Read lango Ejekeri 40 Bible Online

Ejekeri 40 - lango bible

Ejekeri 40

¹I nino dwe apar me mwaka anyen, i mwaka me pyeraryo wie abic, ame onwoŋo wan doŋ oterowa oko iyi opii, i mwaka me apar wie aŋwen, ame onwoŋo doŋ otyeko mako Jerucalem oko, i nino-nono ikome awinyo teko Obaŋa tye i koma,

²ame te kwanya tera oko teŋe i anyut ame Obaŋa onyutta-nono te tera naka iyi Icrael, te wot ciba i wi kidi moro abor meicel. I ŋea kuno ate neno gedo mogo ame oradde atata, ame nen caloboma.

³I kare ame anoko ceggi, ate neno lo moro ame kome nen calo mola ame ameny. Dano-nono onwoŋo omako tol kede ogada me pimo jami i ciŋe, kun tye ocuŋ i dogcel me boma.

⁴Dano-nono te kobba ni, “Wot a dano we, koŋ doŋ inen kede waŋi, dok daŋ iwiny kede yiti, ite keto cunyi i kom ginnoro luŋ ame an abino nyutti, pien okeli kan ni mannono an abin anyuttigi. Myero ŋeli ni ikobo ginnoro luŋ ame ineno baŋ jo Icrael.”

⁵Nen ba, ginnogo ame aneno onwoŋo obedo ot Obaŋa ame cel ame ogero apama oguro oko dyere. Dano-nono te kwanyo ogada ame onwoŋo tye i ciŋe, ame borrere onwoŋo tye futi apar, eka te pimo kede apama cel. Borrere malo onwoŋo tye futi apar, kun lac a kor apama tye daŋ futi apar.

⁶Danonono te ya wot i doggola ame tye tutuŋ kide, En te wot malo kun woto kede rwom me dogcel, i malo kuno en te pimo dogcel me boma, ame borrere onwoŋo tye daŋ futi apar.

⁷Iyi doggola kuno onwoŋo tye icika adek adek tuŋŋi i tuŋŋi kede yo ame beo i akinagi. Icika acel acel borrere romo futi apar, laccere daŋ futi apar. Apama cel ame poko kin icika acel acel laccere onwoŋo tye futi aboro. Ka doŋ ikato icika adek adek-ca ite doŋ medo wot futi apar ocele ite tuno iyi icika moro alaccere ame tye i nyim ot Obaŋa.

⁸En te pimo icika alaccono te nwoŋo ni tye futi apar wie aryo.

⁹Kannono obedo tyelo iyi agikki dogcel tutuŋ dyekal me ot Obaŋa. Dit me kom apama me tuŋ yie onwoŋo romo futi aryo.

¹⁰Icika adek adek ame onwoŋo tye i dogcel me tuŋ kide tuŋŋi i tuŋŋi, gin luŋ ditogi onwoŋo rorom apama cel ame onwoŋo opokogi daŋ onwoŋo rorom.

¹¹Dano-nono dok te pimo lac me yo ame beo iyi dogcel, te nwoŋo ni romo futi pyeraryo wie aryo, eka lac me doggola ikome onwoŋo tye futi apar wie abicel.

¹²I nyim icika tuŋŋi i tuŋŋi onwoŋo tye iye apama moro acecek ame romo iŋcec pyeraryo. Lac icika magi onwoŋo tye futi apar apar, borgi daŋ futi apar apar.

¹³En dok te pimo lac me dogcel ari ame ya iyi icikaacel tuno kede iyi en ocele ame otemere kede, kun beo i doggolagi, onwoŋo tye futi pyeraŋwen.

¹⁴Te dok pimo ici ka alac ame tye i agikki mere, te nwoŋo ni laccere tye futi pyeradek wie aryo.

¹⁵Cakere i tuŋ nyim dogcel ame tye oko kan ame odonyo iye tuno iyi agikki ici ka alac ame tye tyeloborrere luŋ onwoŋo tye futi pyeraboro.

¹⁶Dirica onwoŋo tye iyi icika luŋ i apama cel ame i oko mere, kede i apama cel ame pokogi, kede icika alaccere daŋ. Dirica-nono onwoŋo nen atitino i oko, cite iyi ot onwoŋo lac. I apama cel ame poko icika onwoŋo ogoro iye cal yen otit.

¹⁷Dano-nono dok te tera i dyekal me ot Obaŋa ame tye i oko mere. I kor apama me dyekallono onwoŋo tye icika apapat ame romo pyeradek, kun icika acel acel okubere i wadgi, dok i nyim icika acel acel opepeto iye gweŋ apada ame omano dyekal amana.

