Read lango Ejekeri 8 Bible Online

Ejekeri 8 - lango bible

Ejekeri 8

¹I nino dwe abic me dwe me abicel, me mwaka me abicel ame wan obedo kede iyi opii, odoŋe ame telo lwak ame onwoŋo tye iyi opii oya i Juda, onwoŋo tye obedo karacel kede i oda, oyotoyot teko a Rwot te bino poto i koma i caa-nono.

²Nen ba, atiŋo waŋa malo, ate neno ginnoro ame cal kede dano, cakere i pyere dok piny onwoŋo meny calo mac, eka cakere i pyere wot kede malo, nen calo mac amimila, cal mola.

³An ate neno cal ciŋ dano ame en ocwao baŋa te mako yer wia, Cuny Obaŋa te tiŋa malo, te wot keda naka i akina lobo kede polo. I kare ame atye kuno, Obaŋa te nyutta cal Jerucalem, kun atye i dogcel ame donyo i dyekal i dyere, ame tye tutuŋ anyarodi, kan ame onwoŋo oketo iye cal jok ame onwoŋo mio nyeko mako Obaŋa meicel.

⁴Nen ba, kwogo Obaŋa me Icrael onwoŋo tye kuno, ame rom aroma i gin ame onyutta i dye bar.

⁵Obaŋa te kobba ni, “Wot a dano we, koŋ itiŋ waŋi malo inen tutuŋ nayarodi.” An daŋ ate tino waŋa malo tutuŋ anyarodi, ate neno cal jokkoro ame mio nyeko mako Obaŋa tye i ŋet keno me lam ame tye i dogcel me donyo i boma.

⁶Obaŋa dok te kobba ni, “Wot a dano we, ineno gin ame jo tye ka timo, twon timmoro me kwer adwoŋ meicel ame jo Icrael tye atimo kan, me ryemma oko cwalla teŋe kannacil? Cite pwod dok ibino medde neno twon timmogo me kwer ame doŋodoŋo meicel kato man oko.”

⁷Obaŋa dok te tera i doggola me dyekal. I kare ame abedo ŋiyo kunu, ate neno bur ame otuco i kor apama ot.

⁸En te kobba ni, “Wot a dano we, koŋ imuk kor apama-nu.” Kare ame amumuko kor apama-nono, anwoŋo doggola tye iye.

⁹En dok te kobba ni, “Koŋ idony kunu iwot inen timmogo me kwer ame gin tye ka ti mo kan.”

¹⁰An daŋ ate donyo, ate neno gin ame tye kuno, ate nwoŋo cal apapat tye ogoo i kor apama kunu, ame oromo kor apama luŋ. Cal i kor apama-nono onwoŋo tye iye cal twole apapat kede leyi mogo ame okwero, kede cal jogi mogo ame rik jo Icrael woro.

¹¹Dok ate nwoŋo kuno odoŋe a jo Icrael ame romo pyerabiro kun cuŋ i nyim cal jogi-nono. Jajania wot a Capan onwoŋo daŋ tye ocuŋ i akinagi kunu. Ŋat acel acel i akinagi onwoŋo omako tako me waŋo gin a ŋwece kur i ciŋe, kun yito me odok akur ame gin awaŋo-nono tye aduny awikino malo calo pol.

¹²Obaŋa dok te kobba ni, “Wot a dano we, ineno gin ame odoŋe a jo Icrael tye ka timo i muŋ kannacol kan? Gin luŋ ŋat acel acel tye ka woro jogi iyi icika ame cal jogi apapat tye iye. Gin otye ka kop kengi kengi ni, Rwot gire mom nenowa, cuny Rwot doŋ otyeko cayo lobo man oko.”

¹³Rwot dok te kobba ni, “Pwod dok ibino medde neno twoni timmogo me kwer areco meicel akato man ame gin tye ka timo.”

¹⁴Rwot dok te kela i dog cel ame tye tutuŋ anyarodi me ot a Rwot, ate nwoŋo mon ame akoko tye obedo kunu, kun okoko jok ame olwoŋo ni Tamuj.

¹⁵Rwot te penya ni, “Ityeko dok neno man, wot a dano? Pwod dok ibino medde neno twoni timmogo me kwer areco meicel akato man ame gin tye ka timo.”

¹⁶Rwot dok te terra i dyekal ame tye i ot a Rwot. Kunu ate neno jo ame mito romo pyeraryo wie abic, ame tye i ŋet doggola me ot a Rwot, iyi akina keno me lam kede kan ame odonyo kede i ot a Rwot. Gin jonono onwoŋo oloko ŋegi i ot a Rwot, kun nyimgi oneno tutuŋ kide, gin onwoŋo tye ka ryebere piny me woro ceŋ ame onwoŋo pwod tye adonyo adonya i tutuŋ kide.

¹⁷Rwot dok te penya ni, “Ineno dok man, wot a dano? Mom jo me ot a Juda neno ni timo kodi tim man yottigi ayota, gin te bedo timo tim me kwer kan, me miyo tim me byemi bedo adwoŋ meicel i lobo, kun oroka kede, omito ni akemo bed maka? Nen koŋ kite ame gin tye anywara kede atek okato kare.

¹⁸Mannono omio abino tic kedgi i twon akemo adwoŋ meicel, mom abino koyo ŋattoro kadi acel, dok kica daŋ mom bino maka i kom ŋattoro; kadi bed ored i twon koko moro aloŋo rom mene, mom abino ciko yita i komgi.”