Read lango Ejekeri 32 Bible Online

Ejekeri 32 - lango bible

Ejekeri 32

¹I nino dwe acel me dwe me apar wie aryo, i mwaka me apar wie aryo, Rwot rik dok te kop keda, kun kobo ni,

²“Wot a dano we, cak wer me kumo pi abaka Parao, me Miciri, kun ikobbe ni: “Yin inenne keni ni yin ibedo eŋato i akina rok ocele, ento yin kom irom aroma i twon twolloro iyiliyili ame bedo dye nam, yin i kok i kulo kuno, dok ibedo lolo pii kede tyeni, ite babalo pii i kulo oko. Man en kop ame Rwot Obaŋa okobo.

³Abino boloboona i komi kun atye i lwak rok apapat, gin bino wayi kede boo-nono, keli oko.

⁴Abino wayi aboli kan otwo, ate cacanyo yin piny i lobo, abino miyo winy luŋ ame twarre malo, karacel kede leyi luŋ me tim, gin luŋ obino bino i komi me cami.

⁵Abino babao riŋo komi i wi kiddi malo, karacel kede remoni ame acwer; kun komi otop bino poŋ yii luŋ.

⁶Abino bido lobo kede remoni, tuno kede naka i wi kiddi malo, yo luŋ bino poŋ i riŋo komi keken.

⁷I kare ame doŋ atyeko jweri oko, abino wumo daŋ polo oko, acer iye luŋ daŋ bino rwenyo oko; abino miyo pol wumo waŋ ceŋ oko, dwe daŋ mom bino menyo piny.

⁸Ginnoro luŋ ame menyo piny ame tye i polo, abino miyo colpiny wumogi oko, ate miyo loboni cido icuc, Man kop ame Rwot Obaŋa okobo.”

⁹Abino balo cuny rok apapat, i kare ame doŋ abino terri oko iyi opii i akina rok ocele, i lobo mogo ame yam mom ru iŋeo.

¹⁰Abino miyo lworo mako rok apapat i komi, kom obakkigi bino myel meicel piri, ka ce ayeyeŋo pala lwennya i nyimgi. Komgi bino bedo myel amyela cawa ducu, kun kom ŋat acel acel myel pi kwo mere, i nino ame yin ibino poto kede.

¹¹Pien man en kop ame Rwot Obaŋa otyeko kobo: Pala lweny abaka me Babulon bino bino i komi.

¹²Abino miyo pala lweny atek en ame neko joni, ame gin luŋ obedo twoni jo ame iyiliyili meicel i akina orok. “Gin bino miyo awaka a jo Miciri gik oko, lwak jo mere apol daŋ bino to oko.

¹³Abino jwero leyi iyie luŋ, leyi luŋ ame bedo i dog nam; mom dok tye ŋattoro ame dok bino medde yelogi, akadi leyi moro daŋ ame dok bino medde yelogi.

¹⁴Abino miyo pii iye doko acil meicel, eka pii i kulo te mol calo moo, Man kop ame Rwot Obaŋa okobo.

¹⁵Kare ame abino miyo lobo me Miciri doko acalo wi obur, ame ginnoro luŋ ame bedo iye mom doŋ tye, kare ame abino neko jo luŋ ame bedo iye, mannono bino miyo gin oŋeo ni an a Rwot.

¹⁶Wer me kumo man bino doko wer ame jo wero. Mon me rok apapat bino wero i kare me kumogi pi Miciri, i lwakkere luŋ. Gin bino wero wer man, man kop ame Rwot Obaŋa okobo.”

¹⁷I nino dwe apar wie abic me dwe me agege, i mwaka me apar wie aryo, Rwot dok te kop keda, kun kobo ni,

¹⁸“Wot a dano we, koki, dok ikum pi lwak jo me Miciri, cwagi baŋ rok ocele ame tek meicel i lobo a jo oto, baŋ jo ame doŋ otyeko donyo piny i lyel:

¹⁹‘Ŋa ce ame yin ikato oko kede ber?’ “Dony piny iwot ibut i lyel a jo ame mom ŋeo Obaŋa.

²⁰“Gin bino rette i dyere a jo ame oneko i pala lweny, pala lweny doŋ tye ame oyikere oko me neko jo Miciri.

