Read lango Ejekeri 26 Bible Online

Ejekeri 26 - lango bible

Ejekeri 26

¹I nino dwe acel me dwe moro ame tye i mwaka me apar wie acel, Rwot okobo keda, kun kobo ni,

²“Wot a dano we, pien jo Turo tye ka lelo i yomcuny i kom Jerucalem, kun oredo ni, ‘Koŋ ineno wunu dogcel a jo Icrael doŋ oturo oko, tye doŋ twolo pira, mannono bino miyowa dok odoko olonyo pien Jerucalem doŋ odoko wii obur’,

³mannono omio Rwot Obaŋa okobo ni, Nen ba, an cunya mom yom kadi acel i komi, yin Turo, abino kelo rok apol meicel i komi, kite ame pii i nam yenyo kede bwo.

⁴Gin rokkono bino balo apama cel me Turo oko, ote daŋ rereto gedo mere ocuŋ iguŋ malo oko piny. Lobo ame ceko cem abino keketo lobo aber iye oko doŋ ka gweŋ keken i lobo me Turo.

⁵Turo doŋ bino bedo i dye nam, bino bedo kan ame ocik rec moo iye boogi. Man kop ame an Rwot Obaŋa doŋ atyeko kobo. Turo bino doko kabedo me ayaka a rok ocele.

⁶Anyira mere ame tye i lobo a mom tye i dog nam, obino neko oko i pala lweny. Mannono bino miyogi oŋeo ni an a Rwot.”

⁷Rwot Obaŋa okobo ni, “Nen ba, abino kelo abaka moro ame loo obakki ocele ducu i kom Turo, abaka ame tye tutuŋ anyarodi, Nebukadnejar, ame obedo abaka me Babulon, kun en bino aguragura kede gadigadi, kede oryem aguragura, karacel kede lwak mony adwoŋ meicel.

⁸En bino neko anyirawu ame bedo i lobo a mom tye i dog nam i pala lweny, bino toro apama cel guro kede Turo oko, te toro lobo daŋ yido gurowu kede, ote tiyo kwode daŋ apol ata me kurowu.

⁹En bino nanapo apama celwu oko i twon ikoŋŋogo ame wigi aluktu, te daŋ rereto wudigi oko ame ocuŋ iguŋ malo, kun totoŋo kede le.

¹⁰Aguragura mere bino bedo apol meicel ame bino miyo apua me kan ame gin obeo iye, wumi oko, Redo oryem aguragura kede gadigadi me yeyo ter, kede gadigadi lweny, bino miyo apama me celli yeŋere, i kare ame gin bino donyo i dogcel luŋ me bomani, acalo boma ame doŋ otyeko balo.

¹¹Tyen aguragura mere bino jejebo dye gudo luŋ ame tye i Turo. En bino neko joni oko i pala lweny, twoni paggi mogo adoŋodoŋo ame tye kuno, bino rette oko piny.

¹²Jo mere te yako lonyo luŋ ame tye baŋi, anaka jami luŋ ame icato wunu. Gin bino rereto apama celwu oko piny karacel kede udiwu ame imaro wunu. Gweŋe luŋ kede yen luŋ ame yam igedo wunu kede, karacel kede lobo, gin bino coko luŋ ote wot onyo i nam,

¹³Abino miyo wer ame iwero wunu gik oko, karacel kede dwon naŋawu ame igoo wunu.

¹⁴Abino miyo gwen keken en ame doŋ i bomawu kan ame ocik rec twero moyo iye boogi. Apama cel ame oreto piny mom dok obino gero kadi acel, pien an Rwot doŋ atyeko kobo. Man kop ame Rwot Obaŋa okobo.”

¹⁵Man kop ame Rwot Obaŋa okobo i kom jo Turo: “Lobo ame tye i dog nam mom bino yeŋere i kare me retteni piny, i kare ame ŋat ame owaŋo tye acucura, ka ce otye ka neko jo atek meicel i dye boma?

¹⁶Oloc luŋ me dye nam bino yitto oko piny i wi kom me locgi, ote gonyo boŋŋi me kwogo daŋ oko i komgi, karacel kede kanyigi, ote bedo piny i lobo kun komgi amyel amyela. Can ame bino poto i komgi, bino myelo komgi meicel pirwu, cawa ducu.

¹⁷Gin bino cako wero wer me kumo piri, kun owero okobbi ni, ‘Kara dok irwenyo niŋo ba i dye nam, yin boma ame yam iŋeye wok-ki, ame rik tek meicel i dye nam, yin karacel kede joni ame onwoŋo bedo iyii, ŋa ame dok omio kodi can man ame omyelo kom jo, opoto i koma atura wok-ki. Cannere omyelo kom jo luŋ ame bedo i dog nam.

¹⁸Aman omio nino me retteni piny, lobo luŋ ame tye i dog nam, komgi omyel. Koŋ inen lobo luŋ ame tye iyi nam, cunygi opoto meicel i kom turri’.”

¹⁹Rwot Obaŋa okobo ni, “I kare ame doŋ amio idoŋ nono calo wi obur, calo boma mogo ame jo doŋ mom bedo iye, kare ame amio pii me nam doŋ obino owumi oko,

²⁰abino doŋ cwayi piny i bur kan ame jo oto meicel tye iye, ate miyi bedo piny kuno, i akina jami mogo ame doŋ otyeko bale odoco, kun ibedo karacel i jo oto.

²¹Ka doŋ ituno kuno mom dok ibino lokere ineno ŋei idwogo cen i lobo a jo a pwod kwo, abino miyi ibedo twon anennoro ame iyiliyili meicel, ame mannono doŋ bino bedo agikkini. Kadi bed jo tem yenyi, cite mom gire dok otwero nwoŋi. Man kop ame an Rwot Obaŋa akobo.”