Read lango Ejekeri 39 Bible Online

Ejekeri 39 - lango bible

Ejekeri 39

¹“Yin wot a dano we, rab kop i kom Gog, ikobbe kop man ame an Rwot Obaŋa akobo: Nen ba, an atye i kop i komi, yin Gog, yin i rwot adwoŋ ame loo rwode ame tye i Mecek kede i Tuban.

²Abino miyi ilokere ineno ŋei, ate cako ryemi wot anyim, ate keli i lobo ame tye kannabor, tutuŋ anyarodi, ate teri me wot cako lweny i kom kiddi me Icrael.

³Abino goyo akud ateroni oko i ciŋi tuŋ cam, ate miyo ateroni oony oko luŋ i ciŋi tuŋ cem.

⁴Ibino to i wi kiddi me Icrael kuno, yin karacel kede monnyi, kede rok ocele luŋ ame tye tutuŋ baŋi. Abino miyo kit winy apapat camo komi, leyi me tim daŋ bino mwodowu.

⁵Komwu bino radde i dye bar ata; pien an a Rwot Obaŋa doŋ atyeko kobo.

⁶Abino cwalo mac i wi kidi me Magog, karacel kede i kom jo ame bedo i kuc i lobo ame tye i dog nam; gin bino ŋeyo ni an abedo Rwot.

⁷“Abino miyo nyiŋa acil ŋeye i akina jona Icrael, mom dok abino ye ni bal nyiŋa kadi acel, dok rok ocele bino ŋeyo ni an a Rwot, ŋat Acil me Icrael.

⁸Nen ba, nino ame akobo-nono, tye abino, abino miyo bino. Man kop ame Rwot Obaŋa okobo.

⁹“Jo ame bedo i boma luŋ me Icrael, bino wot, te wot coko jami lweny ame jo oweko. Gin bino moko mac, kun okuto i kwode akud atero, atero, pale, kede toŋ, ame maccere romo lyel pi mwaka abiro twal.

¹⁰Gin mom dok bino coko yen ame tye i dye poto, akadi toŋo en ame tye i buŋ, pien gin bino kuto macgi ka i jami me lweny keken. Gin bino yako jami a jo ame yam koŋ oyako daŋ jamigi, Man kop ame Rwot Obaŋa okobo.

¹¹“I nino-nono abino miyo Gog kabedo mere me yike iyi Icrael, i luŋ ame olwoŋo ni luŋ Owot ame tye tutuŋ kide me Nam me kado ame geŋo owot. Gog karacel kede monnyere luŋ obino yikogi kuno, eka luŋŋono ote doŋ lwoŋo ni, ‘Luŋ a mony a Gog.’

¹²Jo Icrael bino bedo yiko komgi pi dwete a romo abiro twal, me wek lobogi bed lobo ame cil.

¹³Ŋat acel acel ame tye i lobo-naca bino konyo tic me yiko komgi, dok obino worogi pi tic man ame gin otio, dok abino nyuto kwogona iye. Man kop ame an Rwot Obaŋa atyeko kobo.

¹⁴I kare ame dwete abiro doŋ otyeko tum oko, obino yero jo mogo me be bea i lobo-nono, me wek ka gin onwoŋo komjo mogo ame mom oyiko, oyik oko, me wek omi lobo bed acil.

¹⁵I kare ame jo-nono tye ka be bea i lobo, ka ce ŋattoro i kingi ocop i cogo kom ŋattoro, en keto ginnoro me nyuto ni cogo kom dano tye kannono, tuno waŋ ame okuny bur obino te kwanyo cogo kom danonono wot yiko i Luŋ me mony a Gog.

¹⁶Boma moro tye ame ceggi i kuno daŋ ame olwoŋo ni Kamona, mannono en kite ame gin bino lonyo kede lobogi bedo acil.

¹⁷“Aco yin wot a dano we, Rwot Obaŋa okobo ni, Kob kop baŋ kit winy luŋ kede leyi me tim luŋ ni, ‘Cokere wunu i kabedo ducu, me ibin icam wunu arama me ecuban ame ayiko pirwu twon ecuban moro adwoŋ meicel, ame ayiko i wi kiddi me Icrael, kan ame ibino camo wunu iye riŋo, dok daŋ ibino mato wunu iye remo,

¹⁸Ibino camo wunu riŋo kom jo mogo ame onwoŋo tek meicel i lweny, ite daŋ mato wunu remo a rwode apapat me wi lobo ame gin luŋ obino nekogi calo itino rommi, onyo nyogi rommi kede nyogi dyegi onyo twoni dokkogo ame ocwe, kun gin luŋ otye acalo leyi ocwe me Bacan.

¹⁹Ibino camo wunu riŋo tuno wan ame yiwu doŋ oden, dok daŋ ibino mato wunu remo te merowu oko iyi ecuban ame an ayiko pirwu.

²⁰I mejana ame ayiko pirwu-nono ibino yeŋ wunu i remo aguragura, onyo kom oryem aguragura, riŋo kom twoni jo mogo ame tek meicel i lweny, karacel kede riŋo kom ocirikale ducu.’ Man kop ame Rwot Obaŋa okobo.

²¹“Mannono bino miyo aketo kwogona i akina orok, rok apapat luŋ te neno kop ame an aŋolo, kede ciŋa ame atimogi kede lit.

²²Cakere i nino-nono wot kede anyim, jo Icrael bino ŋeyo ni an a Rwot Obaŋagi,

²³Dok rok ocele bino ŋeyo ni rik oterogi iyi opii pi balgi kede timogo me idwali ame gin obedo timo i koma, an alokkigi ŋea, ate miyo okwor makogi, jo apol i akinagi ote neko oko i pala lweny.

²⁴Abedo tic kedgi kun alubo kitegi ame mom cil, kede balgi, ate pono gira oko i waŋgi.

²⁵“Mannono omio Rwot Obaŋa okobo kop man ni, ‘Aman doŋ abino dwoggo kuc a Yakobo, kica te maka i kom jo me ot Icrael luŋ, kun nyeko maka pi nyiŋa acil.

²⁶Wigi bino wil oko i kom lewic ame onwoŋo gin tye kede, kede timmogo me idwali, ame gin obedo timo i koma, ka doŋ gin bino cako bedo i kuc i lobogi aboŋo ŋattoro ame miogi lworo.

²⁷Abino dwoggogi cen i akina rok apapat ame gin tye iye, i lobo okworgi, kun atio kedgi me nyuto ni an acil i nyim rok ocele luŋ.

²⁸Mannono bino miyo gin oŋeo ni an a Rwot Obaŋagi, pien acwaogi iyi opii akina i rok ocele, ate dok cokogi dwoggogi cen i lobogi ikomgi. Mom abino weko ŋattoro i akinagi doŋ i rok ocele.

²⁹I kare ame abino onyo Cunya Acil i kom jo me ot Icrael, mom dok abino medde ponnigi kadi acel.’ Man kop ame Rwot Obaŋa okobo.”