¹⁸Gweŋ ame opepeto-nono obedo i ŋet dogcel ducu kun laccere rom i bor me dogcel. Man onwoŋo gweŋ ame opepeto i dyekal me tuŋ pinnyere.

¹⁹Dano-nono dok te pimo bor a piny cakere kede i nyim dogcel ame tye tuŋ piny tuno kede i nyim dogcel me dyekal i yie, te nwoŋo ni romo futi mia acel i pyeracel.

²⁰En dok te telo nyima me wot tutuŋ anyarodi, kuno onwoŋo tye iye dogcel ame nyime oneno tutuŋ anyarodi, i dyekal me oko. En te pimo borrere kede de laccere.

²¹Icika atitino adek onwoŋo tye i yie tuŋŋi i tuŋŋi, kun apama daŋ tye ame opopokogi. Lac kede bor icika kede me apama ame opokkigi kede me icika alaccere rom aroma i en ame tye i tuŋ kide. Bor a dogcel luŋ onwoŋo tye futi apyeraboro, kun laccere tye futi pyeraŋwen.

²²Icika alaccere, dirica luŋ a tye iye, kede cal yen otit ame onwoŋo tye okwogo kede, onwoŋo daŋ rom aroma i en ame tye tutuŋ kide, dok rwom abiro apapat daŋ onwoŋo tye me yito malo naka i dogcel, eka icika alaccere te bedo i agikki mere kun otemere i dyekal.

²³I nyim dogcel ame tye tutuŋ anyarodi onwoŋo tye iye doggola ocele mere ame kato i dyekal i yie, kite ame tye i maca ame tye tutuŋ kide. Danonono dok te pimo bor ame tye i akina dogcel aryo-nono luŋ, te nwoŋo tye futi mia acel i pyerabicel.

²⁴En dok te kwanya tera tutuŋ anyarolum. I kuno daŋ dok ate neno dogcel okene. En te pimo icika atino mege, kede apama ame opopokogi kede icika alaccere, te nwoŋo ni gin luŋ orom aroma i en ocele mege ame egeo pimo,

²⁵Dirica daŋ onwoŋo tye iyi icika atitino ame onwoŋo tye i dogcel kite ame onwoŋo iyi maca ocele-ca, dogcellono daŋ borrere onwoŋo tye futi pyeraboro, laccere futi pyeraŋwen.

²⁶Rwom abiro daŋ onwoŋo tye me yito malo i dogcel, icika alaccere daŋ te bedo agikki mere ame otemere i dyekal. Cal yen otit daŋ onwoŋo tye ame okwogo kene kor apama me yie, kede acel tuŋ cel.

²⁷Dogcel ocele onwoŋo tye tutuŋ anyarolum ame kato i dyekal i yie. Dano-nono daŋ te pimo bor ame tye i akina dogcel aryo-nono luŋ, te nwoŋo ni tye futi mia acel i pyerabicel.

²⁸Dok te tera naka i dyekal ame tye i yie kun obeo i dogcel ame tye tutuŋ anyarolum. En te pimo dogcellono te nwoŋo ni rom aroma i en ocele-ca.

²⁹Icika atitino ame tye i ŋete kede icika alaccere, karacel kede apama mere me yie kuno, onwoŋo rom aroma i en ocele-ca, dirica onwoŋo tye iyi icika mere atitino kede i icika alaccere; dogcellono daŋ borrere onwoŋo tye futi pyeraboro, laccere daŋ futi pyeraŋwen.

³⁰Icika ocele daŋ onwoŋo tye i ŋete ame borgi futi pyeraŋwen, lacgi futi aboro.

³¹Icika alac ame onwoŋo tye iye onwoŋo otikere i dyekal alac ame onwoŋo tye oko, cal yen otit daŋ onwoŋo tye ame okwogo kede kor apama me yie. Rwom ame woto i dogcel onwoŋo tye aboro.

³²En dok te tera naka i dyekal ame tye i yie tutuŋ kide, eka te pimo dogcel te nwoŋo ni laccere kede borrere rom aroma ked kede en ocele-ca.

³³Icika atitino mere kede apama ame opokogi kede icika alaccere, lacgi kede borgi rom aroma i en ocele-ca. Dirica onwoŋo tye iyi icika mere atitino kede iyi icika alaccere; dogcellono daŋ borrere onwoŋo tye futi pyeraboro, laccere futi pyeraŋwen.

