Read lango Ejekeri 22 Bible Online

Ejekeri 22 - lango bible

Ejekeri 22

¹Medo i kom mannono, Rwot rik dok te medo kop keda, kun kobo ni,

²“Yin wot a dano we, iyikere me ŋolo kop i kom boma ame remo a jo oonyo iye wok-ki? Koŋ doŋ itittigi ginnoro luŋ areco me kwer ame gin obedo timo.

³Tittigi kop man ame an Rwot Obaŋa atye ka kobo ni, ‘Pien i onyo wunu remo a jowu apol meicel, dok daŋ pien iballe wunu oko pi woro cal jogi, mannono omio karewu wun daŋ tye doŋ abino.

⁴Bal me remo ame ionyo wunu doŋ tye i komwu, dok daŋ pi woro cal jogi ame wun en ame ipao wunu, omio daŋ ijebere wunu oko. Karewu daŋ doŋ tye ceggi acega, mwaka ame doŋ otyeko moko oko pirwu, doŋ otyeko tuno oko. Mannono omio amio rok apapat ame tye i lobo ocele tye ka cayowu kun oyetowu ayeta.

⁵Jo ame tye kan aceggi kede jo ame tye kannabor, bino yetowu wun jo ame nyiŋwu doŋ oballe pi bedo timo tim areco ame yiwu mito.

⁶“ ‘Nen ba, rwode luŋ me Icrael ame tye i akinawu, ŋat acel acel tio kede twer ame omie me onyo ka remo a joo

⁷Jo luŋ aluŋa tye doŋ acayo pappagi kede totogi acaa. Orok ame bedo i akinawu otye ka wunogi meicel, karacel kede itino kic kede mon a coggi oto.

⁸Jami luŋ acil tye pira, itye wunu doŋ ka cayo acaa, dok ceŋ cabit ame otyeko yiko me wora, daŋ doŋ ibala wunu oko.

⁹I akinawu, tye jo ame coko dog owotegi pi onyo remo, jo ocele tye camo cam ame oyalo i cal jogi malo i ka woro jogi, eka te tye jo ocele ame gin ocobo ka mitgi areco keken.

¹⁰Tye jo ocele i akinawu ame buto i ci-papagi kede jo ocele tye buta i mon ame tye i two dwe kun omako daŋ tetek.

¹¹Jo ocele timo tim me kwer me buto i mon owotegi, kun jo ocele buto anyira a dyeregi. Jo ocele i akinawu buto kom amegogi ame onywale kede, amegogi me papo.

¹²Jo ocele i akinawu gamo lim i muŋ pi onyo remo a joo jo ocele i akinawu ŋolo ni myero migi agoba i kom lim ame omio jo Icrael wadgi koporo, kun otye ka i mit me lony keken. Mom doŋ oparo pira kadi acel, man kop ame Rwot okobo.

¹³“ ‘Nen ba, mannono omio abino bapo ciŋa pi timwu me mayo jo pi nwoŋo agoba i yore a mom ber kadi acel, ame itye ka nwoŋo wunu kede i timwu me onyo remo a jo ame itye ka timo wunu.

¹⁴Itamo ni pwod ibino diyo wunu cunywu, onyo ibino timo wunu i teko me tiŋo ciŋwu malo i kare ame abino cako tic i komwu? An Rwot doŋ atyeko kobo, daŋ abino cobo.

¹⁵Abino keketowu atata i akina rok ocele, ite lal wunu i lobo apapat, ate miyo timwu areco-nono gik oko.

¹⁶Mannono bino miyo nyiŋa bale i akina rok ocele, cite wun i komwu ibino ŋeyo wunu ni ana a Rwot.’ ”

¹⁷Rwot dok te kop keda, kun kobo ni,

¹⁸“Wot a dano we, jo me ot Icrael doŋ calo cet lela i tuŋ baŋa. Ocalo doŋ ryal, kede mola abati kede nyonyo kede ricac ame orubo, ame oweko odoŋ i kare ame doŋ otyeko liyo acillere oko, otye doŋ acalo cete i keno me tet.

¹⁹Mannono omio an Rwot Obaŋa atye ka kobbigi kop man. Pien doŋ idoŋ wunu acalo cete, mannono omio doŋ abino cokowu i dye boma me Jerucalem.

²⁰Kite ame dano coko kede ryal, kede mola, kede nyonyo kede ricac, kede abati i keno me tet, me wek ekut mac me meyogi, mannono en kite ame abino timowu kede, kun acokowu i twon akemo kede iniga, ate ketowu kuno, ate meyowu oko.

²¹Abino cokowu i Jerucalem, ate kuto mac i terwu, ate miyo akemona meyowu oko.

²²Abino meyogi oko i Jerucalem kite ame omeo kede nyonyo i keno me tet. Mannono bino miyo gin oŋeo ni an a Rwot en ame acoro akemona i komgi-nono.”

²³Rwot dok te kop keda, kun kobo ni,

²⁴“Wot a dano we, kobbi jo Icrael ni gin otye acalo lobo ame mom cil, onyo kot ame cwe i kare ame akemo tye.

²⁵Rwodegi ame tye i akinagi calo eŋatu ame tye ka mor i koko, kun leyi ame oneko tye i nyimgi. Gin otye ka neko jo, dok daŋ omao lonyo a jo ame okano kede gigi mogo me wel, dok daŋ pi nek ame gin otye ka neko kede jo omio mon a coggi oto odoŋ apol meicel i akinagi.

²⁶Olamdog ame tye iye otye ka turo cikka pi timo tim me byemi byemi, kun mom otye kede woro moro kadi acel i kom jamina acil. Mom oŋeo poko gin acil kede gin ame mom cil, dok daŋ mom otye ka pwonyo kop i kom gin ame cik ogeŋo kede en a cik mom ogeŋo, mom daŋ doŋ oparo pi cabit kadi acel. Tim ame gin tye ka timo-nono omio jo Icrael mom doŋ wora kadi acel.

²⁷Rwode luŋ ame tye i Jerucalem orom aroma kede epet ame tye ka kikilo leyi ame gin oneko me acamagi, otye ka onyo remo a jo, kun oneko jo pi mito doko olonyo.

²⁸Odwarpiny ame tye iye tye ka wumo kodi ballono luŋ calo ŋat ame opuo kor apama oko kede coka atar. Otye ka neno anyuttogo me gobagoba, dok daŋ otyeko kop i kom gin ame abino timere gobagoba, kun okobo ni, Rwot Obaŋa okobo ni, kun nwoŋo Rwot gire mom okobbigi kopporo.

²⁹Jo luŋ ame bedo i lobo, otye ka timo tim me cero jo kede yako jo. Otye ka wuno jo ame ocan kede jo ame mito akonya, karacel kede orok ame bedo i akinagi kun mom oparo pirgi kadi acel.

³⁰Abedo yenyo dano moro i akinagi ame myero ger apama cel, kede tiro kan ame omuko, me atot ya lar lobo ka akemo omaka ame amito tyeko oko, atot ya awekgi, cite ŋattoro mom twero nen kadi acel.

³¹Mannono omio acoro akemona i komgi, amio mac me akemona onekogi oko; mannono atimo pi bal ame gin otimo, Man kop ame Rwot Obaŋa okobo.”