Read lango Ejekeri 27 Bible Online

Ejekeri 27 - lango bible

Ejekeri 27

¹Rwot okobo keda, kun kobba ni,

²“Aman doŋ ba, yin wot a dano we, cak doŋ were me kumo pi Turo,

³ite kobbi Turo ame bedo i dog nam, acatwil a rok apapat me dog nam apol meicel, kun ikobbe ni Rwot Obaŋa okobo ni: “Yin Turo ame onwoŋo iwakere wok-ki kun ikobo ni, ‘An aber odoco.’

⁴Waŋ loboni tye i cuny nam, jo ame ogeri, ogeri aber, calo mel;

⁵Gin otio i yen me kidi me Cenir me gerri, karacel kede yen Cedar me Lebanon.

⁶Aco pol me kwaŋi ote tiyo i yen ame oya i Bacan, bao mere ote tiyo i yen ame oya i dog nam ame tye i Kupuro, ame ote mwono kede lak lyec.

⁷Boŋo ame yamo kolo me kwaŋ, rik otio i boŋo camanini aber me Miciri, ame onwoŋo konyi acalo bendera, Boŋo me geŋo cen i kan ame jo bedo iye, rik ote tiyo i boŋo obedo bululu-bululu, kede en aremarema, ame oya i cula me Elica.

⁸Jo ame onwoŋo kwaŋi, obedo jo Cidon kede Arbad; jo lemere ame onwoŋo odiro meicel i kwaŋ onwoŋo daŋ tye baŋi kuno, kun gin tye acalo odiro i ryemo mel.

⁹Aco omwon mel odok, rik te bedo odoŋe me Gebal kede oryeko me kuno; mel luŋ iyi nam karacel kede okwaŋgi, onwoŋo tye baŋi kuno pi loloko jamini me acata.

¹⁰“Jo Pacia kede jo Lud kede jo Kut, rik tye i akina monnyi, kun gin daŋ doŋ otye acalo joni me konyi i lweny. Gin rik ŋabo kwodegi kede tokgi baŋi kuno, gin jo ame rik omio yin itye kede kwogo.

¹¹Ocirikale ame oya i Arvad kede Kelek, onwoŋo gwoko apama me celli kun oguro oko ni rit, kede ocirikale me Gamad onwoŋo gwoko gedoni mogo adoŋodoŋo ocuŋ iguŋ malo. Gin daŋ onwoŋo oŋaŋabo kwodegi i kor apamani romo aroma irit. Gin en ame omio rik iber odoco.

¹²“Jo Tarcic rik cato wil kedi pien yin rik ilony i kit jami luŋ; ryal, nyonyo, bati, kede ŋidoŋido jami ocele rik yin iloloko kede jamigi.

¹³Javan, Tubal kede Mecek ocato wil kedi; gin rik ololoko jamini i dano me bedo opii karacel kede jami ame otio i mola.

¹⁴Aco jo Bet-ograma rik loloko jamini kede aguragura, aguragura me lweny kede kane adoŋo mege.

¹⁵Jo me rodec ocato wil kedi; lobe apol ame onwoŋo tye i dog nam rik tye acalo cuk me cato jamini yin rik inwoŋo i baŋgi lak lyec, kede yen abeco meicel.

¹⁶Jo Edom ocato wil kedi pi twon lonyo adwoŋ meicel ame onwoŋo yin itye kede; gin rik ololoko jamini kede emaradi, boŋi camanini aremarema, boŋi ame otio i kwogo meicel, boŋŋi camanini abeco meicel, giggi mogo me wel kede gweŋe mogo abeco atitino.

¹⁷Jo Juda kede jo Icrael ocato wil kedi; gin rik ololoko jamini kede ŋano, olok kede nyig yen ogeo cek, moo kic, moo, kede moo yen ecoma.

¹⁸Jo Damaciko ocato wil kedi pi jamini ame onwoŋo pol, pi jami ame onwoŋo pol meicel i ciŋi, pien yin onwoŋo itye i kit jami apapat luŋ, koŋo olok me Kelbon, yer romi atarrere,

¹⁹koŋo olok me Ujal; gin rik te bedo loko jamini kun oloko i nyonyo, kacia, karacel kede lummogo ame ŋwecgi kur.

²⁰Jo me Dedan obedo cato wil kedi, kun ololoko jamini kede boŋŋi me wel ame opepeto i ŋe aguragura.

²¹Jo Arab kede oloc luŋ me Kedar, gin onwoŋo otye acalo ocatwil ame yomoro cunyi meicel, pien gin rik otye aber meicel i cato rommi, itino nyogi rommi kede dyegi.

²²Ocatwil me Kebar kede me Raama, daŋ obedo cato wil kedi, gin obedo loloko jamini i kit odok apapat ame ŋwecgi kur, karacel kede gweŋe mogo me wel meicel, kede jabu.

²³Jo me boma me Karan, Kanek, Eden, Acur, kede Cilmad daŋ obedo cato wil kedi.

²⁴Jo man obedo loloko jamini i boŋŋi mogo me wel ame gin oyero ayera, boŋŋi obedo bulubululu, ame okwogo i tic me diro meicel, kede dok opar ame oliliŋo abeco meicel, ame otweo i tol; gin obedo cat kedi i jami magi.

²⁵Mele mogo me Tarcic, en ame rik bedo tero ocatwilli. “Mannono omio yin rik icalo twon mel i dye nam, ame oyeo twon yec apek meicel.

²⁶Ka jo ame kwaŋi doŋ otyeko teri oko i dye nam, yamo ame kodo i tuŋ kide, turi doŋ i cuny nam kuno.

²⁷Mannono te miyo lonyo ocatwilli, karacel kede jami ocele, jo ame kwaŋi kede oryem mel, jo ame mwono mel odok kede ocatwilli, ocirikale me lweny ame tye iyi karacel kede monnyi luŋ ame tye iyi i dye nam kuno, gin luŋ olwiny oko piny i dye nam kuno, i nino ame yin iballe iye odoco.

²⁸Kare ame joni ame ŋeo kwaŋ oredo i koko, kokogi yeno lobo luŋ ame tye i dog nam,

²⁹jo luŋ doŋ ya oko i mel weko mel kuno ata, oryem mel kede okwaŋ mel, cuŋ loka i dog nam,

³⁰Gin luŋ ocako kumo i cwercuny meicel piri, kun oonyo kwoyo i dye wigi, kun daŋ oŋenne i buru.

³¹Ocido yer wigi oko piri, ote ruko boŋo kwero cola, cunygi nwoŋo kec meicel i kare me kumogi-nono,

³²Owero daŋ wer me kumo piri, ote kumo piri, kun owero ni, ‘Ŋa ame yam koŋ ojwero acalo Turo, ame aman doŋ oliŋ oko iti i dye nam.

³³I kare ame jamini obino i dye nam, cobo miti a jo apol meicel; obakki odoko olonyo, kun olony i jamini ame dwon meicel.

³⁴Aman doŋ pii i dye nam omi i tur oko; ilwiny doŋ i cuny nam kan atut. Jamini luŋ karacel kede jo luŋ ame onwoŋo tio piri, gin luŋ oke i dye nam kuno.

³⁵Jo luŋ ame bedo i dog nam, lworo omakogi meicel piri; kadi obakki ame loogi daŋ obedo i lworo meicel piri, kun waŋgi oballe meicel.

³⁶Ocatwil luŋ ame tye i akina rok apapat, lworo omako okato kare, agikkini obedo me can meicel, dok daŋ mom otwero po pira atwal.’ ”