Read lango Ejekeri 25 Bible Online

Ejekeri 25 - lango bible

Ejekeri 25

¹Rwot okobo keda, kun kobo ni,

²“Wot a dano we, cak lokere tuŋ baŋ jo Ammon, me irab kop i komgi.

³Kobbi jo Ammon ni, Winy wunu kop man ame Rwot Obaŋa tye ka kobo; ‘Pien wun cunywu yom pi bale a oda acil, kede i kom lobo a jo Icrael kare ame onwoŋo oweko yie odoŋ nono calo wi obur, kede i kom jo me ot a Juda i kare ame gin doŋ oterogi oko iyi opii;

⁴Mannono omio an amiyowu oko i ciŋ jo ame tye tutuŋ kide, me gin lowu. Gin bino guro kemagi i akinawu i i lobowu kuno, ote bedo iye. Gin bino camo nyig yen ame ocek i potowu, kun daŋ omato cakwu.

⁵Abino miyo Raba doko bar me kwayo inaga karacel kede boma a jo Ammon luŋ, doko ka buto a rommi kede dyegi. Mannono bino miyo iŋeo wunu ni an a Rwot an Rwot akobo.’

⁶“Man en kop ame Rwot Obaŋa tye akobo, ‘Pien itye ka bapo ciŋwu kun ipyepyea wunu i yomcuny, ame icao wunu kede lobo a jo Icrael,

⁷pi mannono ba, an doŋ atyeko ryeyo ciŋa i komwu, abino miyowu oko i ciŋ rok ocele acalo gin me ayakagi. Abino miyo waŋwu rwenyo oko i akina rok ocele, kun ito wunu oko i wi lobo, Abino jwerowu oko odoco. Mannono bino miyo iŋeo wunu ni an a Rwot.’ ”

⁸Rwot Obaŋa okobo ni, “Pien jo Moab tye ka kobo ni jo me ot a Juda rom aroma kede rok ocele mere,

⁹mannono omio ocobo mony i kom boma mogo ame tye i tuŋ nyime ame tye daŋ acalo boma ame mio en bedo kede kwogo, kun omedo kede boma me Betjecimot, Baa-Imeon kede me Kiriataim.

¹⁰Abino miyogi luŋ medo kede jo Ammon i ciŋ rok ame tye tutuŋ kide; gin bino loyogi, eka mom dok ote medo po i komgi i akina rok apapat,

¹¹dok abino ŋolo kop i kom Moab, Mannono bino miyogi oŋeo ni an a Rwot.”

¹²Rwot Obaŋa okobo keda ni, “Pien jo Edom oculo kwor i kom jo me ot a Juda agwa meicel, ame omio culo kworgi-nono okelo bal i wigi ame mom twero ya,

¹³mannono omio Rwot Obaŋa okobo ni ebino ryeyo ciŋe i kom Edom, ete neko jo luŋ karacel kede leyi ame tye kuno, Abino miyo lobo me Edom doŋ nono acalo wi obur, cakere i boma me Teman tuno kede i boma me Dedan; obino neko jo iye i pala lweny.

¹⁴Jona Icrael en ame bino culo kwor i kom Edom pira, gin bino timo jo Edom lit kite ame akemona olyeto kede. Jo Edom bino ŋeyo kite ame culo kworra rac kede. Man kop ame an Rwot Obaŋa akobo.”

¹⁵Rwot Obaŋa okobo ni, “Pien jo Piriciti oculo kwor i kom jogi agwa meicel, kun onekogi i twon keccuny okato kare, pi adage ame obedo bedo i akinagi kare luŋ,

¹⁶mannono omio Rwot Obaŋa okobo ni, ‘Nen ba, abino ryeyo ciŋa i kom jo Piriciti, ate miyo waŋ jo luŋ ame onwoŋo bedo kuno rwenyo oko i bar me Piriciti, ate daŋ dok neko jo luŋ ame onwoŋo bedo i dog nam.

¹⁷Abino culo kwor i komgi agwa meicel kun agoogi i twon akemo okato kare. Mannono bino miyo gin oŋeo ni an a Rwot, i kare ame doŋ atyeko culo kwor i komgi.’ ”