Read lango Ejekeri 3 Bible Online

Ejekeri 3 - lango bible

Ejekeri 3

¹Obaŋa te kobba ni, “Wot a dano we, ŋam dogi icam gin ame omii; cam buk adola-ni ite wot, iwot ikob kop iye baŋ jo me ot Icrael.”

²Mannone te miya ŋamo doga, en te keto iye buk adola-nono ni myero acami.

³En te kobba ni, “Wot a dano we, cam buk adola-ni ame amio baŋi me iyeŋ kede.” An daŋ ate camo oko, te bedo alim meicel i doga calo moo kic.

⁴Obaŋa dok te kobba ni, “Wot a dano we, woti, wot naka i ot a jo Icrael, me iwot ikob koppa baŋgi.

⁵Pien mom acwai baŋ rok ame lebgi pat onyo ame kobo tek, ento baŋ jo me ot Icrael.

⁶Mom acwai baŋ lwak jo apol ame rokgi papat ame kobo leb apapat, dok ame lebgi tek, ame yin mom iromo niaŋ i lebgi. Ateteni, kono onwoŋo acwai baŋ kodi jo-nono, kono gin owinyo koppi.

⁷Cite jo me ot Icrael mom bino winyo koppi; pien gin mom oye winyo koppa, pien jo luŋ me ot Icrael, wiigi tek meicel dok gin opala meicel i cunygi.

⁸Nen ba, an abino miyo nyimi bedo atek meicel me twomo nyimgi, dok daŋ tur nyimi bino bedo atek me twomo tur nyimgi.

⁹Abino miyo tur nyimi bedo atek meicel ame kato lela oko; myero kur ilworgi, cunyi daŋ kur pot ka ineno jo ame maro jem-mu.”

¹⁰En dok te medo kobba ni, “Wot a dano we, myero igam kop luŋ ame abino kobbi i cunyi ducu, dok daŋ iketto cunyi me winyo.

¹¹Wot naka baŋ jo ame tye iyi opii ame gin obedo joni, ite wot kobbigi ni, ‘Rwot Obaŋa okobo ni’; kadi bed gin owinyo onyo okwero winyo.”

¹²Cuny Obaŋa rik te tiŋa oko malo, ate winyo dwonnoro ame awinyere i ŋea, ame redo calo oyeyeŋ, kun oredoni, “Pak wunu kwogo a Rwot malo i polo.”

¹³Mannono onwoŋo dwon okot ame onwoŋo tye i ŋetgi ame onwoŋo tye awinyere aloŋo meicel calo oyeyeŋnono.

¹⁴Cuny Obaŋa te tiŋa oko malo te tera oko teŋe, awoto ame akemo ocira oko, kun teko a Rwot tye ame owuma oko.

¹⁵Awoto kan ame opii onwoŋo tye iye i Tel-abib, ame onwoŋo bedo i ŋet kulo me Kebar. Ate bedo kunno pi nino aŋwen, kun gin ame onwoŋo aneno olo tekona oko.

¹⁶I kare ame nino abiro doŋ otum oko, Rwot te kop keda.

¹⁷En te kobba ni, “Wot a dano we, an atyeko keti me bedo akur-piny pi jo me ot Icrael; kare luŋ ka ibino winyo kop ame akobbi, yin ibino kwenyorogi,

¹⁸ka ce akobo kop baŋ otim tim areco ni, ‘Ibino to gire,’ ka ce yin mom ikwenyoro danonono, akadi kobo kopporo me kwenyoro dano-nono i kom gin arac ame en tye atimo, me wek en lar kwo mere, dano araccono bino to pi ballere; cite bal me remo mere bino bedo i wii.

¹⁹Cite ka yin ikwenyoro ŋat ame timo tim araccono, ento en mom te ye weko timmere araccono onyo i yo arac ame onwoŋo en tye alubo, en bino to pi ballere, cite yin ibino laro kwoni.

²⁰Kite acellono, ka ce ŋattoro a kite atira oweko kite atira oko, eka te timo bal, an ate keto gin ame mie egate i nyime, en bino to, pien yin mom ikwenyoro en, en bino to pi ballere, ento kite mere atira, ame onwoŋo en obedo bedo kede con, mom obino pwoye kadi acel. Bal me remo mere bino bedo i wii.

²¹Aco ka yin ikwenyoro ŋat a kite atira me mom timo bal, eka mom te timo balloro, en gire bino bedo kwo, pien en owinyo akwenyakin ame yin ikwennyoro en kede; yin daŋ ibino laro kwoni.”

²²Teko a Rwot onwoŋo tye i koma kuno, en te kobba ni, “Ya iwot i bar, an abino kop kedi kuno.”

²³An ate ya wot naka i bar; nen ba, ate nwoŋo kwogo Obaŋa tye kuno, ame rom aroma kede kwogo ame aneno i kulo me Kebar. An ate rette piny,

²⁴cite cuny Obaŋa te donyo i koma, te maka oko, te miya ya malo cuŋ acuŋsssa, Rwot te kop keda kun kobo ni, “Wot icegere iyi odi.

²⁵Doŋ yin wot a dano, en obino tweye oko kede tol, ame mom dok ibino romo wot i akina jo ocele.

²⁶Abino miyo lebi moko oko i dani, ame bino miyo ibedo ŋat ame mom loko, a mom romo juko ŋattoro, pien gin obedo jo a jem.

²⁷Cite i kare ame an abino kop kedi, abino miyo te lebi gony ite cako kop, eka ite kobbigi ni, ‘Rwot Obaŋa okobo ni’, kadi gin obino winyo onyo obino kwero winyo, pien gin obedo jo ame jem.”