²¹Rwode mogo adoŋo, karacel kede jo ame onwoŋo lwenyo karacel kedgi, tye ame akuro jolo jo Miciri akura, kun okobo ni, ‘Jo a mom ŋeo Obaŋa ame rik oneko i pala lweny, gin daŋ obino piny baŋwu, gin en tye obuto piny kan mot.’

²²“Jo Acuria daŋ tye kuno, ame lyel ocirikale mere tye ame ogure dyere, gin luŋ obedo jo ame oneko aneka i pala i lweny.

²³Lyelgi tye piny meicel i lobo a jo ame oto. Ocirikale mere luŋ oneko aneka i lweny, lyelgi tye ame ogure dyere. Gin en ame rik omio lworo omako jo ame tye i lobo a jo ame kwo.

²⁴“Jo Elam daŋ tye kuno, dok lyele ocirikale mere daŋ tye ame ogure oko dyere. Gin luŋ daŋ onekogi aneka i pala, i lweny, gin ote donyo piny i lobo a jo oto, kun otye acalo jo ame mom ŋeo Obaŋa. Gin daŋ rik omedo lworo meicel i lobo a jo akwo, gin daŋ otye i akina jo ame tye ayeyo lewicgi karacel i jo a doŋ otyeko donyo piny i lyel.

²⁵“Otiyi i tanda mere tye i akina jo ame oneko aneka, dok lyel ocirikale mere tye ame ogure dyere. Gin daŋ luŋ obedo jo ame mom ŋeo Obaŋa. I kare me kwogi, onwoŋo gin daŋ tye i akina jo ame mio jo lworo, ento aman doŋ obuto piny mot, kun daŋ oyeo lewic karacel i jo a doŋ otyeko donyo piny i lyel. Gin daŋ oketogi, otye i akina jo ame oneko aneka i pala lweny.

²⁶“Jo Mecek kede jo Tuban daŋ tye kuno, karacel kede lwakgi luŋ ame lyelgi tye oguro meggi dyere. Gin luŋ daŋ rik obedo jo ame mom ŋeo Obaŋa, ame onekogi aneka i pala lweny, I kare me kwogi i lobo, gin daŋ rik omedo lworo baŋ jo.

²⁷Gin rik mom oyikogi i yik me kwogo acalo twoni jo mogo adoŋo ame okwoŋo to, ame owoto piny i lyel karacel i jami lwenygi, dok ame pala lwenygi tye ame opyelo piny tutuŋ wigi, dok kwotgi daŋ tye ame otweo i cogo komgi. Twoni jo atekkono rik olworogi meicel i lobo a jo akwo.

²⁸Mannono omio yin daŋ obino tuturo yin oko ite wot daŋ piny i akina jo ame mom ŋeo Obaŋa, kede jo ame oneko aneka i pala lweny.

²⁹“Jo Edom daŋ tye kuno, obakki mere karacel kede rwode mere. Gin rik obedo twoni jo atek meicel i kare me kwogi, cite aman gin doŋ otye obuto karacel i jo ame oto, kun mom oŋeo Obaŋa, ame rik oneko aneka i pala lweny.

³⁰“Rwode me tutuŋ onyarodi luŋ daŋ tye kuno, karacel kede jo Cidon daŋ luŋ, ame gin luŋ odonyo piny i lyel a jo oto ame yeo lewicgi, pien i kare me kwogi, tekogi rik meddi jo lworo cite aman doŋ obuto piny karacel i jo ame mom ŋeo Obaŋa ame oneko aneka i pala lweny. Gin daŋ otye onywako lewicgi karacel i jo a doŋ otyeko donyo piny i lyel.

³¹“Kare ame Parao abaka me Miciri bino nenogi, cunye bino kwe pi to mere, kede pi to a lwakkere ame oneko aneka i pala lweny. Man kop ame Rwot Obaŋa okobo.

³²Pien i kare me kwo mere, en obedo miyo jo ame kwo lworo, mannono omio obino pyele i akina jo ame mom ŋeo Obaŋa, karacel i lwak ame oneko aneka i pala lweny. Parao karacel i lwakkere luŋ.” Man kop ame Rwot Obaŋa okobo.