Read lango Ejekeri 46 Bible Online

Ejekeri 46 - lango bible

Ejekeri 46

¹“Rwot Obaŋa okobo ni, ‘Dogcel me dyekal ame tye i yie, ame tye tutuŋ kide, bino cegere acega pi nino abicel, ame en nino ame myero jo ti iye tic, ento i nino me cabit obino yabo bedo twolo, dok i kare me por a dwe daŋ obino yabo bedo twolo.

²Aloc bino donyo i dogcellono kun ya i dyekal i oko, beo i icika alac eka te wot cuŋ i ŋet yat me dogcel. Alamdog bino waŋo mot awaŋa mere kede mottere me kweyo cuny, eka en te ryebere i nyim Obaŋa i gweŋ ame ocano i dogcel. En doŋ bino donnyo oko, cite dogcel mom obino cego naka otyeno.

³Lwak bino woro Obaŋa i nyim doggola me donyo i dogcel i nyim Rwot i nino me cabit ducu, kede i kare me por a dwe.

⁴Mot awaŋa ame nwoŋo aloc omio baŋ Rwot i nino me cabit, bino bedo nyogi rommi abicel ame balloro mom i komgi kede nyok romo ame roccoro daŋ mom i kome.

⁵Mot me moko kwon ame omio karacel i nyok romo, bino bedo gwata moko apar, eka mot me moko kwon ame omio karacel i nyogi rommi, en bino miyo adwoŋ acalo en twero, kun mio daŋ i moo cupa apar pi moko kwon me gwata moko apar apar.

⁶I nino me por a dwe, en bino miyo atin twon ame balloro mom i kome, rommi abicel, kede nyok romo acel ame roccoro mom i komgi;

⁷acalo mot me moko kwon, en bino miyo gwata apar, acel pi twon kede dok gwata apar pi nyok romo kede dok acalo etwero pi atin romo acel acel, kun daŋ mio moo cupa apar pi moko kwon me gwata apar apar.

⁸Aloc bino donyo i dogcel kun beo i icika alac ame tye iye; dok ka doŋ aya myero en dok be i yo acellono.’

⁹“Ka lwak me lobo-nono tye ka bino i nyim Rwot pi kare me ecubannogo ame ociko pirgi, ŋat ame bino donyo i dogcel ame tye tutuŋ anyarodi, me wot woro Obaŋa, bino kato oko kun beo i dogcel ame tye tutuŋ anyarolum; kede ŋat ame bino donyo i dogcel ame tye tutuŋ anyarolum, bino kato oko kun beo i dogcel ame tye tutuŋ anyarodi. Mom tye ŋattoro ame bino dwogo cen i yo ame ewoto kede, dano acel acel bino wot atir anyim.

¹⁰Kare ame gin tye awot ka woro Obaŋa, aloc bino wot karacel kedgi, ka ce gin doŋ akato oko, en daŋ bino kato karacel kedgi.

¹¹“I kare me ecuban ame ocikonono, kede i kare mogo ame ociko ni myero gwok, moko kwon ame oyalo i Rwot, atin twon bino bedo epa acel, kede en ame omio atin romo, bino bedo daŋ epa acel, aco moko kwon ame omio nyogi rommi, ŋat acel acel bino miyo kite ame en twero, kun mio kede moo daŋ cupa apar pi gwata moko apar apar.

¹²Ka ce aloc mito yalo Rwot kede mot ame cunye mito, akadi mot awaŋa, onyo mot me kweyo cuny acalo mot ame cunye okwanyo me yalo kede Rwot, obino yabbe doggola me yie ame tye tutuŋ kide; en bino yalo Rwot i mottere me awaŋa, onyo mot me kweyo cuny, kite ame en timo kede i nino me cabit. Ka doŋ en otyeko yalo Rwot, en bino donnyo oko ote cego dogcel oko.

¹³“En bino miyo atin romo me mwaka acel, ame roccoro mom i kome, acalo mot awaŋa me yalo Obaŋa nino i nino odiko. En bino timo mannono nino i nino kare ducu.

¹⁴Dok en bino miyo mot me moko kwon, karacel kede nino i nino, kun mio moko kwon me gwata acel i nucu, kede moo me cupa acel me jebo moko, acalo mot moko kwon me yalo Rwot. Man cik ame mako mot awaŋa ame omio kare i kare.

¹⁵Atin romo kede mot me moko kwon, kede moo, obino miyo kittono odiko kare ducu, acalo mot awaŋa ame owaŋo kare ducu.

¹⁶“Rwot Obaŋa okobo ni, ‘Ka ce aloc mio mottoro me lobo mere baŋ wode moro i akina itino mere, lobo ame omio baŋ atinnono doŋ bino bedo mege ame en oleo.’

¹⁷Aco ka aloc omio mot me lobo baŋ aticcere moro ame tye baŋe, lobo-nono pwod dok bino bedo mege ka ce mwaka me kuc doŋ otumo; lobo-nono pwod dok bino dok i ciŋ aloc, pien en kede itino mere keken ame bino tero lobo-nono atwal calo meggi.

¹⁸Aloc mom myero gam ginnoro ame obedo me a lwak. En myero mi lobo ame obedo mege en ikome baŋ itino mere, mannono bino miyo en mom wuno jona pi bedo gamo lobogi oko i baŋgi.”

¹⁹Dano-nono dok te kwanya kela i doggola me donyo i wudi atitino ametye i ŋet cel, ame tye tutuŋ anyarolum i ŋet dyekal ame tye iyie, kan ame tye iye wudi mogo acil ame tye pi olamdog. I kare ame otye kuno, en te nyutta kabedo moro ame tye tutuŋ to me icika atitino-nono, iyi agikki mere.

²⁰En te kobba ni, “Man en kan ame olamdog bino tedo iye mot me walakino i roc, karacel kede mot me kwanyo bal, kede kan ame obino tedo iye, mot me moko okwon me wek ginnoro acil mom ter naka i dyekal ame tye oko, eka te lonyo lwak doko oko acil.”

²¹Dano-nono dok te kwanya kela i dyekal ame tye oko, eka te bedo wot keda i gul aŋwen ame tye i dyekaliaca luŋ,

²²i gul aŋwennono luŋ, onwoŋo tye iye dyekaliogo atitino doki, ame bocogi futi pyerabicel aŋwen i kom futi pyerabic,

²³Kabedo aŋwennono luŋ, onwoŋo ocecelo apama me gweŋ, kun kan ame okuto iye mac tye daŋ iye i ŋet apama.

²⁴Dano-nono te kobba ni, “Magi obedo jokon kan ame jo ame tio i ot Obaŋa bino tedo iye mot ame lwak yalo kede Obaŋa.”