Read lango Ejekeri 33 Bible Online

Ejekeri 33 - lango bible

Ejekeri 33

¹Rwot rik dok te kop keda, kun kobo ni,

²“Wot a dano we, wot ikobbi joni gin ame atimere, ka ce amio lweny opoto i lobo moro-ni. Jo me lobo-nono bino kwanyo dano acel acel i akinagi te miye bedo akurpinygi.

³Ka ce en tye ka ne no okwor tye ka bino me bino lweny i komgi, en bino kuto apel me kwenyoro jo mere.

⁴Ka ce dano moro owinyo apel ame okuto, eka dano-nono mom te tamo pire, te miyo okwor bino, te make neke oko, bal me remo mere bino dok gire i wie.

⁵En owinyo koko apel ame okwenyoro en kede, cite mom te paro pire, mannono en omio bal me remo mere bedo gire i wie. Pien kono rik en owinyo akwenyakin ame okwenyoro en kede-nono, kono en olaro kwo mere.

⁶Cite ka akur-piny oneno okwor tye abino, mom te kuto apel, lwak mom te ŋeyo kop i kom okwor ame tye abino, ka ce okwor obin okwanyo ŋattoro i akina lwak, te wot neko oko pi ballere, bal a dano-nono bino bedo i wie, cite bal me to mere, bino bedo i wi akur-piny.

⁷“Doŋ pi mannono ba, yin wot a dano, an atyeko keti me bedo akur-piny a jo Icrael. Yin ibino kwenyorogi i gin ame an abino kobbi.

⁸Ka ce akobo ni lonnoro arac bino to, eka ce yin mom ite kobbi lo araccono me kwenyoro en, me en cak weko kite araccono, eka lo arac cu te to i ballere; bal a danonono bino dok i wii,

⁹Cite ka yin ikwenyoro lo araccono me weko kitenono, eka en te kwero loko kite oko; en bino to i ballere, ento yin ibino laro kwoni.

¹⁰“Dok yin, wot a dano we, kobbi jo me ot Icrael kop man ame gin otye ka kobo; ni, ‘Timwa me turo cik kede balwa, tye gire i wiwa, omiowa otye ka doko agoro agora. Kara doŋ otwero bedo kwo niŋo?’

¹¹Dok ikobbigi ni, Kite acalo an Rwot Obaŋa atye kwo-ni, cunya mom yom i to a lo ame timo gin arac, ento an amito ni atim tim arac, olokere owek timo tim araccono me ebed kwo. Wun jo me ot Icrael, lokere idwog wunu cen, lokere idwog wunu cen, iwek wunu kitewu areco, Kara piŋo omio imiye wunu i to kittono?

¹²Yin wot a dano we, kobbi lwak ni, Ka ce lo a kite atira obalo, gin aber ame yam en obedo timo mom romo larre. Dok ka lo moro a kite rac oweko timo gin arac, mom obino keto cannoro i kome, dok ka ce lo moro a kite atira ocako timo bal, mom bino medde ri kare alac kun pwod kwo.

¹³Dok ka ce aciko lo moro ame kite atira, ni en gire bino bedo kwo, ka ce dano-nono obedo geno kite atira-nono, eka te cako timo bal, mom abino po i kom ginnoro aber ame yam en obedo timo kadi acel, en gire pwod bino to pi bal ame en otimo.

¹⁴Dok ka akwenyoro ŋat ame timo gin arac ni en bino to oko, ento en te lokere weko timo bal oko, te cako timo gin ame cik mito dok tye atira,

¹⁵me anennere, ka ce en ocako dwoko jami ducu ame yam en emao amaa i baŋ jo o ocele, kede gigi mogo ame yam ekwalo akwala, te doŋ weko timo bal oko, te doŋ timo gin ame mio dano kwo, ento en gire mom bino to, ento bino kwo.

¹⁶Cunya bino cayo balloro luŋ ame yam en otimo. En bino bedo kwo pien otimo gin ame tye atira dok aber.

¹⁷“Kadi bed amannono jowu tye ka kobo ni, ‘Gin ame Rwot tye ka timo mom tye kakare’; aco kun kitegi en ame mom beco.

