Read lango Ejekeri 19 Bible Online

Ejekeri 19 - lango bible

Ejekeri 19

¹Cak wunu wer me kumo pi rwode me Icrael,

²wer wunu kun ikobo wunu ni: Totti onwoŋo tye kene nadi! en onwoŋo tye obuto i akina otino eŋatu, kun pito itino mere.

³Opwonyo atin acel i akina itino mere, en te doko acalo atin eŋatu, eka te pwonyo mako lee, te cako mako dano kuŋ mwodo oko.

⁴Rok apol te cako kuko duru i kome, ote kunyo bur me cikke. Gin te godde oko kede golo iyi bur, ote waye i golo-nono naka i Miciri.

⁵I kare ame tottere oneno ni ebalo kare mere nono, gen ame onwoŋo etye kede doŋ orwenyo oko, en dok te kwanyo atinnere ocele, te loko doko atin eŋatu.

⁶I kare ame atinnere-nono doŋ odoŋo, en te cako wot idwar kede eŋatu ocele mege; en te pwonyo kite me mako lee, te dok cako mako dano me amwoda mere.

⁷En te tuturo cellogo ame onwoŋo oguro atek, te keketo boma luŋ, miyo doko wi obur, ame temiyo jo ame bedo i lobonono bedo kede twon lworo adwoŋ meicel, ka en tye ka kok.

⁸Rok apapat te cako lweny i kome, ote ci ko owic me make i kabedo ducu, ote daŋ ryeyo boogi gure kede dyere, en te poto oko i bur ame onwoŋo gin okunyo.

⁹Gin te waye oko i bur kuno kede golo, te tere naka baŋ abaka me Babulon; otere ote wot ke te i ot can, me mom dok omedde winyo koko mere atwal i wi kiddi me Icrael.

¹⁰Totti yam calo yat olok, ame opito i poto olok ame tye i ŋet pii. Pien pii onwoŋo dwoŋ twatwal iye, omio jaŋe te tuco apol meicel, nyige daŋ te nyak adwoŋ meicel.

¹¹Jaŋ olokkere onwoŋo tek meicel, omio i kare ame odoŋo, odoko abiro aloc. Olok man onwoŋo odoŋo abor meicel ame wie buco gudo polo borrere onwoŋo jo luŋ twero neno, karacel kede kite ame onwoŋo obuŋere kede.

¹²Ento jo rik te puto tyen olokkono oko i twon akemo meicel, ote reto piny i lobo. Yamo ame okodo i tutuŋ kide, te bino twoyo oko, nyige te oony oko piny, jaŋe ame onwoŋo tek wokki daŋ te twotwoa oko, kare ame otwo mac te waŋo oko.

¹³Aman dok onako opito i tim ame otwo ikaŋ, kan ame pii mom tye iye kadi acel.

¹⁴Mac omoko i kor olok piny, te lak waŋo jaŋe kede nyige oko ducu, Jaŋe mom doŋ bino bedo atek kadi acel, abiro aloc mom doŋ bino ya iye. Man wer me kumo ame doŋ olokere odoko wer ame owero kare i kare.