Read lango Ejekeri 42 Bible Online

Ejekeri 42 - lango bible

Ejekeri 42

¹Dano-nono dok te kwanya tera oko i dyekal ame icika atitino tye iye, naka ot ame tye tutuŋ anyarodi.

²Bor a ot ame ogero icika atitino-nono, ame onwoŋo tye tutuŋ anyarodi-nono, onwoŋo tye futi mia acel i pyerabicel, laccere futi pyeraboro.

³I ŋete tuŋ cel otikere i kabedo ame oweko twolo i ŋet ot Obaŋa ame laccere onwoŋo tye futi pyeradek wie aryo, eka tuŋ ocele te tikere i kan ame opepeto iye gweŋe ame tye i dyekal i oko. Ottere onwoŋo ogero ame okubere akuba i wadgi adek, kun en i malo mere tye cen ame kato en i tere.

⁴I nyim icika-nono onwoŋo tye iye yo ame beo i yie, ame borrere tye futi mia acel i pyerabicel, laccere te bedo futi apar wie abicel, kun doggola luŋ me donyo iyi icika tye tutuŋ anyarodi.

⁵Icika ame tye malo onwoŋo tino ame kato en ame tye malo kede en i pinnyere, pien baraja ame i nyimgi, omio kabedogi obedo diŋ akato en i tere, en i dyere-ni daŋ obedo tino akato en i piny-ny pi yo ame i nyimgi.

⁶Pien icika-nono onwoŋo okubere akuba i wi wadgi adek, kun pagi moro mom me konyogi, acalo pagi ame tye i dyekal i oko.

⁷Apama onwoŋo tye i oko, ame owoto karacel kede icika. En apamanono tye tutuŋ dyekal i oko, kun otikere icika ocele, borrere tye futi pyeraboro,

⁸pien ot icika ame tye i ŋet dyekal i okoborrere onwoŋo daŋ tye futi pyeraboro, kun en ame otikere i ot Obaŋa borrere onwoŋo tye futi mia acel i pyerabicel.

⁹I te icika-ni piny, i tutuŋ kide, onwoŋo tye iye doggola ame odonyo iye kun nwoŋo obeo i dyekal i oko,

¹⁰kan ame apama i oko ocakere iye. I tutuŋ anyarolum, ame otikere kede dyekal ame yie nono, kan otikere daŋ i gedo ocele-ca, onwoŋo daŋ tye iye icika mogo ame ogegero.

¹¹I nyim icika-nogo onwoŋo tye iye yo me beo ame rom aroma i en ame tye tutuŋ anyarodi. Borgi kede lacgi onwoŋo dok otio a rom aroma i maca ocele-ca, anaka kit gedo mere luŋ, kun doggola luŋ ame tye iye daŋ rom aroma i macanaca.

¹²I te icika ame tye i tutuŋ anyarolum, doggola me donyo tye iye tutuŋ kide, kan ame odonyo i ye ame beo i yie, kun daŋ otikere apama.

¹³Dano-nono te kobba ni udi ame tye tutuŋ anyarodi, kede udi ame tye tutuŋ anyarolum ame otikere kede dyekal yie nono odoŋ twolo, obedo icika ame cil, kan ame olamdog ame woto i nyim Rwot bino camo iye cam acil ame oyalo kede Rwot. Gin bino keto iye mot acil me yalo Rwot kuno, mot me moko kwoŋ, mot me kwanyo bal, kede mot me walakino i roc, pien kabedo-nono cil.

¹⁴Ka olamdog woto i kabedo acil, koŋ bino gonyo boŋŋigi ame oruko pi tic Obaŋa ote wekogi kuno, mom ote wot i dyekal ame tye oko ame tye pi lwak kun pwod oruko boŋŋi me arukagi, pien bonŋigi-nono nwoŋo cil. Gin bino ruko boŋg ocele, kun mom ru gin onoko icika ame obedo me a lwak ducu.

¹⁵I kare ame dano-nono otyeko pimo gin ducu ame tye iyi apama cel ame oguro ot Obaŋa i yie, en te tera oko kun obeo i dogcel ame tye tutuŋ kide, en te wot pi mo ot Obaŋa i oko kuno.

¹⁶En te pimo i tutuŋ to, kun pimo kede ogada, te nwoŋo borrere tye futi mia aboro.

¹⁷En dok te lokere wot pimo cel ame tye tutuŋ anyarodi, te nwoŋo borrere daŋ tye futi mia aboro.

¹⁸Dok te lokere wot pimo en ame tye i tutuŋ anyarolum, borrere daŋ onwoŋo tye futi mia aboro.

¹⁹En dok te wot pimo en ame tye tutuŋ to, te nwoŋo borrere daŋ tye futi mia aboro,

²⁰En opimo twoke aŋwennono luŋ, ame onwoŋo apama cel oguro oko dyere, ame borgi onwoŋo ducu rom aroma futi mia aboro i kom mia aboro. Apama cel onwoŋo tye me poko gin ame cil kede gin ame mom cil.