Read lango Ejekeri 31 Bible Online

Ejekeri 31 - lango bible

Ejekeri 31

¹I nino dwe acel me dwe me adek imwaka me apar wie acel, Rwot rik dok te kop keda, kun kobo ni,

²“Wot a dano we, kobbi Parao, abaka me Miciri karacel kede lwakkere, ni, “Yin ce irom wunu i ŋa i dittinono?

³Nen ba, an abino porri kede yen cedar me Lebanon, abino porri jaŋe abeco meicel karacel kede jaŋe me buŋ, karacel kede kite ame ibor kede. Yat ame bor ame wie otuno naka i pol malo.

⁴Pii tye iye ame mie edoŋo, i tere piny daŋ tye pii me kulo ame en mato, eka te miyo pii mere mol, i kabedo luŋ ame oguro kan ame opite iye-nono, te daŋ dok cwalli yen luŋ ame tye i buŋ pii mere-nono.

⁵Pien pii romo yattono aber, omio en doŋo aber ame kato yennogo ducu, dok jaŋe daŋ doŋodoŋo, dok daŋ bocoboco.

⁶Leyi luŋ ame twarre malo, gero wudigi i jaŋe, dok leyi me tim daŋ nywalo itinogi i tipo mere, dok rok adoŋo apapat me wi podo, we daŋ i tipo mere.

⁷Yattono ber nadi! Pien odoŋo abor kun jaŋe daŋ bocoboco. Lwite donyo daŋ atut piny i pii.

⁸Mom tye yat cedar moro i poto Obaŋa ame oromo poro kede, mom tye yattoro ocele ame jaŋe cal i yattonono. Mom daŋ otwero poro kadi acel olam, jaŋgi mom rwatte kadi acel; mom tye yattoro kadi acel i poto Obaŋa ame oromo poro kede berrere.

⁹An atio yattono aber odoco, i jaŋe ame obuŋere kukakuka. Yattoro luŋ ame tye iyi Eden poto Obaŋa, nene kero.

¹⁰“Mannono omio Rwot Obaŋa okobo kop man ni: Pien yattoro odoŋo abor meicel ame wie otuno naka i pol twal, dok ocako daŋ wakere i cunye pi borrer e-nono,

¹¹abino miye i ciŋ lo atek meicel i akina rok ocele; lo atekkono bino tic kede kun lubo kit ame raccere tye kede. Cunya doŋ okwero yattono oko.

¹²Rok ocele ame ger meicel, bino toŋei oko piny te weke kuno. Jaŋe bino rette i wi kiddi kede i luŋ luŋ, kome bino buto piny ame doŋ otutura oko. Rok ocele ame onwoŋo bedo i te tipo mere, bino ya daŋ te wot gigi oko.

¹³Winnyi luŋ ame twarre malo bino bedo i kom yat ame orette pinnyono, kun leyi me tim wowota i jane luŋ.

¹⁴Cakere aman doŋ, mom dok tye yattoro ame bino doŋo tuno i ka wi yattaca, kadi bed nwoŋo pii arome meicel, jaŋ yattoro mom dok bino gudo pol, kun wie tuno kan ame onwoŋo yattaca tuno iye. Yen luŋ daŋ doŋ bino to oko acalo dano, gin luŋ obino nywako kabedo i jo ame doŋ otyeko to ame doŋ tye i bur i lyel piny.

¹⁵“Rwot Obaŋa okobo kop man ni, Ka doŋ bino donyo piny i lyel, abino miyo pii atut a tye piny kuno kumo pire, abino juko pii i kulo iye oko luŋ. Pii iye luŋ mom dok bino mol; abino miyo wi kidi me Lebanon cido oko icuc, eka yen luŋ iye te two oko.

¹⁶I kare ame abino cwaye piny lobo a jo oto, mor me rette mere bino yeŋo rok apapat, Yen luŋ ame tye i poto me Eden, yen luŋ ame oyero ayera ame nwoŋo pii ame romogi, ame tye i Lebanon, cunygi bino kwe i lobo ame tye piny.

¹⁷Gin daŋ obino donyo piny i lyel kuno karacel kede, baŋ jo ame otyeko neko i pala lweny. Jo luŋ ame onwoŋo bedo i tipo mere i akina rok apapat, bino to.

¹⁸Kara ŋa ame kwogoni cal kede, dok daŋ dit ame rom kedi i akina yen luŋ ame tye i poto me Eden? Yin daŋ doŋ ibino donyo piny i lobo a jo oto karacel i yen ocele me Eden, ite wot nywako kabedo i jo ame mom ŋeo Obaŋa, kede jo ame oneko aneka i pala lweny. “Man obedo Parao karacel kede lwakkere luŋ, man kop ame Rwot Obaŋa okobo.”