Read lango Ejekeri 30 Bible Online

Ejekeri 30 - lango bible

Ejekeri 30

¹Rwot okobo keda, kun kobo ni,

²“Wot a dano we, rab kop man ame Rwot Obaŋa okobo: “Red ni, ‘Nino man rac nadi!’

³Pien nino doŋ ceggi acega, Nino a Rwot doŋ ceggi meicel; bino bedo nino ame pol bino cido iye icuc, nino me can baŋ rok apapat.

⁴Lweny bino bedo tye i Miciri, can adwoŋ meicel bino poto Eciopia, jo apol i Miciri obino neko oko; lonyo ame tye iye daŋ obino yako otero oko obino weko Miciri ame acakki tere doŋ oballe.”

⁵I lwennyono daŋ obino neko iye ocirikale ame opaŋo apaŋa i Eciopia, i Put, i Lud, kede en ame opaŋo i lobo a jo Arab kede Libia, gin luŋ obino nekogi karacel i jona, kun onekogi i pala lweny.

⁶Rwot okobo kop man ni: “Jo ame konyo Miciri, obino neneko oko, monnyere ame wakere wok daŋ obino jwero oko; obino jwero cakere i Migdol tuno kede naka i Cirene, obino nekogi luŋ i akina-nono i pala lweny, man kop ame Rwot Obaŋa okobo.

⁷Lobo mere bino bedo acalo wi obur arac akato lobo ocele luŋ atye acalo wi obur, dok boma luŋ iye, bino doŋ nono arac meicel, akato boma ocele luŋ ame odoŋ yigi nono.

⁸Mannono bino miyo gin oŋeo ni an a Rwot, i kare ame doŋ atyeko waŋo Miciri oko i mac, dok jo ame konye luŋ atyeko daŋ jwero oko.

⁹“I kare-nono okwena mogo ame dwir meicel bino ya i baŋa, te wot tuyo jo Eciopia atua, te miyogi lworo meicel, i nino ame doŋ otyeko jwero lobo me Miciri. Nen, nino-nono tye abino!”

¹⁰Man kop ame Rwot Obaŋa okobo: “Abino miyo lonyo a jo Miciri gik oko, abino miyo Nebukadnejar, abaka me Babulon en ame timo man.

¹¹En karacel kede monnyere, ame gin obedo rok ame iyiliyili ame kato rok ocele luŋ, gin en ame obino kelogi me balo Miciri; gin bino woto pala me lwenygi i kom Miciri, ote miyo kom jo oto radde atata i kom jo Miciri,

¹²Abino miyo pii i kulo Nail dwono oko, ate cato lobo Miciri oko baŋ otim tim areco; abino miyo lobo Miciri doko wi obur, karacel kede jami luŋ ame tye iye, abino miyo orok en ame tio ticcono pira; an a Rwot doŋ atyeko kobo.

¹³“Rwot Obaŋa okobo kop man: abino jwero calgi oko, ate daŋ tyeko cal apa i Mempic oko; rwottoro mom dok bino bedo tye i Miciri, mannono bino miyo amio jo Miciri bedo kede lworo.

¹⁴Abino miyo Patroc daŋ doŋ calo wi obur, dok abino waŋo Joan daŋ oko, abino timo tim me ŋolo kop i kom Tebej.

¹⁵Abino coro akemona i kom Pelucuim, ame obedo twon cel atek me Miciri, ate tyeko lonyo luŋ ame tye i Tebec,

¹⁶Abino waŋo lobo me Miciri oko; Pelucium bino bedo kede cwercuny adwoŋ meicel, boma me Tebec obino turo oko, pii alele te poŋ iye,

¹⁷Awobe atino me On kede me Pibecet, abino neko i pala lweny, aco mon, obino tero oko iyi opii.

¹⁸Aco i boma me Tekapine, i ninonono bino bedo acol icuc, abino turo loc a jo Miciri oko, dok ocirikale mere atek ame wakere, daŋ abino jwero oko. Pol bino wumo lobo Miciri oko, anyira mere ote tero daŋ oko iyi opii.

¹⁹Mannono en kite ame abino tiyo kede tic me ŋolo kop i kom Miciri. Mannono bino miyo gin oŋeo ni an a Rwot.”

²⁰I nino dwe abiro me dwe me acel, i mwaka me apar wie acel, Rwot rik dok te kop keda, kun kobo ni,

²¹“Wot a dano we, atyeko doŋ turo bad Parao abaka me Miciri; cite mom ru otweo kan oturrono me caŋ eka te doko dok atek ame dok romo mako jami lweny.

²²Mannono omio Rwot Obaŋa okobo ni; Nen ba, an atye i kop i kom Parao, abaka me Miciri, abino turo bade ryoryo ducu, tuŋ aber kede tuŋ a yam koŋ oturri; abino miyo pala me lweny poto oko i ciŋe.

²³Abino keketo jo Miciri i akina rok ocele, ate miyogi lal i wi lobo luŋ,

²⁴Abino meddi abaka me Babulon teko, ate miye pala me romona; cite bad abaka Parao ryoryo luŋ abino turo oko, en bino cur i nyim abaka me Babulon, calo dano ame owano atek meicel.

²⁵Abino meddi abaka me Babulon teko, ento abino turo bad abaka Parao ryoryo luŋ te rette piny, mannono bino miyo gin oŋeo ni an abedo Rwot. I kare ame doŋ atyeko miyo pala me lweny i ciŋ abaka me Babulon, en bino cako lweny kede i kom lobo me Miciri;

²⁶Abino keketo jo Miciri i akina rok ocele, ate miyogi lal i wi lobo luŋ, Mannono bino miyo gin oŋeo ni an abedo Rwot.”