Read lango Ejekeri 24 Bible Online

Ejekeri 24 - lango bible

Ejekeri 24

¹Rwot rik dok te kop keda i nino dwe apar me dwe me apar i mwaka me aboŋwen.

²En okobba ni, “Wot a dano we, co nyiŋ nino a tinni oko piny, co nyiŋ nine-ni ikokome. Abaka me Babulon otyeko guro Jerucalem oko i nino atin-ni.

³Kob kop man oko kannaler baŋ jo ame maro jemmi, kun ikobbigi i carokop i kom kop man ame Rwot Obaŋa okobo, ni, “Ket guluni i keno, ket gulu i keno, ony pii iyie;

⁴ket iye riŋo ame doŋ otyeko ŋoŋolo oko atitino, ket riŋo abeco-mege, riŋo amuru, kede riŋo me bade, bobolo daŋ iye cogo abeco ame iyero ayera, me poŋ gulu oko.

⁵Kwany riŋo romo aberrere i akina riŋo romo ocele mere, rwak yen i keno i te gulu, ted riŋo ame iketo iyi gulu-nono, karacel kede cogo ame daŋ ibobolo iye-nono.”

⁶Mannono omio Rwot Obaŋa okobo ni, “Can i wi boma ame obedo onyo remo a jo wok-ki, kede gulu ame nyali omako, ame nyali ikome mom romo kwanyere kadi acel. Kwany riŋo ame oŋiŋido atitino ame tye iye ni, kun ikwanyo acel acel, kwany ata kun mom iyero ayera.

⁷Pien remo a jo ame en obedo onyo pwod tye kuno, pien remo a jo ame en oneko oony naka i wii kiddi. En mom obedo neko jo kan ame remogi twero wumere oko kede kwoyo.

⁸En obedo timo man me tugo akemona, me acul kwor, mannono en omio amio remo a jo ame en obedo neko oonyo i wi kiddi kan ame mom romo wumere.”

⁹Mannono omio Rwot Obaŋa okobo kop man ni: “Can i wi boma ame obedo onyo remo a jo wok-ki! An en abino turo, an en abino mwodo yen me tedo ayido adwoŋ meicel.

¹⁰Kella wunu yen, kut wunu doŋ mac, ted wunu riŋo aber, ite onyo wunu pige oko me cogo mere en ame waŋ.

¹¹Ket wunu gulu ame yie nono i keno me bed alyet meicel, me moo iyie waŋ oko, dok cilo ame tye iye daŋ meye oko, nyali iye daŋ te tum oko.

¹²Abedo kom lolle nono, nyali ikome mac mom romo kwanyo kadi acel.

¹³Nyali ame tye iye-nono, rom aroma kede tim me carocaro ame ibedo timo wunu, Pien kono nyo doŋ ajwao cilo oko i komwu, cite cilo ikomwu anwoŋo ni mom romo kwanyere kadi acel, tuno ka aonyo akemona i komwu.

¹⁴An a Rwot doŋ atyeko kobo kop man; kop ame akobo-nono bino cobere, an ikoma abino timo. An mom abino dok cen kadi acel, dok daŋ mom abino koyo ŋattoro kadi acel, cunya mom bino ya i kom gin ame atyeko yiko, an gira abino ŋolliwu kop, kun alubo kitewu kede gin ame ibedo timo wunu, Man kop ame an Rwot Obaŋa akobo.”

¹⁵Rwot rik dok te kop keda, kun kobo ni,

¹⁶“Wot a dano we, nen ba, an doŋ aceggi kwanyo ŋat ame yomoro cunyi ame imaro neno wok-ki, abino kwanyo oko i baŋi a doŋ acel keken. Cite mom ibino kumo pire, mom ibino koko, dok pig waŋi mom bino ton piny kadi acel.

¹⁷Kur icur atek, cite myero icur momot meicel; myero kur ikum pi dano ame doŋ otyeko to oko. Twe itambarani me tweyo wic i wii, ruk amuki daŋ i tyeni, kur iwum dogi, kur daŋ icam kwon a jo ame tye ka kumo.”

¹⁸Mannono omio akobo kop baŋ lwak odiko con eka otyeno dakona te to oko. Idiko mere ocele, ate timo kite ame onwoŋo ocika kede.

¹⁹Jo te penya ni, “Mom itwero tittiwa te kop me gin ame yin itye ka timo-nono?”

²⁰An ate kobbigi ni, “Kop a Rwot, Rwot okobo keda kun kobo ni,

²¹‘Kobbi jo me ot Icrael, ni an Rwot Obaŋa akobo ni, abino balo kabedona acil oko, ame obedo kabedo ame onwoŋo iwakere wunu pire, ame cunywu yom iye ka ineno wunu, dok ame kwowu ocuŋ iye. Dok itinowu awobe kede anyira ame iweko wunu cen i ŋewu, obino neko oko i pala lweny.

²²Mannono bino miyo itimo wunu gin ame ineno wunu an atimo. Mom ibino miyo wunu dogwu, dok daŋ mom ibino camo wunu kwon ame jo akumo camo.

²³Boŋowu me adwala i wiwu bino bedo i wiwu, kun amukwu daŋ tye i tyenwu; mom ibino kumo wunu, akadi koko, ento balwu bino miyo igobere wunu oko, kun ŋat man cucura baŋ wadgi.

²⁴Mannono bino miyo an Ejekeri abedo anen baŋwu. Wun ibino timo wunu ginnoro luŋ ame an atimo. Mannono bino miyo iŋeo wunu ni, ka ce man otimere, bino miyo iŋeo wunu ni Rwot en ame obedo Obaŋa.’

²⁵“Doŋ yin wot a dano we, i nino ame abino kwanyo iye gigi atek ame gin ogeno, gin ame miogi yomcuny kede kwogo, ame yomoro cunygi ka gin oneno, dok ame cunygi tye iye, kun daŋ okwanyo awobegi kede anyiragi,

²⁶i nino-nono, dano moro obwot bino bino baŋi me kobbi amuttere.

²⁷I nino-nono dogi bino yabere me kop kede ŋat ame obwottono, te lebi doŋ te gony atwal, mom dok ite medde bedo ŋat ame mom kobo, Mannono bino miyo yin ibedo anen baŋgi: gin te ŋeyo ni an abedo Rwot.”