Read lango Ejekeri 20 Bible Online

Ejekeri 20 - lango bible

Ejekeri 20

¹I nino dwe apar, me dwe me abic, i mwaka me abiro, odoŋe mogo me Icrael obino baŋa me bino penyo kop i baŋ Rwot,

³“Wot a dano we, kobbi odoŋe me Icrael, kop man ame an Rwot Obaŋa akobo. Man wun ibino wunu me bino penyo kop i baŋa bo? Kite acalo an Rwot Obaŋa atye kwo-ni, wun gire mom ibino wunu penyo kopporo baŋa kadi acel. Man kop ame an Rwot Obaŋa akobo.

⁴“Wot a dano we, ibino ŋolligi kop? Ŋolligi doŋ kop do. Poyo wigi i kom timmogo me kwer ame kwarigi rik obedo timo.

⁵Kobbigi kop man ame an Rwot Obaŋa akobo: I kare ame rik ayero iye jo Icrael, rik an akwoŋo baŋ ikwae a Yakobo. Anyutte baŋgi i Miciri, kun akwoŋo baŋgi akobo ni, ‘An a Rwot Obaŋawu.’

⁶I kare-naca daŋ en ame rik ate cikere kedgi ni abino kwanyogi oko i Miciri ate terogi i lobo ame an doŋ atyeko yero pirgi, lobo ame cak kede moo kic dwoŋ iye meicel, lobo me kwogo atek meicel ame kato lobo ocele luŋ.

⁷Akobbigi ni myero obol cal jogi oko pien obedo gin me kwer, dok daŋ acikogi ni myero kur olille obaŋe mogo me Miciri ame obedo obaŋe me gobagoba, pien an en ame abedo Obaŋagi.

⁸Cite gin gigi ote jem oko, ote kwero winyo koppa oko, Gin luŋ ote kwero bolo cal jogi oko dok ote medde gigi ameda i woro obaŋe a jo Miciri ame mom obedo obaŋe me ateni ca. “En omio ate tamo ni myero aluŋ akemona kede inigana i komgi i dye lobo me Miciri.

⁹Cite mom ate timo gin ame atamo ni myero atim-nono, pien mannono onwoŋo twero miyo nyiŋa doko ayot i akina orok kan ame jo Icrael onwoŋo bedo iye. Pien an onwoŋo anyutte baŋ jo Icrael i akinagi kuno, kun akobo ni abino kwanyogi oko i lobo me Miciri.

¹⁰“Mannono omio rik ate kwanyogi oko i lobo me Miciri ate terogi i tim.

¹¹I tim kuno ate miyogi cikka dok ate cikogi kun anyuttigi ginnoro luŋ ame an onwoŋo amito ni gin otim, ame ka ŋat olubo ginnono luŋ twero bedo kwo.

¹²Medo i kom mannono, rik ate miyogi daŋ nino me cabit ni gin myero ogwoki, kun bedo acalo anyut ame tye i akina an kede gin, me gin oŋe ni an a Rwot en alonyogi ote doko acil.

¹³Cite jo Icrael te medde jem gigi ajema i koma i tim; gin te kwero gigi lubo cikka oko, kun daŋ okwero timo gin ame acikogi iye; ame obedo gin ame ka dano olubo twero bedo kwo. Aco cabit ame onwoŋo amiogi ni myero ogwok, gin te balo odoco. “I kare ame gin tye i tim kuno ate tamo ni myero aluŋ akemona i komgi me ami wigi gik oko i wi lobo.

¹⁴Cite mom ate timo gin ame onwoŋo atamo, pien mannono onwoŋo twero miyo nyiŋa bale i akina orok ame onwoŋo onena i kare ame akwanyogi i lobo me Miciri.

¹⁵Medo i mannono, onwoŋo rik akwoŋo baŋgi akwoŋa i tim ni mom doŋ abino terogi i lobo ame onwoŋo atyeko miyo baŋgi, lo bo ame cak kede moo kic dwoŋ iye meicel, dok ame obedo lobo me kwogo atek meicel kato lobo ocele ducu.

¹⁶Rik akwoŋo kwoŋ man pien gin onwoŋo okwero lubo gin ame onwoŋo acikogi ni otim, kun daŋ mom olubo cikka, dok obalogu nino me cabit ame onwoŋo aciko ni gin ogwoki. Gin gigi omedde ameda i maro cal jogi ame onwoŋo gin oworo.

