Read lango Ejekeri 41 Bible Online

Ejekeri 41 - lango bible

Ejekeri 41

¹Dano-nono dok te tera iyi icika ame tye i dyere. En te pimo yo ame woto iye, te nwoŋo borrere tye futi apar,

²kun laccere tye apar wie abicel, lac apama te bedo futi aboro, tuŋŋi i tuŋŋi. En dok te pimo icika i dyere-nono, te nwoŋo borrere tye futi pyerabicel wie aŋwen, laccere futi pyeradek wie aryo.

³Te kato keda doŋ iyi icika me agikki mere, En te pimo yo ame woto iye, borrere onwoŋo tye futi adek, laccere futi apar, kun lac a kor apama tuŋŋi i tuŋŋi tye futi apar wie acel.

⁴En dok te pimo icika me agikki-nono ame laccere kede borrere onwoŋo tye futi pyeradek wie aryo, En dano-nono te kobba ni, “Man en ame doŋ obedo Kabedo Acil Meicel.”

⁵En dok te pimo lac a kor apama me ot Obaŋa, te nwoŋo tye futi apar. I kor apama me ot Obaŋa-ni luŋ rwomere irit, onwoŋo tye iye icika mogo ati tino, ame lacgi onwoŋo tye futi abicel.

⁶Icika magi onwoŋo okubere akuba i wi wadgi adek adek, kun tye icika pyeradek pyeradek iyi acel acel. Lac a kor apama i malo mere woto kun doko atitidi, me wek pe mi peko baŋ apama ame tye piny.

⁷Rwom onwoŋo tye i oko mege me yito malo icika i malo mege ame tye i kor apama me ot Obaŋa. Pi icika magi ame tye i malo-ni, omio kor apama me ot Obaŋa nen i oko ame rom aroma naka malo. Mannono onwoŋo mio bedo yot meicel me yito malo i icika i dyere kede icika me agikki.

⁸Ate neno ni kabedo ame oguro ot Obaŋa otiŋere malo ame kato kabedo luŋ ame tye i ŋete i futi apar, kun rom aroma kede acakki me te icika ame tye i kom apama cel me ot Obaŋa, kabedo luŋ ame tye i ŋete i futi apar, kun rom aroma kede acakki me te icika ame tye i kom apama cel me ot Obaŋa.

⁹Lac a kor apama ame tye oko, me wudi atitino ame tye i kom apama cel me ot Obaŋa, onwoŋo tye futi aboro,

¹⁰tye daŋ kan ame onwoŋo oweko obedo a twolo, ame oguro ot Obaŋa, ame laccere onwoŋo tye futi pyeradek wie aryo,

¹¹cakere i bur me mola a pii tuno kede i udi ame olamdog tio kede, yo onwoŋo tye acel ame woto iyi icika ame tye iyi apama cel me ot Obaŋa i tutuŋ anyarodi, kede yo acel ame tye ame woto iyi icika ame tye tutuŋ anyarolum, Bur me mol a pii ame tye i ŋet ot cel me ot Obaŋa, laccere onwoŋo tye futi aboro.

¹²Ot ame onwoŋo otikere i dyekal me ot Obaŋa, ame tye tutuŋ to, laccere onwoŋo tye futi mia acel apar wie aryo i kom futi mia acel i pyeraŋwen wie aŋwen. Lac a kor apama mere onwoŋo tye futi aboro.

¹³Dano-nono dok te pimo ot Obaŋa i oko mere, te nwoŋo borrere tye futi mia acel i pyerabicel, cakere i ŋe ot Obaŋa oko, ŋolo dyekal, kato naka tuŋ ocele, borrere daŋ onwoŋo tye futi mia acel i pyerabicel.

¹⁴Acoborrere i tutuŋ nyime, kun omedo kede kan ame oweko twolo, onwoŋo daŋ tye futi mia acel i pyerabicel.

¹⁵En dok te pimo tuŋ ocele mere ame odoŋ, karacel kede apama mere, te nwoŋo daŋ tye futi mia acel i pyerabicel. Icika ame tye i doggola me donyo i ot Obaŋa, icika adwoŋŋere, kede Kabedo Acil Meicel,

¹⁶onwoŋo ocano iye bao cakere i piny naka i waŋ dirica. Dirica-ni onwoŋo otwero cego oko.

¹⁷Apama me ot Obaŋa iyie cakere i piny wot kede naka malo kan ame doggola ogiki iye, onwoŋo tye iye callogo ame ogogo,

¹⁸cal okerubi, kede cal yen otit. Me agege onwoŋo tye cal yen otit, cal le te lubo, te bedo lubere amannono nakanaka romo.

¹⁹Okerrubi acel acel onwoŋo tye i nyime aryo, nyime ame cal i nyim dano onwoŋo tye tutuŋ kan ame cal yat otit tye iye, eka tuŋ ame cal atin eŋatu, te bedo tuŋ ocele ame daŋ yat otit tye iye, cal ame ogoo i kor apama-nono onwoŋo tye kittono romo kor apama luŋ.

²⁰Cakere i dye ot tuno kede naka kan ame doggola ogik iye, yen me doggola me icika adwoŋŋere, borgi kede lacgi onwoŋo rorom.

²¹I nyim kabedo Acil Meicel, onwoŋo tye iye ginnoro ame nen calo,

²²keno lam ame opao apaa i bao. En dano-nono te kobba ni, “Man en meja ame bedo i nyim Rwot.”

²³Doggola onwoŋo tye ame woto iyi icika adwoŋŋere, kede doggola ocele ame woto i Kabedo Acil Meicel.

²⁴Kika me doggola-nono onwoŋo tye aryo aryo karacel, ame kika mere dolle dok tuŋ cel, acel daŋ dolle dok tuŋ ocele.

²⁵Kika me doggola-nono onwoŋo ogoro iye cal otit kede cal okerubi, kite ame ogoro kede i kor apama. Dok daŋ onwoŋo tye gin me cego ame owumo i bao i nyim icika ame tye i doggola i oko mere.

²⁶Dirica daŋ onwoŋo tye i kor apama me ottono, kun kor apama daŋ okwogo i cal yen otit.