Read lango Ejekeri 21 Bible Online

Ejekeri 21 - lango bible

Ejekeri 21

¹Rwot rik te kop keda, kun kobo ni,

²“Wot a dano we, cik waŋi inen tutuŋ Jerucalem. Rab kop i kom kabedo luŋ acil ame gin woro iye Obaŋa. Kwenyoro lobo me Icrael.

³Kobbi jo ni an a Rwot atye ka kobo kop man, ni, ‘Nen ba, an atye i kop i komwu, abino woto pala lwennya oko iyi akure mere, ate ŋoŋolo jo luŋ ame tye i akinawu, jo a kitegi atira, karacel kede jo areco.

⁴Pi mannono abino woto pala lwennya iyi akure ate cako ŋoŋolo i jo luŋ, jo a kitegi atira kede jo a kitegi reco, kun acako i tutuŋ anyarolum tuno kede naka tutuŋ anyarodi.

⁵Jo luŋ bino ŋeyo ni an a Rwot doŋ atyeko woto palana oko iyi akure, mom dok abino rwako bedo iyi akure kadi acel.

⁶“Wot a dano we, om weo atut meicel ame itaoni amito yec ayeca pi cwercuny, kun gin jo-nono otye onenni.

⁷Ka ce gin openyi ni, ‘Pino kara iomo twon weo arac meicellono?’ yin ibino kobbigi ni, ‘Pien tye amut ame awinyo i kom gin ame bino timere. Ka ce gin ame bino timere-nono kare mere doŋ otuno, cuny ŋat acel acel bino doko agoro oko, ciŋ jo luŋ daŋ bino doko agoro oko, teko bino rwenyo oko i cuny dano acel acel. Coŋ jo luŋ bino myel amyela. Nen ba, kare-nono doŋ otuno oko, ginnoro gire doŋ bino timmere.’ ” Man kop ame Rwot Obaŋa okobo.

⁸Rwot dok te kobba ni,

⁹“Wot a dano we, rab kop, me ikobbi jo kop ame an Rwot Obaŋa akobo: Pala lweny, otye ka rabo pala lweny, otye ka jwayo lebe meicel,

¹⁰otye ka rabo me neko jo, otye ka jwayo lebe me mimila bala lutkot! Mom tye ŋattoro ame twero geno kadi acel. Wun doŋ ityeko cayo wunu abiro oko, kede ginnoro luŋ ame otio i yat.

¹¹Mannono en omio doŋ otye ka jwayo leb pala lweny, me doŋ cak tic kede, Otye ka rabo lebe kede jwayo me ote miyo baŋ anek jo.

¹²Wot a dano we, cak ba koko dok ikomi pi jona. Pien kop man otiko rwode luŋ me Icrael, gin luŋ karacel kede jona doŋ otyeko miyogi oko me aneka i pala, Pi mannono myero doŋ ibabapo amuroni ba,

¹³Pien otye ka temowu kara ŋo ame myero en doŋ tim, pien wun itye ko cayo wunu abiro oko.” Man kop ame Rwot okobo.

¹⁴“Pi mannono ba, wot a dano, myero irab kop acalo adwarpiny, eka ite bapo ciŋi me wek pala lweny me neko jo ame myero to bino doŋ piny me neko jo, kun bedo bino kare i kare. Pala lwennyere iyiliyili meicel dok bino neko jo atek meicel.

¹⁵Pala lwennyono bino miyo jona nyobere oko, eka jo apol te ŋoye piny i dogcelgi luŋ aluŋa. An doŋ atyeko miyo pala lweny ame meny amenya. Nen ba, otio pala lwennyono ame meny calo lutkot, dok otyeko jwayo lebe me neko joo

¹⁶Cak doŋ ŋoŋolo jo oko, ŋoŋolo jo ame tye tuŋ cem kede en ame tye tuŋ cam, kannoro luŋ ame icoro.

¹⁷An daŋ abino bapo ciŋa, akemona doŋ te cako kwe. An Rwot ikokome en ame akobo-nono.”

