Read lango Ejekeri 37 Bible Online

Ejekeri 37 - lango bible

Ejekeri 37

¹Teko a Rwot onwoŋo tye ikoma, ame te miyo cuny a Rwot kela naka i dye luŋ, cogo otwo onwoŋo tye oradde atata i luŋŋono.

²Cuny a Rwot te miya mano kannono luŋ, ate neno cogo tye oradde kuno atata, dok cogo mere luŋ onwoŋo obedo cogo ame otwo.

³En te kobba ni, “Wot a dano we, cogo magi dok twero lokere bedo kwo? An ate gamo ni, Ama Rwot Obaŋa, yin gire iŋeo.”

⁴En dok te kobba ni, “Rab kop baŋ coggi magi, ikobbigi ni, Wun coggi ame otwo-ni, winy wunu kop a Rwot.

⁵Rwot Obaŋa okobo kop man baŋwu, wun cogo: Nen ba, abino miyo weo me kwo bino i komwu, eka ite cako dok bedo wunu kwo.

⁶Abino miyo ler dok ryeye i komwu, kede riŋo daŋ dwogo i komwu, ate miyo del komwu daŋ bedo tye, eka ate miyowu weo me kwo, ite doŋ cako wunu bedo kwo. Mannono bino miyo iŋeo wunu ni an a Rwot.”

⁷Mannono te miyo an daŋ rabo kop kite ame onwoŋo ocika kede. Kare ame atyeko rabo kop, ate cako winyo dwonnoro tye ka wo i tek, cogo daŋ te cako ribere oko i kom owotegi, kun cogo man ribere i kom awottere.

⁸I kare ame atye aneno, ate neno ler okadde akada i komgi, riŋo daŋ te bino i komgi oko, del komgi daŋ te wumo komgi ipuk, cite weo me kwo onwoŋo pwod pe i komgi.

⁹Rwot dok te kobba ni, “Wot a dano we, rab kop baŋ weo, ikobbi weo kop man ame an Rwot Obaŋa akobo: Yin weo myero ibin i twok lobo aŋwen ducu, bye idony i kom jo man ame oneko-ni, me gin ocak bedo kwo.”

¹⁰An daŋ ate rabo kop kite ame ocika kede, eka weo me kwo te bino donyo i komgi, gin te cako bedo kwo, ote ya cuŋ acuŋa i tyengi. Jo mere onwoŋo pol ame romo mony acel luŋ.

¹¹Rwot dok te kobba ni, “Wot a dano we, cogo magi obedo jo Icrael luŋ. Nen gin otye kakoboni, ‘Cogo komwa, otwo gire doŋ oko, geŋwa moro doŋ mom; wan doŋ orom wunu aroma i jo oto.’

¹²Pi mannono myero irab kop, ikobbigi kop man ame an Rwot Obaŋa akobo: Nen ba, abino yabo lyelewu ate miyowu ya malo oko i lyelwu-nono, ama wun jona. Abino dwogowu paco i lobo a jo Icrael.

¹³Mannono bino miyo iŋeo wunu ni an a Rwot, ka ce ayabo lyel ame yam oyikowu iye, ate miyowu ya malo, wun jona.

¹⁴Abino keto Cuny Acil i yiwu, eka ite cako bedo wunu kwo, ate ketowu daŋ i lobowu ikome. Mannono bino miyo iŋeo wunu ni an a Rwot. An atyeko ciko ni abino timo, daŋ abino timo, Man kop ame Rwot okobo.”

¹⁵Rwot dok te kop keda, kun kobo ni,

¹⁶“Wot a dano we, Kwany abiro moro me yat, ite coyo kome ni, ‘Pi loc a jo Juda’. Ite kwanyo dok abiro okene, ite coyo kome ni, ‘Loc a jo Icrael’.

¹⁷Kwany abiro aryo-nono imak i ciŋi, me gin aryo luŋ onen acalo abiro acel.

¹⁸Ka ce joni bino penyi ni, ‘Mom itwero nyuttiwa te kop me gin ame itimo-nono?’

¹⁹Yin myero ikobbigi ni, ‘Rwot Obaŋa okobo kop man ni: Nen ba, an aceggi kwanyo abiro ame ocuŋ pi jo Icrael, ate keto karacel abiro ame tye pi jo Juda. I kom abiro aryonono, abino miyo doko abiro acel keken an ate mako i ciŋa.’

²⁰“Mak abiro aryo ame ico komginono i ciŋi, mi lwak nengi.

²¹Kobbi lwak kop man ame Rwot Obaŋa okobo: Nen ba, abino kwanyo jo Icrael i akina rok ocele kan ame gin tye iye, abino cokogi i kabedo ducu ame gin tye iye, ate kelogi i lobogi i komgi;

²²abino miyogi odoko rok acel, i lobogi-nono, i wii kiddi me Icrael, dok abaka acel en a bino loyogi luŋ. Gin mom dok bino medde bedo rok aryo apapat, dok daŋ mom obino medde bedo i te loc aryo.

²³Mom dok obino medde jebere kengi i cal jogi, akadi kit balloro ocele, abino larogi i yo luŋ ame yam gin opoto iye, kun otimo kit bal apapat, ate lonyogi bedo acil. Gin bino bedo jona, an abino bedo Obaŋagi.

²⁴“Amirona Daudi en ame bino bedo abaka ame loogi; gin luŋ obino bedo akwat acel. Obino lubo ginnoro luŋ ame an aciko, kun daŋ ogwokere i lubo cikka.

²⁵Gin bino bedo i lobo ame rik kwarigi obedo iye, ame rik amio baŋ amirona Yakobo. Gin karacel kede itinogi kede ikwaegi bino bedo kuno nakanaka, dok amirona Daudi en ame bino bedo rwot ame loogi atwal.

²⁶Abino cikere kedgi cikere me kuc, cikerena kedgi-nono bino bedo cikere ame bedo nakanaka, abino miyogi winyo, ate miyogi nya, ate keto ot me wora i akinagi, ame bino bedo iye atwal.

²⁷Kan ame an abino bedo iye, abino bedo i akinagi, an abino bedo Obaŋagi, gin obino bedo jona.

²⁸Mannono bino miyo rok ocele ŋeo ni an a Rwot en ame alonyo jo Icrael, ka ce kabedona acil tye akinagi nakanaka.”