Read lango Ejekeri 18 Bible Online

Ejekeri 18 - lango bible

Ejekeri 18

¹Rwot okobo keda, kun kobo ni,

²“Ŋo ame jo tye ka timo me bedo nwoyo kobo carokop man i kom i Icrael? Gin okobo ni, ‘Kwarowa rik ocamo nyig olok awac, omio lak otino odil oko.’

³Doŋ kite ame an Rwot Obaŋa atye kede kwo-ni, mom dok ibino medde wunu kobo carokop man iyi Icrael atwal.

⁴Nen ba, kwo a jo luŋ tye i ciŋa, kwo a jo adoŋo kede kwo itino atino, gin luŋ tye i ciŋa. Ŋat ame timo tim me bal bino to.

⁵“Ka ce dano moro kite atira, dok timo gin ame tye atira, ame cik mito,

⁶ka ce dano-nono mom woro jogi a jo Icrael, dok daŋ mom camo lee moro ame oyalo i jogi, Ka ce kodi dano-nono mom balo dako awottere, dok daŋ mom ribere i dako mere kare ame two two me kwer,

⁷mom buro ŋattoro, dok daŋ mom yako gire jami a ŋattoro, kun dwoko jami a jo okoporo jami mere baŋgi, mio cam me acama baŋ jo a kec neko, kede boŋo me aruka baŋ jo ame woto onoro.

⁸Ka ce en mom mio lim me akopa pi nwoŋo agoba, Cunye dag timo gin arac, ento ŋolo kop kakare, kun tye kede gen i akina jo luŋ.

⁹En lubo cikka ducu, dok daŋ gwokere meicel kun timo ginnoro luŋ ame an aciko, dano-nono nwoŋo dano a kite atira, ateteni danonono bino bedo kwo.” Man kop ame Rwot Obaŋa okobo.

¹⁰“Ka ce dano-nono onywalo wode ame ayak jo, onyo ame anek jo, kun timo gin ame pappere yam mom otimo kadi acel.

¹¹En camo riŋo leyi ame oyalo i cal jogi, kun daŋ babalo mon owote mere,

¹²dok wuno jo ame ocan karacel kede jo ame piny oloo. En mom rwenyo i tim me yako jo, dok gin ame ojeŋo bote pi banya mom dwoko baŋ wegi mege kadi acel, kun obedo awor jogi, dok daŋ timo tim me kwer ame neno lik.

¹³Dok daŋ mio jo koporo banya baŋe pi nwoŋo agoba, Wode-nono gire mom bino bedo kwo, mom bino bedo kwo kadi acel. Pien nwoŋo en doŋ obedo timo jami magi man me kwer, bino miyo en to gire oko, remo me ballere te dok gire i wie.

¹⁴“Ka ce dano-nono onywalo wode, ame neno balloro luŋ ame pappere yam obedo timo, eka te bedo alwor kun mom timo kodi bal ame pappere obedo timo.

¹⁵Mom camo cam ame oyalo i cal jogi a jo Icrael, mom babalo mon owote mege,

¹⁶dok mom timo ginnoro arac i kom ŋattoro, pe daŋ yako gi a ŋattoro: mio cam me acama baŋ jo ame kec neko, kede boŋo me aruka baŋ jo ame woto onoro.

¹⁷Mom bedo kede mit me timo ginnoro arac, mom daŋ mio banya baŋ ŋattoro pi nwoŋo agoba, kun obedo ŋat ame gwoko cikka, dok lubo ginnoro luŋ ame an aciko ame daŋ te timo kite ame aciko kede, dano-nono gire mom bino to pi bal a pappere, en gire bino bedo kwo,

¹⁸Cite pappere bino to oko pi ballere kene, pien obedo buro jo, kun daŋ yako jami owote mere, dok daŋ timo jami ame mom nen aber i nyim jo.

¹⁹“Kadi amannono yin dok pwod ipenyo ni, ‘Piŋo kara awobi mom twero neno can pi bal a pappere?’ Atwero gamo pennyi-nono kit man, Ka ce awobi obedo ti mo gin ame cik mito, kun timo gin ame tye atira, dok daŋ obedo gwokere meicel me lubo gin ame aciko, en gire bino bedo kwo.

²⁰Cite ŋat ame timo bal bino to oko. Mom obino keto can i kom awobi pi bal a pappere, dok daŋ mom obino keto can i kom adwoŋ pi bal a wode. Dano ame kite atira, bino nwoŋo bakacic ame otike en kene, pi tim atira ame en obedo timo, dok atim gin arac daŋ obino keto can i kome en kene, pi gin arac ame en otimo.

²¹“Cite ka atim tim arac olokere te weko bal luŋ ame yam etimo eka te cako lubo cikka, kun timo gin ame cik mito ame tye atira, kodi dano-nono gire bino bedo kwo, mom bino to kadi acel.

²²Mom obino kwano balloro ame yam en otimo kadi acel i wie, pi tim atira ame en otimo bino miyo en bedo kwo,

²³Hamo ni cunya yom i kom to abalo? Pe gire, an amito ni abalo ŋuti, owek timo bal, te lokere dwogo baŋa me ebed kwo.

²⁴“Cite ka dano moro ame kite atira olokere oko te weko timo gin atira oko, eka te cako timo bal, kun timo daŋ timmogo luŋ me kwer ame atim tim arac onwoŋo timo, dano-nono gire bino to, Mom obino poyo timmoro atira ame en otimo, kadi acel. En bino to pi timmere me erupe kede pi bal ocele ame en obedo timo.

²⁵“Cite wun jo Icrael itye ka kobo wunu ni, ‘Gin ame Rwot tye ka timo mom tye atira.’ Koŋ apenyowu wun jo Icrael. Gin ame an atye ka timo mom tye atira ateni? Mom gin ame wun itye ka timo wunu en ame mom tye atira?

²⁶Ka ce lo moro ame kite atira olokere oko te cako timo bal, kun weko timo gin ame tye atira, en bino to pi ballere-nono. En gire bino to pi bal ame en otimo.

²⁷Amannono daŋ, ka ce atim tim arac olokere oko te cako weko timo gin arac ame yam etimo, eka te cako timo gin ame cik mito ame tye atira, dano-nono gire bino laro kwo mere.

²⁸En gire bino bedo kwo kun mom to kadi acel, pien en oparo kop i cunye, eka te cako weko bal luŋ ame yam etimo.

²⁹Cite wun jo Icrael itye ka kobo wunu ni, ‘Gin ame Rwot tye ka timo mom tye atira.’ Ama wun jo me Icrael, itamo wunu ni gin ame an atye ka timo mom tye atira? Mom gin ame wun itye ka timo wunu en ame mom tye atira?

³⁰“Pi mannono ba, an abino ŋolo kop i komwu wun jo me ot Icrael, kun aŋolli ŋat acel acel kop kun lubo gin ame en obedo timo. Myero iŋut wunu iwek timo wunu gin arac luŋ ame ibedo timo wunu, naka mio balwu mio itum wunu oko.

³¹Wek wunu doŋ timo bal luŋ ame yam ibedo timo wunu i koma, me icak wunu doŋ bedo i cuny anyen, karacel kede tam anyen daŋ. Piŋo kara imiye wunu me to, wun jo Icrael?

³²Pien an cunya mom yom i to a ŋattoro kadi acel. Doŋ pi mannono ba, myero ilokere wunu me ibed wunu kwo.” Man kop ame Rwot okobo.