³⁴Icika alac ame onwoŋo tye iye onwoŋo otikere i dyekal alac me oko. Cal yen otit daŋ onwoŋo tye ame okwogo kede kor apama me yie, acel tuŋ cel kede acel tuŋ cel; Rwom ame woto i dogcelli onwoŋo tye aboro.

³⁵Dok te tera i dogcel ame tye tuŋ anyarodi. En opimo te nwoŋo ni borrere kede laccere rom aroma i en ocele-ca.

³⁶Icika atitino mere, kede apama ame opopokogi kede icika alaccere, lacgi kede borgi onwoŋo daŋ rom aroma i en ocele-ca. Dirica onwoŋo tye iyi icika mere atitino; dogcellono daŋ borrere onwoŋo tye futi pyeraboro, laccere te bedo futi pyeraŋwen.

³⁷Icika alac ame onwoŋo tye iye onwoŋo otikere i dyekal alac me oko, cal yen otit daŋ onwoŋo tye ame okwogo kede kor apama me yie, acel tuŋ cel, kede acel tuŋ cel. Rwom me yito malo dogcellidaŋ onwoŋo tye aboro.

³⁸I dyekal i oko mere onwoŋo tye iye icika moro ame doggola mere woto iyi icika alaccere ame otikere i dyekal i oko. Mannono obedo kan ame rik olwoko iye riŋo leyi ame oneko me mot awaŋa ame owaŋo alutu.

³⁹Iyi icika alac me dogcel onwoŋo tye iye meja aŋwen, aryo tuŋ cel, aryo tuŋ ocele. I meja magi en ame oneko iye leyi ame oyalo Obaŋa, kadi bed leyi ame oyalo Obaŋa calo mot awaŋa, onyo mot me kwanyo bal, onyo me walakino i roc, gin luŋ rik onekogi i maja magi.

⁴⁰I ŋe icika-nono, i oko mere, daŋ onwoŋo tye iye meja aŋwen, aryo onwoŋo tye i dogcel me donyo ame tye tutuŋ anyarodi, aryo daŋ tuŋ ocele.

⁴¹Meja aŋwen onwoŋo tye iyi icika kede meja aŋwen onwoŋo tye oko, ame gin luŋ te bedo meja aboro; gin luŋ onwoŋo tye me neko leyi ame oyalo kede Obaŋa.

⁴²Meja aŋwen onwoŋo tye me yiko mot ame myero wan alutu, ame gin meja-nono otio kede gweŋ ame opao, borgi malo onwoŋo tye iŋcec pyeraryo, lac me wie te bedo iŋcec pyeradek i twoke aŋwen ducu; jami luŋ ame rik otio kedgi me yalo Obaŋa-ni, gin luŋ rik obedo i wi meja magi.

⁴³Golo mogo ame lacgi tye iŋcec aŋwen aŋwen, onwoŋo tye i lak mejanono luŋ, ame oromo aroma niirit. Rujo luŋ ame onwoŋo rik myero mi acalo mol, rik oketo i wi meja.

⁴⁴Dano-nono dok te tera i dyekal ame tye i yie. Onwoŋo tye iye icika moro kuno i ŋet dogcel ame tye tutuŋ anyarodi; doggola mere okemo tutuŋ anyarolum. Icika ocele ame onwoŋo romo aroma i mannono onwoŋo daŋ tye i dogcel ame tye tutuŋ anyarolum, kun kemo tutuŋ anyarodi.

⁴⁵Dano-nono rik te kobba ni, icika ame kemo tutuŋ anyarolum onwoŋo tye pi olamdog ame tio ticgi i ot Obaŋa,

⁴⁶kede icika ame onwoŋo kemo tutuŋ anyarodi, onwoŋo tye pi olamdog ame onwoŋo tio tic pi keno lam. Gin luŋ onwoŋo obedo ikwae a Jadok; gin keken i akina ikwae a Levi ame onwoŋo oyeyigi me wot tic i nyim Rwot ikokome.

⁴⁷Dano-nono dok te pimo dyekal ame tye iyie, te nwoŋo borrere tye futi mia acel kede pyerabicel, laccere daŋ futi mia acel kede pyerabicel.

⁴⁸En dok te tera i doggola ame donyo i ot Obaŋa. En te pimo doggola me donyo iye, te nwoŋo borrere tye futi aboro, laccere futi pyeraryo wie adek, eka lac apama mere te bedo futi abic.

⁴⁹Icika ame tye i doggola onwoŋo borrere tye futi pyeradek wie aryo, eka laccere ŋolo dyere te bedo futi apar wie aboŋwen, kun rwom me yito malo daŋ tye ame romo apar. Pagi daŋ onwoŋo tye i ŋet kika, tuŋŋi i tuŋŋi.