¹⁸Rwot dok te kop keda kun kobo ni,

¹⁹“Wot a dano we, ket alama moro ame nyuto yo aryo, ame abaka me Babulon twero bino kede pala lwennyere. Gin aryo luŋ obino ya i lobo acel. Ket dok alama moro ame cimo yo, ket kan ame yo okaro iye me wot i boma.

²⁰Alama acel bino nyuto yo ame woto i boma a jo Ammon ame olwoŋo ni Raba, alama ocele bino nyuto yo ame woto i Juda naka i boma me Jerucalem ame ocecelo atek wok-ki.

²¹Pien abaka me Babulon ocuŋ kan ame yo okaro iye, i agikki kan ame yo aryo-nu okaro iye, me tiyo tic me tyettere kuno. En tye ka yeyeŋo atero mege, dok tye ka penyo kop i baŋ jok ame olwoŋo ni Terapim, dok daŋ tye ka ŋiŋio emany.

²²Kwir a jo Jerucalem tye abino i ciŋe tutuŋ cem, kun tye ka kobbe ni myero ewot egur ikoŋŋogo a wigi oluk i dogcel luŋ me boma, dok etor lobo eyid egur cel oko, dok eger apama cel ame ocuŋ malo iguŋ egur boma oko, kun eŋamo doge ekok, dok eredo i dwon aloŋo.

²³Cite jo me Jerucalem mom bino ye, kun otamo ni man tyet me goba. Man gin obino timo pi kwoŋ ame gin doŋ otyeko kwoŋere kede. Cite bino poyo wigi i kom balgi, dok bino nyuttigi ni obino makogi.

²⁴“Mannono omio Rwot Obaŋa okobo ni, Pien imio otye ka poyo balwu, pien bal ame itye ka timo wunu mom twero kanne kadi acel ame omio ginnoro luŋ ame itye ka timo wunu balwu nen oko kannaler. Man omio wun doŋ itye wunu jo ame kop oloo, daŋ doŋ abino jalowu oko i ciŋ okwor.

²⁵Aco wun otim tim areco ame pwod idoŋ wunu, karacel kede rwode me Icrael, kare me keto can i komwu tyen me agikki, ene doŋ otum oko.

²⁶Man kop ame an Rwot akobo, Kwany wunu tok kwogo oko i wiwu, karacel kede itambara ame idwodwalo i wiwu. Mom tye ginnoro kadi acel ame bino bedo kite ame aman tye kede-ni. Loc ame oloo kede ocan, wegi loc obino dwogo oko piny.

²⁷Abino babalo, abino babalo, abino balo boma gira oko. Cite mannono mom ru bino timere kadi acel, tuno waŋ ame ŋat ame doŋ amio twer me timo mannono doŋ abino.

²⁸“Yin wot a dano we, myero irab kop, kun ikobo kop ame an Rwot Obaŋa atye ka kobo ni, kun akobo i kom jo me Ammon, kite ame gin tye ka nywaro kede jona Icrael. Kobbigi ni, ‘Pala me lweny doŋ otyeko woto oko me nekogi, otyeko jwayo lebe ame tye ka meny amenya, tye ka memenya calo lutkot.

²⁹Kobbi jo Ammon ni, anyut ame gin otye ka neno-nono, obedo anyut me goba, dok kop ame otye ka tittigi i kop me anyim daŋ obedo kop me goba. Gin obedo otim tim areco ame karegi tye abino me keto can i komgi tyen me agikki mere. Pala lweny ceggi gudo ŋutgi.

³⁰Dwok wunu pala lweny cen, rwak wunu pala lweny iyi akure mere. An abino ŋolliwu kop i lobo ame rik oketowu iye, i lobo ame rik onywalowu iye.

³¹Abino coro akemona i komwu kuno, ame mac me akemona bino kuto i komwu, eka ate miyowu i ciŋ jo ame ger meicel, dok ame odiro meicel i neko jo.

³²Ibino doko wunu yen me awaŋa i mac, Remowu obino onyo piny i lobowu ikokome, wi jo luŋ te wil oko i komwu atwal, kun mom tye ŋattoro kadi acel ame dok po pirwu, Man kop ame Rwot ikokome okobo.’ ”