Read lango Ejekeri 23 Bible Online

Ejekeri 23 - lango bible

Ejekeri 23

²“Wot a dano we, tye mon aryo ame totogi acel,

³ame gin luŋ otimo tim me alaya i Miciri; gin ocako bedo olaya i kare ame gin pwod anyira atino, omio co obedo jejebo tunogi oko, ote daŋ cako ŋeye oko kede co, kun mom ru onyomere.

⁴Nyako adwoŋ rik nyiŋe Okola, eka nyako atidi nyine te bedo Okoliaba. An rik ate nyomo gin luŋ, ote nywalo awobe kede anyira. Aco kop i kom nyiŋgi Okola rik nyine ocuŋ pi Camaria, eka Okoliaba te cuŋ pi Jerucalem.

⁵“Okoliaba omedde bedo alaya kun daŋ en tye acalo cega, en onwoŋo maro coge twatwal ame obedo jo Acuria,

⁶ocirikale ame rukoboŋo obedo amaramar, oloc adoŋo kede otel wi mony; joni luŋ rik obedo awobe ame pwod tino, ame mwonya meicel, dok daŋ gin luŋ rik orino kede aguragura.

⁷En dakona-ni rik gire ojalle i ciŋ joni pi timo tim me alaya alaya, ame jo-ni luŋ obedo jo ame oyero ayera me Acuria. En daŋ rik te lille oko i cal jogi a ŋat acel acel ame en maro.

⁸En mom oye weko timmere me alaya-nono, ame en obedo timo con i kare ame en pwod tye i Miciri, pien i kare ame en pwod tidi, co obedo buto kede te bale doŋ oko acalo nyako, kun obuto kede acalo alaya me cobo mitgi.

⁹Mannono omio ate jalle doŋ oko i ciŋ jo Acuria ame obedo coge ame en rik maro.

¹⁰Mannono omio gin te gonyo boŋo i kome oko te weke doŋ onoro, ote mako awobe mere kede anyira mere neko oko i pala lweny. Mannono te doko kop me aboka i akina mon, i kare ame doŋ otyeko ŋolle kop oko.

¹¹“Aminnere Okolaba oneno gin man ame otimere i kome, cite en onwoŋo dok rac meicel ame kato aminnere-naca oko i timmere me maro co ocele kede tim me alaya alaya. En dok te medde bedo arac ame kato aminnere oko.

¹²En te medde maro jo Acuria, oloc adoŋo ame loo dul apapat, odoŋe ame telo mony, ocirikale ame orukere oko i jami me lweny, wegi aguragura ame gin obedo awobe ame nen amwonya meicel.

¹³An ate neno ni en daŋ doŋ otyeko bale oko, en daŋ dok tye ka lubo yo ocele ame aminnere onwoŋo tye ka lubo.

¹⁴“Cite en dok obedo medde ameda i tim me alaya, kun neno anaka cal co ame ogogo i kor ot, kede cal a jo Kaldaya ame opuo komgi i raŋi arema,

¹⁵kun daŋ otweo pyergi kede del, dok daŋ oboo wigi oko kede itambara aboco me boyo wic. Gin luŋ obedo cal jo ame tye i rwom me tic amalo; mannono onwoŋo obedo cal a jo Babulon, ame lobogi ikokome obedo lobo me Kaldaya.

¹⁶I kare ame en onenogi, cunye te cako myel amyela pirgi, te cwayo kwena baŋgi i Kaldaya.

¹⁷Jo me Babulon te bino cako buto kede, ote bale oko i timo tim me abor ame gin obedo timo i kome. I kare ame gin doŋ otyeko bale oko, en te ya i baŋgi kun cunye doŋ mom ber kadi acel.

¹⁸Kare ame en dok omedde timo tim me alaya alaya kannaler kun daŋ doŋ bedo onoro aboŋo boŋo i kome, an daŋ cunya te ya oko i kome doŋ, kite ame rik cunya oya kede i kom aminnere.

¹⁹Cite en gire pwod te medde i timmere me alaya alaya, kun wie mom wil i kom gin ame ebedo timo i kare ame pwod enyako, i tim me alaya ame en obedo timo i kare ame en pwod tye i Miciri.

²⁰Cunye te bedo medde myel amyela i kom co ame emaro ame onwoŋo tye kuno ame komgi me co onwoŋo rom aroma i me akana, dok remogi me co onwoŋo rom aroma i me aguragura.

²¹Mannono en kite ame yin Okolaba ibedo bedo kede mit me carocaro ame ibedo timo ame pwod i nyako, i kare ame jo me Miciri bedo mumulo kede kori ote jebo tunoni oko kun onwoŋo pwod ogulo agula.

²²“Doŋ pi mannono ba, yin Okoliaba, man en kop ame Rwot Obaŋa okobo i komi. Nen abino twarre i komi kede i kom cogi ame imaro, ame rik iya i baŋgi kun cunyi oballe oko, abino kelogi i kabedo ducu me bino lweny i komi.

²³Abino kela cogi ame tye i Babulon kede en ame tye i Kaldaya luŋ, jo Pekod, jo Coa, jo Koa, kede jo Acuria ducu; ame gin luŋ obedo awobe abeco ame nen amwonya, oloc adoŋo ame loo dul mony apapat, odoŋe ame telo wi mony, kun gin luŋ ocirikale me lweny ame riŋo aguragura.

²⁴Gin luŋ obino bino i komi, kun obino i tutuŋ anyarodi, i gadigadi me lweny kede gadigadi me tiŋo jami, karacel kede mony adwoŋ meicel. Gin luŋ obino bino me lweny i komi kun oguri oko dyere, kun otye i kwot kede tok nyonyo, abino miyogi twer me ŋolo kop i komi i kite ame gin ŋolo kede kop.

