Read lango Ejekeri 45 Bible Online

Ejekeri 45 - lango bible

Ejekeri 45

¹“Ka ce itye wunu ka poko lobo baŋ atekere acel acel, myero iko dul lobo moro doŋ acil calo gin ame omio baŋ Rwot. Dul ame oweko-nono myero bed mairo apar i kom mairo aboro. Kan ame owekonono bino bedo lobo acil.

²I kan ame oweko-nono myero bed iye dul lobo moro ame tye acalo lobo me ot a Rwot, ame laccere kede aria mere myero bed futi mia aboro. Mano ŋete ducu myero wek iye kan ame laccere tye futi pyeraboro.

³I kom lobo ame okoo-nono, myero pim kannoro pok kene, ame borrere tye mairo apar i kom mairo aŋwen, ot me wora bino bedo kannono, kannono en ame obino gero iye kabedo acil ame kato ducu.

⁴Mannono en ame bino bedo kabedo acil i lobo ame otyeko poko pi olamdog ame tye i kabedo acil me wora, Udi me butogi bino bedo iye, karacel kede kabedo acil ame tye pi oda.

⁵Medo i kom mannono, myero daŋ dok bed dul lobo mogo ocele ame tye mairo apar i kom mairo aŋwen ame otyeko poko oko ocalo lobo a jo Levi ame tio tic ocele i ot me wora. Boma mogo bino bedo iye kuno me bedogi.

⁶“Dok daŋ myero wek dul lobo moro ame tye pi boma, borrere myero bed mairo apar i kom mairo aryo, Dul lobo-nono myero en ame lub dul lobo ame cil meicel, dok dul lobo-nono bino bedo me a jo Icrael luŋ.

⁷“Dok dullogo ocele daŋ myero pok kene pi aloc. Cakere i kom dul lobo acil kede boma, dul lobo-nono bino wot naka i nam tuŋ to kede naka i wan apokki ame tye tutuŋ kide. Cakere i tuŋ kide wot kede tutuŋ to, borrere bino bedo ame rom aroma i dul lobo ame opoko baŋ atekere moro me Icrael.

⁸Dul lobo man bino bedo me aloc ame loo jo Icrael, i lobo me Icrael, me wek en kur dok wun jo, ento wek dul lobo ocele odoŋŋere luŋ bed me atekere me Icrael.

⁹“Rwot Obaŋa dok okobo ni, ‘Wun oloc me Icrael, doŋ ibala wunu wok do! Wek wunu doŋ timwu me kolo kede me wuno jo. Tim wunu doŋ gin aber ame tye atira. Myero kur dok imedde ryemo wunu jona oko i lobogi.’ Man kop ame an Rwot Obaŋa akobo.

¹⁰“Ŋat acel acel i akinawu myero bed i mijan me pimo jami ame pimo jami kakare, kede gi-pimo jami ocele mege ame tye kakare.

¹¹Gwata ame opimo i gin otwo, myero bed ame rom aroma i me pimo gin ame lio calo pii. Komere en ame bino bedo gi-pimo jami ame oporo i gin ocele ame opimo kede jami, pi mannono gin ame opimo i gin otwo myero bed rom i gin opimo i gin ame lio, ditogi myero bed arom aroma kede Komer.

¹²Kidi me pimo jamiwu bino bedo kit man: Gera pyeraryo rom aroma i cekel acel, cekel pyerabicel rom aroma i mina acel.

¹³“Man en kit mot me jami apapat ame ibino miyo wunu; ibino miyo wunu acel me pyerabicel me nano ame ikaa wunu,

¹⁴kede acel me pyerabicel me cayiri ame ikaa wunu, kede acel me mia acel me moo jeituni ame obio oya i kom nyig jeituni ame ocek i potoni.

¹⁵Ibino miyo romo acel i kom rommi mia ariyo ariyo, pi atekere luŋ Icrael. Man en mot me moko kwon ame ibino wunu kelo, mot awaŋa alutu kede mot me kweyo cuny, pi tiyo tic me kwanyo bal. Man kop ame an Rwot Obaŋa akobo.

¹⁶Jo luŋ me lobo me Icrael bino miyo mot man baŋ aloc ame tye iyi Icrael.

¹⁷Tic aloc obedo me miyo mot me leyi me awaŋa alutu, mot me moko kwon kede mot me amata i kare me ecuban, i kare me por adwe, i ceŋ me cabit ducu, kede i kare me ecuban adoŋo ducu ame ociko baŋ jo Icrael. En bino miyo mot me kwanyo bal, mot me moko kwon, mot me awaŋa alutu, kede mot me kweyo cuny, me tiyo tic me kwanyo bal i kom jo me Icrael.

¹⁸“Rwot Obaŋa okobo ni, I nino me agege me dwe me agege, ibino kwanyo twonnoro ame tidi ame mom i roccoro i kome, ite lonyo kede kabedo acil.

¹⁹Alamdog bino kwanyo remo mogo i kom mot ame omio me kwanyo bal, te totono i yen me doggola me ot Obaŋa i twoke aŋwen me keno lam, kede iyen me dogcel ame donyo i dyekal ame tye i yie.

²⁰Ibino timo kittono i nino me abiro me dwe noŋo, pi ŋattoro ame otimo bal a mom me akaka onyo ame otimo bal pi kwiya piny. Man bino miyo igwoko wunu ot a Rwot bedo acil abono bal.

²¹“I nino dwe apar wie aŋwen me dwe me agege, ibino cako wunu kwero ecuban me Kato. Jo luŋ bino camo kwon ame tobi mom iye pi nino abiro.

²²I nino me agege ame ocako kwero iye ecubannono, alamdog adwoŋ bino yalo Obaŋa twon, acalo mot me kwanyo ballere en ikome kede me a lwak.

²³I nino acel acel ame tye i nino abiro me kwero ecubannono, en bino yalo Rwot itino twoni abiro, itino rommi abiro, ame balloro mom i komgi, kun owaŋogi awaŋa alutu, dok daŋ bino yalo Rwot i nyok dyel acalo mot me kwanyo bal.

²⁴Pi mot me atin twon acel acel kede nyok romo acel acel ame oyalo kede Rwot myero daŋ mottere me moko kwoŋ kede moo bed tye, moko kwoŋ ame romo gwata moko apar pi atin twon acel acel kede nyok romo acel acel, kede moo jeituni ame romo cupa apar.

²⁵“I nino dwe apar wie abic me dwe me abiro, kede pi nino abiro ame nwoŋo akwero iye ecuban, aloc daŋ bino miyo mot me bal, mot awaŋa kede mot me moko kwon kede mot me moo ame rom aroma i maca ame omio pi kato.”