¹⁸Ka ce en lo a kite atira oweko tim gin atye atira, eka te cako timo gin arac, en gire bino to.

¹⁹Ka ce lo a kite rac, oweko timo bal oko, eka te cako timo gin atye atira dok aber, dano-nono nwoŋo olaro kwo mere oko,

²⁰Cite jo Icrael tye ka kobo ni gin ame an atye ka timo mom tye atira. Myero iŋe ni abino ŋolli wun jo me ot Icrael kop, kun alubo gin ame itimo wunu.”

²¹I mwaka me apar wie aryo, ame doŋ otyeko terowa oko iyi opii, i nino dwe abic me dwe me apar, dano moro ame onwoŋo olwi i Jerucalem obino baŋa te bino kobba ni, “Bomawa doŋ otyeko mayo oko.”

²²Otyeno ocele ame dano ame olwi-nono mom ru obino baŋa, awinyo teko a Rwot tye i koma. I kare ame dano-ni obino otuno baŋa odiko ocele, Rwot oyabo doga ate cako kop, te leba doŋ te gony atwal.

²³Rwot okobo keda kun kobba ni,

²⁴“Wot a dano we, jo me lobo man ame oballe oko-ni, otye ka kobo kare ducu ni, ‘Iburaim rik onwoŋo dano acel keken, ento rik ote miye kom lobo-ni luŋ. Nen wan otye opol, mannono mio loboni doŋ bedo megwa.’

²⁵Pi mannono myero ikobbigi kop man ame Rwot Obaŋa okobo: Wun icamo wunu riŋo imedo wunu kede remo, eka ite cako woro wunu cal jogi, dok ite onyo wunu remo a jo nono. Kara ŋo omio dok itamo wunu ni lobo man bino bedo megwu?

²⁶Wun igeno wunu pala me lwenywu, dok itimo wunu timmogo me kwer, kun ŋat acel acel i akinawu balo dako awottere. Kara ŋo omio itamo wunu dok ni lobo man obedo megwu?

²⁷Kob kop man ame Rwot Obaŋa okobo baŋgi: Kite acalo an atye kede kwo-ni, ateteni jo ame tye i lobo man ame doŋ otyeko bale-ni, obino neko oko i pala lweny. Dok ŋat ame onwoŋo tye i poto mere, abino miyo leyi me tim en ame mwodo; aco jo ame tye i cellogo ame ocelo atek, kede iyi gorogoro, too edeke en ame bino nekogi.

²⁸An abino miyo lobo man doŋ calo wii obur ame doŋ oballe odoco. Jo mogo atek iye ame wakere wok-ki, daŋ bino to oko. Wi kiddi luŋ ame tye iyi Icrael, bino doko calo wi obur, ame ŋattoro mom romo beo iye kadi acel.

²⁹Mannono bino miyo iŋeo wunu ni an a Rwot, i kare ame doŋ atyeko miyo lobo odoko calo wi obur, kun doŋ oballe odoco, pi timmogo me kwer ame ibedo wunu timo.

³⁰“Aco yin wot a dano we, joni tye ka kobo kop i komi, ka gin ocokere ka poro kopgi i ŋet cel me boma, onyo i doggola me udigi. Gin obino kop i akinagi kengi kengi, kun ŋat man kobbi awottere ni, ‘Bye, me koŋ obin owot owiny kop ame aman dok obino i baŋ Rwot.’

³¹Gin te ya bino baŋi, kite ame jo bino kede, gin te bedo i nyimi acalo jona, ote daŋ winyo kop ame yin itye ka kobo, cite mom ote keto gigi i tic; pien gin onyuto margi i doggi keken, ento cunygi tye ka i nwoŋo lim.

³²Yin doŋ itye baŋgi acalo agony kop ame tye ka wero wer baŋgi me mar keken, kun wero ame dwone mit meicel, dok daŋ goo tum. Gin owinyo kop luŋ ame yin ikobo, cite mom oketo moro i akinagi i tic kadi acel.

³³Cite ka kop ame yin ikobo luŋ ocobere, ka ce bino cobere, gin bino ŋeyo ni adwarpiny kara onwoŋo tye akinagi.”