Read lango Ejekeri 4 Bible Online

Ejekeri 4 - lango bible

Ejekeri 4

¹Obaŋa okobba ni, “Yin wot a dano, kwany matafali, ite keto i nyimi, ite goyo cal boma me Jerucalem iye.

²Tor lobo igur dyere, i te cweyo cel guro matafali nono oko, ite toro lobo yido i nyimi, dok icwe daŋ cal gony omony, ket daŋ yen me tuco kor apama cel man luŋ.

³Kwany nyonyo apada ite keto acalo apama ame ogero i nyonyo i akina yin kede cal boma ame igo-nono, ite cuŋ kun nyimi oneno kuno; mi bed calo boma ame mony doŋ oguro oko, kun yin itye acalo ŋat ame oguro boma-nono. Man en ame bino cimmi jo Icrael gin ame bino timere i komgi.

⁴“Yin doŋ but piny i ciŋi me tutuŋ cem, an abino keto i komi can ame onwoŋo myero aket i kom jo Icrael; pi nino mia acel i pyeraboŋwen.

⁵Pien yin ibino yeyo can a jo Icrael i kare ame nwoŋo ibuto pinnyono, pien mannono en nino ame doŋ atyeko moko piri, ame rom aroma kede mwakki me keto can i komgi.

⁶Kare ame doŋ ityeko nino ame akobo, dok ibino buto piny tyen me aryo mere, cite man doŋ ibino buto i ciŋi tutuŋ cam, kun iyeo can a jo Juda, ibino buto kittono pi nino pyeraŋwen ame doŋ atyeko moko piri, ame nino acel acel rom aroma i mwaka acel acel.

⁷Ibino loko nyimi neno tutuŋ boma me Jerucalem ame mony doŋ otyeko turo, kun badi tye nono. Ibino rabo kop i kom boma-nono.

⁸Nen ba, abino tweyi oko kede tol ame mom iromo lokere kadi acel tuŋ ocele, tuno ka ityeko kare ame amoko me guro boma.

⁹“Kwany ŋano kede cayiri, oraŋa kede ŋor, kal karacel kede bel, pikgi luŋ i gulu acel, ite tedo acalo ogati. I kare ame ibino buto piny ibino buto kun ibuto i laŋeti, kare mere bino bedo ame romo nino mia adek i pyeraboŋwen, yin ibino bedo camo ogatinono.

¹⁰Cem ame yin ibino camo, obino pimo apima, ibino camo cam ame pekkere romo nucu ratili keken nino acel acel kun daŋ icemo icel keken nino acel.

¹¹Pii ame yin ibino mato daŋ obino pimo apima. Ibino mato pii aduno, ame romo kopo aryo keken i nino acel acel, kun daŋ imato icel keken nina acel.

¹²Ibino camo calo ogati ame otedo i cayiri, kun icelo i nyimgi i kom cet a dano.”

¹³Rwot te kobo kop ni, “Mannono en kite ame rok me Icrael bino camo kede ogati a mom cil, i akina rok ocele ame abino ryemogi terogi iye.”

¹⁴An ate gamo ni, pe amannono, Rwot Obaŋa! Nen ba, an anaka mom ru alille i ginnoro kadi acel. Cakere ame pwod atidi, mom ru acamo ginnoro ame oto kene, onyo ame lee tim oneko, riŋo moro me kwer daŋ mom ru otuno i doga.

¹⁵Rwot te kobba ni, “Nen ba, an abino miyi woo dyaŋ akaka cet a dano, en ame yin ibino tedo kede ogatini.”

¹⁶Medo i mannono, Rwot dok te kobba ni, “Nen ba wot a dano, abino miyo ogati rwenyo oko i Jerucalem. Jo me Jerucalem bino camo ogati ame opimo apima, dok obino camo lworo lworo; obino daŋ mato pii ame opimo apima, kun daŋ omato ame cunygi apoto apota.

¹⁷Abinsso timo man me wek ogati kede pii rweny oko i baŋgi, ŋat acel acel te cako ŋweco awottere ame cunye apoto apota, tekogi te tum oko pi balgi.