Read lango Ejekeri 6 Bible Online

Ejekeri 6 - lango bible

Ejekeri 6

¹Rwot okobo keda, kun kobo ni,

²“Wot a dano we, lok nyimi inen tutuŋ kun ame kiddi me Icrael tye iye, me ite rabo kop i komgi.

³Rab kop i komgi ni, Wun kiddi me Icrael, winy wunu kop a Rwot Obaŋa! Rwot Obaŋa okobo kop i komwu wun kiddi kede lobo obedo kidikidi, kulli kede luŋ. En okobo ni, Nen wunu ba, an ikoma abino kelo pala lweny i komwu, abino babalo kabedo luŋ me woro jogi ame tye i wi kiddi malo.

⁴Abino mumuko keno lamwu wie te doŋ nono, kede keno lamwu me waŋo odok akur obino daŋ tuturo oko; jo ame bedo kuno, bino totoa oko i ŋet cal jogigi.

⁵Abino miyo kom jo Icrael ame oto bu buta piny i nyim cal jogigi, ate keketo cogo komwu i ŋet keno lamwu luŋ.

⁶I kabedo luŋ ame ibedo wunu iye, bomawu luŋ bino doŋ yigi nono, ka woro jogiwu ame tye i wi kiddi malo daŋ obino balo oko. Mannono bino miyo keno lamwu luŋ doŋ nono kun daŋ obalo oko, cal jogiwu obino tuturo oko ducu, keno lam me waŋo odok akur luŋ obino reto oko piny, dok ginnoro luŋ ame itio wunu obino jwero oko ducu.

⁷Jo ame oto bino rette piny i akinawu, mannono bino miyo iŋeo wunu ni an a Rwot.

⁸“Kadi bed amannono abino weko jo mogo i akinawu doŋ akwo. Jo ame odoŋ bino keketa i akina orok, i lobo apapat,

⁹kan ame obino bedo iye acalo opii. I kare ame gin tye kuno, gin bino po i koma, ote niaŋ ni an aketo can i komgi me miyogi lewic, pien gin okwero genna oko ote lunyo geno cal jogi. Gin obino doko twon ginnoro arac meicel, akadi ka gin onenne kengi, pi timmogo areco ame gin obedo timo, kede pi tim luŋ me kwer ame gin obedo timo.

¹⁰Pien i kare-naca gin obino ŋeyo ni an a Rwot; dok daŋ ni kop ame akobo ni abino keto can i komgi mom akobo nono nono.”

¹¹Rwot Obaŋa okobo ni, “Bap wunu korwu, dok ibap wunu tyenwu daŋ piny, ite kobo wunu ni, Oi doi! Pi timmogo me kwer areco meicel ame jo me ot Icrael obedo timo; pien nen obino nekogi oko i pala lweny dok kec kede too edeke daŋ bino nekogi.

¹²Ŋat a tye kannabor to edeke en abino neko; ŋat ame tye kan aceggi obino neko aneka i pala lweny; ŋat ame odoŋ kec en ame bino neko. Mannono en kite ame abino luŋo kede inigana i komgi.

¹³Mannono bino miyo iŋeo wunu ni an a Rwot, i kare ame jogi ototoa tye obubuta piny i ŋet cal jogi, ame tye i ŋet keno lamgi, i kabedo luŋ obedo kidikidi, kede i wi kidi luŋ, i te yen luŋ ame obuŋere, i te kworo luŋ ame obuŋere, i kabedo luŋ ame gin oyalo iye cal jogigi, i mottogo ame nwecgi kur.

¹⁴Abino ryeyo ciŋa me lweny i komgi, ate miyo lobogi doko wi obur ame ŋattoro mom iye, i kabedo luŋ ame onwoŋo gin bedo iye, cakere i tim tuno naka i Ribla. Mannono bino miyo gin oŋeo ni an a Rwot.”