²⁵Abino wiro akemona i komi me wek gin otimi cucu. Gin obino ŋolo wumi kede yiti luŋ, icennere ote doŋ neki oko kede pala lweny. Dok ote mako awobeni kede anyirani ote waŋo oko akwo kede mac.

²⁶Gin bino gonyo boŋo oko i komi, ote kwanyo daŋ jamini luŋ me wel.

²⁷Mannono en kite ame abino giko kede timmi me alaya alaya kede timi me maro co atata ame ibino kede iya i loba me Miciri. Mom dok ibino neno jo Miciri kadi acel, dok wii daŋ bino wil oko i komgi atwal.”

²⁸Rwot Obaŋa okobo ni, “Nen ba, abino miyi i ciŋ jo ame yin idago, i ciŋ jo ame rik i baŋgi ame cunyi oballe oko.

²⁹Gin bino timmi lit, pien gin odagi ote gamo giri moro luŋ ame ibedo yelle tic pire, ote daŋ gamo boŋoni oko ote weki doŋ onoro, kun komi me mon ame ibedo timo kede tim me alaya alaya doŋ nen kannaler. Timmi me carocaro kede timmi me alaya alaya,

³⁰en ame omio man tye ka timere i komi, pien ibedo timo tim me alaya alaya i rok ocele, kun daŋ iballe oko pi woro cal jogigi.

³¹Yin ibedo lubo kite ame aminni obedo timo; mannono omio abino keto can ame aketo i kome i komi.”

³²Rwot Obaŋa okobo ni, “Ibino mato ikopo ame aminni omato, ikopo-nono obedo twon ikopo ame lac dok daŋ yie tut meicel. Jo bino nyeri kun daŋ ocai meicel, pien ikoponi Opoŋ apoŋa ni kwic.

³³Cwercuny bino meri oko, pien ikopo aminni Camaria obedo ikopo ame mio jo lworo, dok ame tyeko jo atyeka,

³⁴Ibino mato gin ame tye iyie ityeko oko luŋ, eka ite puputo yer wi oko ducu ite ŋolo tunoni oko i kori, Pien an a Rwot Obaŋa doŋ atyeko kobo kop man.”

³⁵Pi mannono Rwot Obaŋa okobo ni, “Pien wi doŋ owil oko i koma, dok daŋ ityekobola oko i ŋei, yin myero doŋ ikany gin ame obino i komi pi timmi me carocaro kede me alaya alaya.”

³⁶Rwot dok te kobba ni, “Wot a dano we, itwero doŋ cako ŋolo kop i kom Okola kede Okoliaba, tittigi ginnoro luŋ areco me kwer ame gin obedo timo.

³⁷Pien gin obedo cot, dok remo a jo omwonne amwona i ciŋgi, gin obedo timo abor i cal jogigi, dok daŋ oyalo cal jogi-nono itinogi awobe ame gin onywalo baŋa.

³⁸Medo i kom mannono, gin dok otimo tim magi i koma: Obalo kabedo acil me wora i nino acellono, kun daŋ obalo nino me cabit ame aciko ni myero gin ogwoki.

³⁹Pien ka gin otyeko yalo itino awobegi kede cal jogi, kun oneko acalo mot me awaŋa, i nino acel ame gin oneko iye awobegi-nono, en ame gin dok obino iye i kabedo acil ame owora iye me bino balo, Man en gin ame gin obedo timo i ot me wora,

⁴⁰Dok daŋ ocwao okwena me lwoŋo jo ame tye kannabor, jo ame gin olwoŋo-nono daŋ te bino, Yin ilwoko komi oko acil pirgi, ite daŋ wiro waŋi kede moo, eka ite rukoboŋo me kwogo meicel i komi pirgi.

⁴¹Ite bedo iwi tanda me kwogo meicel, kun meja daŋ tye kannono ame opeto itambara iwie, ame oketo iye odok aŋwece kur ame obedo mega karacel kede moo.

⁴²Woo a jo ame bedo gigi ata kun mom paro ginnoro onwoŋo winyere baŋe kuno, jo ame bedo woo-nono kun gin omero me nino ducu, ame okelogi itim ame otwo imek. Gin orio mola i ŋut ciŋ mon, kede tokkogo abeco i wiigi.”

⁴³An dok ate kobo ni, “Aman co mom doŋ tye ka timo tim me abor i twon dako ame alaya ame doŋ oti oko-ni?

⁴⁴Pien gin otye ka wot buta kede kite ame jo buto i mon ame olaya. Mannono en kite ame gin obedo wot kede baŋ Okola kede baŋ Okoliaba me timo tim me carocaro kede.

⁴⁵Ento jo ame kitegi atira bino ŋolligi kop, gin mon ame bedo cot, kede mon ame tye ka neko jo, pien gin ocodo cot dok remo a jo tye omwonne amwona i ciŋgi.”

⁴⁶Pien Rwot Obaŋa okobo ni, “Kel mony adwoŋ meicel i komgi me imigi odok gin ame jo lworo kede gi-ayaka a jo.

⁴⁷Mony bino cecelogi kede gweŋe, dok daŋ bino totoŋogi kede pala lweny; gin bino neko awobegi kengi karacel kede anyiragi i pala lweny ote daŋ wawaŋo udigi kengi.

⁴⁸Mannono bino miyo agiko tim me carocaro oko i lobo, me wek mon luŋ nen gin ame otimere i komgi ote weko timo tim me carocaro, kite ame wun ibedo timo wunu.

⁴⁹Bal me tim me carocaro ame ibedo timo wunu bino dok i wiwu, ibino wunu kanyo can pi balwu me woro jogi, mannono bino miyo iŋeo wunu ni an a Rwot Obaŋa.”