Read lango Ejekeri 38 Bible Online

Ejekeri 38 - lango bible

Ejekeri 38

¹Rwot dok te kop keda, kun kobo ni,

²“Wot a dano we, koŋ dok i lokere inen Gog, ame tye i lobo me Magog. En obedo aloc adwoŋ ame loo rok apapat ame tye i Mecek, kede Tubal. Rab kop i kome,

³kun ikobo kop man ame Rwot Obaŋa okobo: Nen ba, an atye i kop i komi yin Gog, yin ame ibedo Rwot adwoŋ ame loo rok apapat ame tye i Mecek, kede i Tubal.

⁴Abino lokki ineno ŋei, ate rwako golo me rec i cwaki, ate wayi kede karacel i monnyi, kede aguragurani, kede oryem aguragurani, kun gin luŋ oruko jami me lweny, dok lwak jo adwoŋ meicel, dok gin luŋ omako nyony me geno kor kede kwode kede pala lwenyogo ame ameny amenya.

⁵Jo ame oya i Pacia, Eciopia, kede Libia, daŋ tye baŋi kuno kun gin luŋ daŋ otye i kwode kede tok nyonyo me geno wigi.

⁶Olweny luŋ ame oya i lobo me Gomer, kede en ame oya i Bet-togarma, ame tye kannabor meicel tutuŋ anyarodi, daŋ tye baŋi kuno, karacel kede jo ocele ame oya i rok apapat.

⁷“Bed ame itere oko, kun itye ame iyikere oko karacel i monnyi luŋ, ame ocokere baŋi, kun gin luŋ otye i te gwokki.

⁸Ka mwaka doŋ okato bubup, kare bino tuno ame abino cikke me tero olweny i lobo ame jo obedo bedo iye aboŋo gin ame miogi lworo acalo lweny cakere i kare ame odwogogi cen i lobogi i akina rok ocele, en bino cobo lweny i kom kiddi me Icrael, ame onwoŋo obedo acalo wi obur kare alac, jo mere rik ote kela akela i akina rok ocele, cite aman doŋ gin luŋ obedo aber i kuc.

⁹Ibino mol wunu calo yamo kot, kun icalo wunu pol ame owumo piny, yin karacel kede monnyi, kede jo ame oya i rok apapat ame tye baŋi.

¹⁰“Rwot Obaŋa okobo kop man ni, I nino-nono kop bino bino i cunyi, ite cako paro pi timo timmogo areco i cunyi.

¹¹Ibino cako moko tammi me cobo lweny i kom lobo ame konyere mom ame jo iye bedo mot i kuc, i kom boma mogo ame mom daŋ ocelo, dok ame mom daŋ tye kede gigi mogo me konyogi i kare me lweny.

¹²Ibino yako jami karacel kede jo ame bedo i boma mogo ame rik tye acalo wi obur, ame jo iye rik ocoko acoka i rok ocele, ame aman doŋ otye i leyi akwo karacel kede jami, ame jo mere bedo i cuny lobo.

¹³Ceba kede Dedan kede ocatwil Tarcic, kede luŋ ame tye iye, bino kobbi ni, ‘Ibino me bino yako jami? Icoko lwak jo a rom man me bino ye yo yec, me bino ye yo ryal kede jabu, me bino tero dok kede jami, me iyak jami abup meicel?’

¹⁴“Pi mannono ba, wot a dano we, rab kop man ame Rwot Obaŋa okobo, ikobbi Gog ni, ‘I kare-nono ame jona Icrael bino bedo i kuc, yin ibino cako tugere keni,

¹⁵ite ya i kan ame itye iye i kannabor meicel i tutuŋ anyarodi, yin karacel kede jo apol ame oya i rok apapat, kun gin luŋ otye oriŋo aguragura, lwak mony adwoŋ dok ame tek meicel i lweny.

¹⁶Yin ibino bino wunu i komjona Icrael calo pol ame owumo piny; i kare ame mwaka doŋ okato alalac, an abino miyo ibino me bino lweny i kom jona, me rok ocele neka ce an abino tic kedi me nyuto ni an acil.’

¹⁷“Man kop ame Rwot Obaŋa okobo: Man en ŋat ame rik an akobo kop i kome kare okato, kun amio omirona odwarpiny me Icrael kobo, ame gin obedo rabo kare alac, ni mannono an abino keli me bino lweny i komgi?

¹⁸Cite i nino-nono, i kare ame Gog bino bino me lweny i kom Icrael, akemona bino tugere. Man kop ame Rwot Obaŋa okobo.

¹⁹Pien i kare-nono, ame nyeko nwoŋo omaka, dok akemona daŋ doŋ olyeto meicel, abino rabo kop, lobo me Icrael bino yeŋere meicel i kare-naca.

²⁰Rec ame tye i nam, winy ame twarre malo, leyi ame bedo i tim, jami luŋ ame lak alaka i lobo, karacel kede jo luŋ ame nwoŋo tye i wi lobo, gin luŋ komgi bino myel meicel i nyima. Kiddi luŋ bino rutte oko piny, ateni kiddi daŋ bino rutte oko piny dok apama moro luŋ ame tye daŋ bino rette oko piny.

²¹Abino miyo kit lworo moro luŋ bino i kom Gog, dok ŋat acel acel bino tiŋo jami lwennyere me neko ominnere. Man kop ame Rwot Obaŋa okobo,

²²Abino cako ŋolo kop i kome i too edeke, kede to me pala lweny. Abino coro kot ager meicel, kede pee, kede mac, gweŋ kibiriti i kome karacel kede i kom monnyere, kede i kom rok ocele luŋ ame tye tutuŋ baŋe.

²³Man bino miyo anyutti rok apol apapat twon tekona adwoŋ, kede kite ame acil kede. Mannono bino miyo gin oŋeo ni an a Rwot.”