Read lango Ejekeri 9 Bible Online

Ejekeri 9 - lango bible

Ejekeri 9

¹Icennere ate winyo dwon Obaŋa kun redo i dwon aloŋo ni, “Bye wunu aceggi, wun onek jo ame mito keto can i kom otim tim areco ame tye i boma man. Ŋat acel acel i akinawu myero kwany jami lwennyere, mak i ciŋe bin kede.”

²Nen ba, jo abicel te bino kun obino i tutuŋ dogcel, ame tye tutuŋ anyarodi, kun ŋat acel acel omako jami lwennyere me neko jo i ciŋe, i akinagi, onwoŋo tye iye lo moro ame orukoboŋo camanini, kun omako ginnoro me coc i ciŋe. Gin luŋ ote donyo i dyekal me ot a Rwot ote wot cuŋ i ŋet keno lam me mola.

³I kare-nono onwoŋo kwogo Obaŋa a jo Icrael, ame ryeny atek wok-ki, oya oko i kom okerubi kan ame onwoŋo yam en bedo iye, kun woto cuŋ i doggola me ot a Rwot. Rwot te lwoŋo dano ame onwoŋo orukoboŋo camaninino no ame onwoŋo tye i ginnoro me coc i laŋete.

⁴Rwot te kobbe ni, “Wot ibe i dye boma me Jerucalem luŋ, me iwot iket alama i tur nyim dano acel acel ame tye kede cwer cuny, dok tye ka cucura i cunye pi timmogo me kwer ame otye ka timo i boma me Jerucalem.”

⁵Ate dok winyo Rwot Obaŋa kun tye ka kop i jo ocele mege, ni, “Wun daŋ wot ibebea wunu i boma ilub wunu yore, kun ineneko wunu jo. Kur iko wunu ŋattoro kadi acel, dok daŋ kur ibed wunu i kica moro i kom ŋattoro kadi acel.

⁶Nek wunu jo oti, awobe, anyira, mon kede itino atino, cite kur igud wunu ŋattoro ame otyeko keto alama i nyime. Wot icak ticwu-nono i kabedona acil.” Mannono omio gin te cako kede odoŋe ame onwoŋo tye i nyim ot a Rwot.

⁷Obaŋa dok te kobbigi ni, “Bal wunu ot me wora daŋ oko. Mi wunu kom jo oto rade aradi i dyekallere. Cak wunu doŋ wot oko.” Gin te cako wot, ote wot neko jo ame tye i boma.

⁸I kare ame gin tye ka neko jo kunu, an onwoŋo doŋ adoŋ kena. Arette piny aryeba cuny, ate redo i koko ni, “Ama Rwot Obaŋa we! Akemo doŋ omaki meicel i kom Jerucalem, omio imito ni inek jo Icrael luŋ ame odoŋ iye?”

⁹Obaŋa dok te gamo ni, “Bal ame jo me Icrael kede jo Juda otimo doŋ dwoŋ meicel. Remo a jo ame gin obedo neko, doŋ dwon meicel i lobo, dok daŋ otye ka balo ŋolo kop atira atek meicel i boma me Jerucalem, kun okobo ni, ‘Cuny Rwot doŋ ocao lobo man oko, dok Rwot daŋ mom dok neno ginnoro ame atimere iye.’

¹⁰Man omio an i tuŋ baŋa, mom doŋ abino koyo ŋattoro kadi acel, dok kica daŋ mom bino maka i komgi, abino culo kwor i komgi, i ginnoro luŋ ame yam gin otimo.”

¹¹Dok ate ru neno lo moro ame orukoboŋo camanini, ame tye i ginnoro me coc i laŋete, kun dwoko kop baŋ Rwot ni, “Doŋ atyeko tiyo gin ame onwoŋo icika ni awot ati.”