Read lango Ejekeri 36 Bible Online

Ejekeri 36 - lango bible

Ejekeri 36

¹“Yin wot a dano we, rab kop i kom kiddi me Icrael, kun ikobo ni, Ama wun kiddi me Icrael, winy wunu kop ame Rwot tye ka kobo,

²Man en kop ame Rwot Obaŋa okobo; pien omone a jo Icrael tye ka wakere kun okobo ni, ‘Lobo obedo kidikidi ame yam tye conni doŋ olokere obedo megwa.’

³“Pi mannono myero irab kop kun ikobo gin ame an Rwot Obaŋa atye ka kobo, ni, Nen ba, pien jo luŋ ame oguri dyere, omio idoko wi obur, kun jo ocado i komi tuŋŋi kede tuŋŋi, omio ite doko gi-a rok ocele kun gin luŋ okobo kop arac i komi,

⁴Aman doŋ ba, yin wi kiddi me Icrael, winy kop man ame Rwot Obaŋa tye ka kobo, ame kobo baŋwu wun kiddi me Icrael kede lobo obedo kidikidi, kulo kede luŋ ducu me Icrael, baŋ kabedo luŋ ame yam doŋ oweko oballe oko, kun tye acalo wi obur, karacel kede boma luŋ me Icrael, ame rik rok ocele ame ogure dyere obedo yayako, ote daŋ doŋ loko doko gianyeragi.

⁵Man omio Rwot Obaŋa okobo kop agwa i twon akemo moro ame onwoŋo olyeto i kom rok ocele luŋ, kede i kom lobo me Edom luŋ, ame omio lobona odoko meggi, pirgi kengi, kun cunygi yom iye okato kare, dok daŋ okobo kop me acae iye. Me gin ogam bed meggi ote yayako jami ame tye iye.

⁶Pi mannono myero ikob kop i kom lobo me Icrael, kobbi kiddi iye karacel kede lobo obedo kidikidi, kulo karacel kede luŋ ducu iye, kop man ame Rwot Obaŋa okobo: Nen ba, atye ka kobo nyeko ame omaka i twon akemo meicel, pien yin ineno can meicel pi anywar ame rok ocele obedo nywari kede.

⁷Mannono omio akwoŋo akwoŋa ni, rok luŋ ame tye i ŋeti ame oguri dyere, obino daŋ nywarogi kite ame gin daŋ obedo nywari kede.

⁸“Cite wun kiddi me Icrael, yen dok bino lot atek meicel i yiwu, ote daŋ nyako nyiggi, pi jo me Icrael. Pien gin ceggi acega me dwogo paco.

⁹Pien an atye tutuŋ baŋi, abino neno ni loboni dok opuro, dok daŋ opito cam iye.

¹⁰Abino miyo jo dok nya medde baŋi, ibino bedo i boma luŋ ame yam tye iyi Icrael, ite daŋ dok gero wunu kabedo luŋ ame yam obabalo.

¹¹Abino miyo jo karacel kede dok, nya medde ameda. Welwu bino bedo abup ame kato en a yam con oko, dok itino wu daŋ bino bedo apol meicel. Abino miyo ibedo wunu kuno kite ame yam ibedo wunu con, kun ibedo wunu aber, ame kato kite ame yam itye ibedo wunu con, mannono bino miyo iŋeo wunu ni an a Rwot.

¹²Abino kelo wun jona Icrael, ate miyowu bedo i lobo. Loboni bino bedo megwu, itinowu mom dok bino neno can iye kadi acel.

¹³“Rwot Obaŋa okobo ni: Pien jo tye ka lwoŋo kiddi ame tye Icrael ni, ‘Yin i kidi ame ineko jo, dok daŋ imao itino a jo.’

¹⁴Cite cakere aman mom dok ibino neko itino a jo, dok daŋ mom ibino mayo itino a rok me Icrael. Man kop ame Rwot Obaŋa okobo.

¹⁵Dok daŋ mom ibino medde wunu winyo acae ame rok ocele caowu kede, dok daŋ mom ibino medde wunu yeyo lewic, ame rok ocele tye ka keto i komwu, dok daŋ mom ibino neko wunu itino a rok man, Man kop ame Rwot okobo.”

¹⁶Rwot dok te kop keda, kun kobo ni,

¹⁷“Wot a dano we, i kare ame jo Icrael obedo i lobogi gin i komgi, gin obin obalo lobogi oko i kitegi, karacel kede gin ame gin tio, Gin ame gin rik timo i nyima, rik mom cil, rom a roma i dako ame tye atwoyo two me kwer.

¹⁸Mannono rik te miyo an coro akemona i komgi pi remo ame gin rik obedo onyo, pi cal jogi ame gin obalo kede lobogi.

