ame dyaka two oko, eka ate miyo yen otwo dok adyaka. Man kop ame an Rwot ikoma akobo, dok daŋ abino miyo cobere.”