Read lango Ejekeri 48 Bible Online

Ejekeri 48 - lango bible

Ejekeri 48

¹“Magi en nyiŋ atekere: Cakere i tutuŋ anyarodi, i waŋ lobo ame tye kuno, cakere i nam beo Ketlon naka i dogcel i Kamat, kato kede i Kajarenon, ame tye i waŋ apokki me Damaciko i tutuŋ anyarodi kede Kamat, ame ya i tutuŋ kide, dok kede tutuŋ to. Atekere acel obino pokke dul lobo mere acel, cakere i waŋ apokki ame tye i lobo me tutuŋ kide dok kede piny i waŋ apokki ame tye tutuŋ to, kun lubere kit man:

²Dan bino tero dul lobo me agege, Acer te lube,

³Naputali te lubo Acer,

⁴Manaci te lubo Naputali.

⁵Epraim te lubo Manaci,

⁶Reuben te lubo Epraim.

⁷Eka Juda te lubo Reuben.

⁸“Lobo ame te lubo me atekere a Juda, cakere i tuŋ kide dok kede tuŋ to, bino bedo lobo ame ojalo pi Obaŋa. Lobo mere bino bedo arom aroma i en ame opoko baŋ atekere mere, ame laccere romo mairo apar, kede borrere daŋ romo aroma, mairo apar i kom mairo aboro. Ot me wora bino bedo i dyere me lobo-nono.

⁹Lobo ame ibino jalo baŋ Rwot, bino bedo mairo apar i kom mairo aboro.

¹⁰Man en ame bino bedo lobo acil i akina lobo ame opoko, olamdog en ame bino tero lobo acillono. Lobo ame tye tutuŋ anyarodi kede anyarolum, borrere myero bed mairo apar, eka me tutuŋ kide kede tutuŋ to te bedo mairo aŋwen. Ot me woro Obaŋa myero ger i dye lobo man.

¹¹Lobo acil-li bino bedo me olamdog, ame obedo ikwae a Jadok, gin obedo tic baŋa i gen meicel, kun mom onotte kede rokkogo me Icrael me timo gin arac, kite ame jo Levi mogo rik otimo.

¹²Man en ame bino bedo lobogi acil meicel ame opokkigi, ame olubo lobo ame jo Levi ocele bedo iye, loboni en ame bino bedo acil ame kato en ocele luŋ.

¹³Jo Levi myero mi ter lobo ame olubo me olamdog. Lobo ame amiyoginono borrere myero bed mairo apar, laccere mairo aŋwen,

¹⁴Gin mom bino cato lobo-nono onyo mom otwero loko dul lobo moro iye kede lobo ocele, akadi miyo baŋ ŋattoro, ocele, pien lobo man obedo lobo acil ame obedo me a Rwot.

¹⁵“Lobo ame odoŋŋere ame borrere tye mairo apar i kom mairo aryo, mom bino bedo lobo acil, lobo-nono bino bedo me tiyo kit jami ocele luŋ, ame dano moro keken twero timo iye. Jo twero bedo iye, dok daŋ otwero puro. Boma bino bedo i dye lobo-nono,

¹⁶lac a boma-nono kede borrere bino bedo yadi tutumia adek kede mia aryo i pyeraryo, tuŋŋi i tuŋŋi.

¹⁷Guro boma-nono dyere bino bedo iye lobo moro ame ginnoro mom iye, ame ya i lake tuŋ cel tuno kede i lake tuŋ ocele bino bedo yadi mia acel i pyerabic.

¹⁸Lobo ame odoŋŋere ame tye i ŋet lobo ame acil, borrere i tutuŋ kide bino bedo mairo aŋwen, kun me tutuŋ to daŋ mairo aŋwen. Cam ame bino ya i lobo-nono, bino bedo me a jo a tio i boma.

¹⁹Ŋattoro keken ame tio i boma, kadi bed en oya iyi atekere mene, iyi akina atekere me Icrael, danonono bino puro poto mere i dul lobo-ni.

²⁰Lobo luŋ ame ibino jalo pi Rwot, borrere kede laccere luŋ bino bedo mairo apar apar, kun lobo ame boma tye iye, tye i yie kannono.

²¹“Lobo ame bino doŋŋere i ŋet lobo acil tuŋŋi i tuŋŋi, kede lobo ame omio pi boma, bino bedo me aloc. Cakere i ŋet lobo acil, tuno kede i waŋ lobo ame tye tutuŋ kide, kede en ame tye tutuŋ to, kun cakere i lak kan ame mairo apar ogik iye, kannono luŋ bino bedo me aloc. Lobo acil karacel kede kabedo acil ame ot Obaŋa tye iye bino bedo i dyere,

²²kede lobo ame tye iye jami me boma bino bedo i dye lobo ame obedo me aloc, atekere a jo Benjamin.

²³“Aco atekere a jo Icrael ocele mege, cakere i tuŋ kide, wot kede tutuŋ to, lobogi bino lubere kit man: Me atekere a Benjamin en ame bino bedo me agege, kun gin otero dul lobo acel.

²⁴Me atekere a Cimeon en ame te lubo me a Benjamin.

²⁵Icakar en ame te lubo Cimeon.

²⁶Me a Jabulon en ame te lubo Icakar.

²⁷Me a Gad en ame te lubo me a Jabulon.

²⁸I tutuŋ anyarolum i atekere ame apokki i jo Gad, waŋ lobo bino dok tutuŋ anyarolum kun cakere i Tamar tuno kede naka i kidi me Meriba-kadec, te dok tutuŋ anyarodi, kun beo i wan lobo me Miciri, naka i Nam Adwoŋ.

²⁹Man en lobo ame bino popoko kin atekere me Icrael bedo meggi, magi en dul lobo apapat ame ibino pokkigi. Man kop ame Rwot Obaŋa okobo.

³⁰“Man en kite ame dogcel me boma bino bedo kede cakere i tutuŋ anyarodi, ame kor apama mere myero bedo yadi tutumia adek kede mia aryo i pyeraryo,

³¹dogcel adek, ame dogcel acel acel ocako nyiŋ atekere me Icrael, dogcel a a Reuben, dogcel a Juda, kede dogcel a Levi,

³²i tutuŋ kide ame apama cellere daŋ rom aroma i maca ocele-ca, nyiŋ dogcel tye iye kit man: Dogcel a Lucepu, Benjamin, kede Dan.

³³I tutuŋ anyarolum, ame lac apama mere daŋ rom i en ocele-ca, tye iye dogcel cimeon, Icakar kede Jabulon.”

³⁴I tutuŋ to tye iye dogcel Acer, Gad kede Naputali.

³⁵Bor apama luŋ, cakere i doggola tuŋ cel mano amana, naka i doggola tuŋ ocele, romo yadi tutumia apar wie aryo i mia aryo i pyeraboro. Nyiŋ boma-naca cakere kare-naca olwoŋo ni, “Rwot tye kan.”