Read lango Ejekeri 2 Bible Online

Ejekeri 2 - lango bible

Ejekeri 2

¹Ate winyo dwon ame kobba ni, “Wot a dano we, ya malo icuŋ i tyeni, me wek akob kedi.”

²I kare ame en okobo keda, cuny a Rwot te poto oko i koma, te miya cuŋ kede tyena; ate winyo en medde i kop keda.

³En te kobba ni, “Wot a dano we, an acwayi baŋ jo Icrael, ame gin obedo jo ame ojem i koma, gin karacel kede kwarigi otyeko timo bal i koma tuno kede naka i kare-ni.

⁴Dok gin obedo rok ame opala, ame otimo jami ducu opala opala, an acwayi baŋgi, yin ibino wot kobbigi ni, Rwot Obaŋa okobo ni,

⁵‘Kadi bed gin obino winyo onyo obino kwero winyo, pien gin obedo jo ame jem, cite gin obino ŋeyo ni adwarpiny rik obedo tye i akinagi.’

⁶Doŋ yin ba, wot a dano, myero kur ilworgi, kur daŋ ilwor kop ame gin kobo, kadi bed ocokocok kede okuto tye baŋi dok daŋ ibino bedo i wi yit; kur ilwor kopgi, cunyi daŋ kur poti kite ame gin neno kede, pien gin obedo jo a jem.

⁷Yin ibino kobo koppa baŋgi, kadi bed obino winyo onyo obino kwero winyo; pien gin obedo jo ame jem.

⁸“Ento yin wot a dano we, myero iwiny kop ame an akobbi, kur yin daŋ ibed ŋat a jem bala gin. Ŋam dogi icam gin ame ami.”

⁹Kare ame atino waŋa aneno malo, nen ba, aneno ciŋ ame oryeo baŋa, buk adola onwoŋo tye i ciŋ ame oryeo-nono.

¹⁰Dano-nono te yabo bukkono i nyima, bukkono onwoŋo ocoo yie kede ŋec, kop ame onwoŋo ocoo iye onwoŋo kop me kumo, kede kop me koko kede can.