¹⁷Kadi bed onwoŋo akwoŋo akwoŋa, cite pwod dok awekogi, mom ajwerogi, mom amio wigi ogik oko i tim.

¹⁸“Dok ate medde kobo baŋ itinogi i tim kuno ni myero kur olub cik ame yam kwarigi oketo; kur olub kitegi, dok daŋ myero kur olille i woro cal jogi.

¹⁹Akobbigi ni an a Rwot en abedo Obaŋagi, myero gin olub cikka, kun ogwokere i lubo gin ame an aciko ni myero gin otim.

²⁰Dok myero ogwok cabit obed nino acil, me bed acalo anyut ame tye i akina an kede gin, me gin oŋe ni an a Rwot en abedo Obaŋagi.

²¹“Cite itinogi daŋ te medde jem ajema i koma; mom obedo lubo cikka, dok daŋ mom obedo gwokere i lubo gin ame onwoŋo aciko, ame ka ŋat ogwoko twero bedo kwo. Aco cabit ame onwoŋo amiogi ni myero ogwok i, gin te bedo balo gigi abala. “En omio ate tamo ni myero aony akemona i komgi kede inigana daŋ i komgi i kare ame gin tye i tim kunu.

²²Cite mom ate ryeyo ciŋa me timo gin ame atamo ni myero atimmono, pien mannono onwoŋo twero miyo nyiŋa balle i akina orok, ame onwoŋo onena i kare ame akwanyogi i lobo me Miciri.

²³Medo i mannono, rik daŋ akwoŋo baŋgi akwoŋa i tim kunnono ni mannono abino keketogi oko i akina rok apapat, kun aterogi i lobo apapat.

²⁴Rik akwoŋo kwoŋ man pien gin okwero lubo cikka, dok daŋ okwero tiyo gin ame onwoŋo an aciko, dok obalo-gu nino me cabit ame onwoŋo aciko ni myero ogwok i, gin gigi omedde ameda i maro cal jogi ame onwoŋo papagi woro.

²⁵Mede dok i kom mannono, rik dok ate miyogi cikkogo a mom beco, ate cikogi daŋ me tiyo gigi mogo ame mom twero miyogi obedo kwo.

²⁶Amiogi oballe kengi i mot ame gin omio, kun amiogi oyalo cal jogi-nono itino awobegi me kao, acalo mot awaŋa. Atimo man me miyogi bedo i lworo adwoŋ meicel kede pi keto can i komgi; me gin oŋe ni an en ame abedo Rwot.

²⁷“Pi mannono ba, yin wot a dano, myero ikob kop man ame Rwot Obaŋa okobo baŋ jo Icrael: Man dok yo ocele ame kwariwu yam onywara kede, kun obedo timo kede tim me erupe i koma.

²⁸Pien i kare ame akelogi i lobo ame rik akwoŋo ni abino miyogi, ka waŋgi ocop i lobo moro ame obedo kidikidi onyo yattoro ame pote obuŋere meicel, gin oloko kaci-naca doko ka miyo motgi. Gin omio akemo bedo maka pi motgi me awaŋa ame gin owaŋo karacel kede mot amata ame gin obedo onyo kuno.

²⁹An apenyogi ni, ‘Kabedo mene ame obedo kidikidi ame iwoto wunu iye nono? Mannono en omio olwoŋo nyiŋ kabedo-nono ni Bama naka atot tin.’

³⁰Aman yin doŋ myero ikob baŋ jo me ot Icrael kop man ame Rwot Obaŋa okobo. Wun daŋ pwod imito timo wunu kit bal ame kwarowu obedo timo? Ibino medde lile wunu kenwu kun iworo wunu cal jogi kede timo gigi mogo me kwer.

³¹Ka ce itye ka miyo motwu, kun iyalo wunu cal jogi itino awobewu acalo mot awaŋa, nwoŋo itye ka lille wunu kenwu i cal jogi ame iworo wunu nono tuno kede naka tin. Wun jo Icrael itamo ni pwod dok ibino medde wunu penyo kop i baŋa? Kite acalo an Rwot Obaŋa atye kwo-ni, mom gire ibino medde wunu penyo ginnoro i baŋa.

