Read lango Ejekeri 34 Bible Online

Ejekeri 34 - lango bible

Ejekeri 34

¹Rwot okobo keda kun kobo ni,

²“Wot a dano we, rab kop arac i kom okwat me Icrael, rab kop baŋgi gin okwat, ikobbigi kop man ame an Rwot Obaŋa akobo: Ama wun okwat me Icrael ame onwoŋo itye ka pitte wunu kenwu nie! Mom okwat myero pit rommi?

³Wun icamo wunu moo, iruko wunu yer rommi, ineko wunu rommi ame ocwe mege, cite mom ipito wunu rommi.

⁴Rommi ame goro mom imeddigi wunu teko, en ame two mege daŋ mom icaŋo wunu, dok en ame oŋwalo, mom itweo wunu kan ame otur. En ame orwenyo mege, daŋ mom iyenyo idwoggo wunu paco, mom iyenyo wunu rommi ame orwenyo kadi acel, dok iloogi wunu i gero meicel.

⁵Pien ŋat ame kwao rommi doŋ mom, omio rommi oket oko atata, leyi me tim nwonogi, te makogi mwodogi oko.

⁶Rommina doŋ okeketa oko, orimo doŋ piny atata i wi kiddi malo, dok inwoŋogi i kabedo luŋ ame obedo kidikidi. Rommina doŋ okeketa atata, i kabedo luŋ ame tye i wi lobo, mom tye ŋattoro a myero yenygi, onyo ame paro me nwoŋo kan ame gin otye iye.

⁷“Pi mannono ba, wun okwa rommi, winy wunu kop man ame Rwot okobo:

⁸Kite acalo atye kwo-ni, pien rommina doŋ odoko me amwoda a leyi luŋ me tim, ame makogi te mwodogi oko, pien akwattoro nwoŋo doŋ mom; dok pien okwatta mom otemo yenyo rommina, ento okwat lunyo pitte ka kengi kengi, kun mom opito rommina kadi acel,

⁹pi mannono ba, wun okwat myero iwiny wunu kop man ame Rwot okobo:

¹⁰Rwot Obaŋa okobo kop man ni, Nen ba, an atye doŋ i kop i kom okwat, abino penyogi me culo rommina, ate giko ticgi doŋ me pito rommina oko; dok okwat daŋ mom bino medde pitte kengi. Abino mayo rommina oko i doggi, me kur bed acalo cam me acamagi.

¹¹“Pien Rwot Obaŋa okobo kop man ni: Nen ba, an, ikoma abino yenyo rommina, abino yenyo kan ame gin tye iye.

¹²Kite ame akwatyenyo kede rommi mere, ka ce mogo i akinagi okeketa oko owoto teŋe, mannono en kite ame abino yenyo kede rommina. Abino larogi oko i kabedo luŋ ame onwoŋo gin okeketa iye i nino ame pol onwoŋo dwoŋ, dok pol daŋ ooido icuc.

¹³Abino kwanyogi oko i akina rok apapat, i lobo luŋ ame gin tye iye, ate dwogogi en i lobogi. Abino pitogi i wi kiddi ame tye i lobo me Icrael, i ŋet akon, i kabedo luŋ ame jo bedo iye.

¹⁴Abino miyogi ocama i bar aber, i wi kiddi luŋ, ame tye iyi Icrael. Gin bino buta kuno kan ame luŋ aber me acamo a dok en ame tye iye, gin bino cem i bar amwonya meicel ame tye i wi kiddi me Icrael.

¹⁵An ikoma en ame bino bedo akwat ame kwao rommina,

¹⁶dok abino miyogi obuto piny, man kop ame an Rwot Obaŋa akobo. Abino yenyo rommi ame orwenyo dok abino dwoggo cen rommi ame oya owoto oko i akina owotegi, abino daŋ tweyo kan ame owane i komgi, dok rommi ame odoko agoro abino meddigi teko, rommi ocwe mege, kede en atekkege, abino medde gwokogi. Abino kwayogi aber meicel.

¹⁷“Aco wun rommina, winy wunu kop man ame Rwot Obaŋa okobbiwu: Nen ba, an aŋolo kop i akina rommi kede rommi, i akina nyok romo kede nyok dyel.

¹⁸Rommi ocele i akinawu mom camo lum aber romogi; dok onyonyono-gu lum ocele ame mom ocamo. Omato pii aber, ote daŋ dok nyonyono pi ocele ame mom omato.

¹⁹Itamo wunu ni ber, rommina me mwodo lum ame inyonyono wunu ityenwu, dok daŋ myero gin omat pii ame ibala wunu oko i tyenwu?

²⁰“Mannono omio Rwot Obaŋa okobo kop man baŋgi: Nen ba, an, an ikoma en ame abino ŋolo kop i akina rommi ocwe kede en ame mom ocwe.

²¹Pien itye ka coro wunu owotewu i ŋetwu kede badwu, kun daŋ icocobo wunu owotewu ame goro i tuŋwu, tuno ka imiogi wunu okeketa teŋe atata.

²²An abino laro rommina kede dyegina, mom dok obino bedo me amwoda a leyi; dok an en abino ŋolo kop i akina romo kede romo wadgi.

²³Abino miyo akwat acel en ame kwaogi, amirona Daudi, en ame bino pitogi; En ame bino bedo akwatgi ame kwaogi.

²⁴An a Rwot abino bedo Obaŋagi, amirona Daudi en ame bino bedo Rwot i ak inagi. Man kop ame an Rwot akobo.

²⁵“An abino cikere kedgi, cikere me kuc, ate miyo leyi ager bedo mom i lobo, me gin doŋ obed i kuc i tim, dok daŋ obut i kuc dyewor i buŋ.

²⁶Abino miyogi gum, karacel i kabedo luŋ ame oguro kidina acil, abino cwayigi kot i kare ame mitte i kokome; kot ame abino miyogi-nono, bino bedo kot ame miogi gum.

²⁷Yengi ame gin opito bino nyako nyiggi meicel, dok lobogi daŋ bino ceko cem adwoŋ meicel, gin bino bedo aber kun otye i kuc i lobogi. Gin bino ŋeyo ni an abedo Rwot, ka gin oneno doŋ atyeko turo nyonyo ame otweogi kede, me larogi i ciŋ jo ame gin tye i cimgi acalo opii.

²⁸Rok ocele mom dok bino medde yakogi, dok leyi me tim daŋ mom bino medde mwodogi, obino bedo i kuc aboŋo ginnoro ame miogi lworo.

²⁹Abino miyo pottigi ceko cam meicel, ate miyo kec doŋ rwenyo oko i lobogi. Rok ocele mom daŋ bino medde dok me yetogi.

³⁰Gin bino ŋeyo ni an a Rwot ame abedo Obaŋagi atye kedgi, dok gin jo Icrael obedo jona, man kop ame Rwot Obaŋa okobo.

³¹Wun ibedo wunu rommina, rommi ame an akwao, dok an abedo Obaŋawu. Man kop ame Rwot Obaŋa okobo.”