¹⁹Rik ate keketogi atata i akina rok ocele, gin te lal i lobo apapat, i kabedo luŋ, kun lubere i kitegi kede gin ame gin obedo timo, en amio an daŋ aŋolligi kop kittono,

²⁰Cite i kare ame gin doŋ otye i akina rok ocele, i kabedo luŋ ame onwoŋo gin tye iye, gin rik te bedo pyedo nyiŋa acil, pien jo rik tye ka kobo kop i komgi ni, ‘Jo man obedo jo a Rwot, cite gin dok obin oya oko i lobogi.’

²¹Cite an, nyiŋa acil litta meicel, ame gin jo Icrael obedo balo i akina rok kan ame gin onwoŋo otye iye.

²²“Pi mannono myero ikob baŋ jo me ot Icrael, kop man ame Rwot Obaŋa okobo: Gin ame an aceggi timo-ni, pe atimo pirwu wun jo me ot Icrael, cite an atimo pi nyiŋa acil, ame wun ibedo balo wunu i akina rok ocele kan ame onwoŋo itye wunu iye.

²³I kare ame an abino nyutti rok ocele twon nyiŋa acil wok-ki, ame wun ibedo balo wunu i kare ame itye wunu i akinagi; bino miyo gin rok ocele ŋeo ni an abedo Rwot, ka ce gin oneno an atio kedwu me nyuto nyiŋa acil, kun gin oneno kede waŋgi. Man kop ame Rwot Obaŋa okobo.

²⁴Pien an abino kwanyowu oko i akina rok ocele ate coko wu daŋ i akina rok apapat ame itye wunu iye, ate dwokowu cen i lobowu i komwu.

²⁵Abino kikiro pii acil i komwu, wun doŋ ite doko wunu jo acil, wun jo ame yam ijebere wunu i cal jogi, karacel kede jami ducu ame yam omiowu i lille wunu.

²⁶Abino miyowu cuny anyen, abino keto cuny anyen i yiwu, Abino kwanyo cuny ame tek calo gweŋe oko i yiwu ate miyowu cuny a dano ikokome.

²⁷Abino keto cuny acil i yiwu, ate miyowu bedo jo ame lubo cikka, kun igwokere wunu i lubo gin ame an aciko.

²⁸Ibino bedo wunu i lobo ame rik amio baŋ kwariwu, wun ibino bedo wunu jona, an abino bedo Obaŋawu,

²⁹Abino larowu oko i kom lille ame ilile wunu kede. Abino miyo cam bedo abup, kec mom dok te medde bedo i lobowu.

³⁰Abino miyo nyig yen nyak adwoŋ meicel, karacel kede cam ame cek i potowu, me kur dok ibed wunu i lewic me bedo wunu i kec i akina rok ocele.

³¹Mannono bino miyo ipoyo wunu kitwu areco, kede gin areco ame rik ibedo timo wunu ame mom, ber, ite caye wunu kenwu, pi bal ame ibedo balo wunu, kede gigi mogo me kwer ame ibedo timo wunu.

³²Myero iŋe wunu ni gin ame an atimo, mom atimo pirwu. Man kop ame Rwot Obaŋa okobo, Myero lewic makwu pi gin ame yam ibedo timo wunu, wun jo Icrael.

³³“Man kop ame Rwot Obaŋa okobo: I nino ame abino lwokowu iye i kom bal ame yam ibedo balo wunu, abino miyo jo cako bedo i boma luŋ, ote daŋ cako gero kagi mogo ame yam obabala.

³⁴Lobo ame doŋ onwoŋo tye acalo wi obur, dok obino puro, kun mom dok medde bedo acalo wi obur, kite ame jo a rik beo iye bedo neno kede.

³⁵Jo bino cako kobo ni, ‘Lobo man ame rik tye acalo wi obur-ri, aman dok calo poto me Eden; dok boma mogo ame yam oballe acalo wi obur, aman dok jo tye bedo iye, dok daŋ ocecelo oko i cellogo atek.’

³⁶Mannono bino miyo rok ame odoŋ ame tye i ŋetwu, ŋeo ni an a Rwot, dok atyeko gero kagi mogo ame yam doŋ oballe oko, dok daŋ amio lobo mogo ame yam calo wi obur, odoko dok lobo ame ceko cam. Man kop ame an Rwot akobo, dok daŋ abino tiyo.

³⁷“Rwot Obaŋa okobo kop man ni: Abino daŋ miyo jo Icrael penya me miyo jogi nya calo rommi kede dyegi. Calo rommi kede dyegi ame omio me yalo Obaŋa, calo rommi ame onwoŋo oradde i Jerucalem i kare me ecubannogo adoŋo.

³⁸Mannono en kite ame boma mogo ame yam obabala bino bedo kede, kun jo opoŋ yigi calo rommi kede dyegi. Mannono bino miyo gin oŋeo ni an a Rwot.”