³²“Gin ame iyiko wunu me timo i cunywu mom gire bino timere, en tam ame itye ka tamo wunu ni wun daŋ myero ibed wunu i rok ocele, acalo atekere ame tye i lobo apapat kun iworo wunu yen kede gweŋe.

³³“Kite acalo an Rwot Obaŋa atye kwo-ni, ateteni, an gire abino bedo abakawu. Man bino cobere i ciŋa atek ame abino ryeyo i komwu kede akemo agwa ame abino coro i komwu.

³⁴Abino kwanyowu oko i akina rok ocele kun acokowu i lobo apapat ame ikeketa wunu iye i ciŋa atek ame aryeo kede akemo ame atye ka coro i kom jo.

³⁵Abino terowu i tim a rok ocele, i kare ame atye kedwu kuno, abino cako ŋolliwu kop waŋ i waŋ.

³⁶Kite ame rik aŋolli kwarowu kop i tim i lobo me Miciri, mannono daŋ en kite ame abino ŋolliwu kede kop. Man kop ame an Rwot Obaŋa akobo.

³⁷Abino miyowu ibeo wunu i te abiro kun ibeo wunu acel acel.

³⁸Abino dwoko jo ame jem oko i akinawu kede jo ame timo bal i nyima; abino kwanyogi oko i lobo ame gin otye iye acalo wele, cite gin mom obino tuno i lobo me Icrael, mannono bino miyowu iŋeo wunu ni an a Rwot.

³⁹“Aco wun jo me ot Icrael, Rwot Obaŋa okobo kop man baŋwu. Ka ce wun mom iye winyo wunu koppa, cakere aman wot kede anyim myero ŋat acel acel wot wor cal jogi mere, ento nyiŋa acil wun mom ibino balo wunu kede motwu ame iyalo wunu i cal jogi.

⁴⁰“Pien i wi kidina acil, ame en kidi me Icrael abor meicel, jo me ot Icrael luŋ, bino wora i lobo-naca. Gin luŋ aluŋa obino wora kuno. An abino jologi kuno, kuno en ame abino mito ni wun imi wunu ginnoro baŋa, kun imio wunu mot ame iyero wunu ayera, dok daŋ ame obedo mot acil.

⁴¹Mot a ŋwece kur me kweyo cunya, en ame ibino miya wunu i kare ame akwanyowu i akina orok kun acokowu i lobo apapat ame ikeketa wunu iye. Abino miyo ineno wunu ni an abedo Obaŋa acil i akina rok ocele kuno.

⁴²Mannono bino miyo iŋeo wunu ni an a Rwot, i kare ame doŋ akelowu i lobo me Icrael, ame en lobo ame rik akwoŋo pire baŋ kwariwu.

⁴³I kare ame itye wunu kuno, ibino poyo wunu kitewu, kede ginnoro luŋ ame ibedo timo wunu, kun ibala wunu kede komwu kenwu. Cunywu bino cwer pi gin arac luŋ ame ibedo timo wunu.

⁴⁴Ibino ŋeyo wunu ni an a Rwot ka ce atio kedwu kun aparo pi nyiŋa, kun mom alubo kitewu areco, onyo timwu a mom beco, wun jo Icrael. Man kop ame Rwot Obaŋa okobo.”

⁴⁵Rwot dok te kop keda, kun kobo ni,

⁴⁶“Wot a dano we, koŋ icik waŋi inen tutuŋ anyarolum eka ite rabo kop i kom tutuŋ anyarolum.

⁴⁷Kobbi buŋ me Negeb ame tye i lobo ame tye tutuŋ anyarolum, ni myero owiny kop ame Rwot Obaŋa okobo: ‘Nen ba, abino cwinyo mac i komi te waŋo yen adyaka luŋ ame tye baŋi, kun waŋo daŋ yen otwo luŋ, maccono bino lyel nakanaka ame mom oromo neko, te wawaŋo nyim jo luŋ, cakere i tutuŋ anyarolum tuno kede tutuŋ anyarodi.

⁴⁸Jo luŋ aluŋa bino ŋeyo ni an Rwot en ame acwinyo maccono. Ŋattoro mom bino neko maccono kadi acel.’ ”

⁴⁹An ate gamo kop a Rwot ni, “Ama Obaŋa, jo luŋ tye ka kobo ni, an kare ducu akobbigi kop kun adupo adupa.”