Read lango Danieri 1 Bible Online

Danieri 1 - lango bible

Danieri 1

¹I mwaka me adek me loc a Yekoyakim abaka me Juda, Nabukadnejar, abaka me Babulon obino me bino lweny i kom Jerucalem, eka te guro oko.

²Rwot te miyo en mako Yekoyakim abaka me Juda, te daŋ yako jami mogo ame otio kedgi i ot Obaŋa, En te tero jo ame emako wot keto i ot obaŋa mere, jami en te tero i ot kano lim me ot obaŋa mere.

³Abaka te ciko Acipenaj, ame obedo adwoŋ ame loo jo ame oroo oko ni myero kel jo mogo me Icrael, kel itino me ot abaka kede itino oloc ocele.

⁴Myero kel awobe ame komgi beco odoco aboŋo balloro, jo aryek i yore apapat luŋ, jo ame kwiri, dok ame tye i ŋec a rommigi tic i paco abaka. Acipenaj myero pwonygi kwano kede coyo leb jo Kaldaya.

⁵Abaka te ciko ni myero gin cam cem abeco kite ame en ecamo, kun gin camo kit cammono keken nino ducu, dok daŋ omat koŋo olok amittere ame en emato. Myero pwonygi pi mwakki adek, eka iyi agikki me mwaka me adek ote terogi i nyime.

⁶I akina jo-nono onwoŋo tye iye Danieri, Anania, Micael kede Ajaria, gin luŋ rik obedo jo me atekere a Juda,

⁷Adwoŋ ame loo jo ame oroo oko te cako nyiŋgi apat kit man: Danieri en te lwoŋo ni Beltecajar, Anania te lwoŋo ni Cadrak, Micael te lwoŋo ni Micaki eka Ajaria te lwoŋo ni Abednego.

⁸Cite Danieri te mo ko tammere me mom balle kene i camo cam abeco kun obedo me kwer tuŋ baŋe, onyo i mato koŋo olok ame abaka mato. Omio en te penyo adwoŋ ame loo jo ame oroo oko me ye tammere-nono, me kur eballe.

⁹Obaŋa te miyo adwoŋ ame loo jo ame oroo oko bedo kede kica i kom Danieri kun pwo tammere,

¹⁰cite en te kobbi Danieri ni, “Atye kede lworo i kom abaka, pien en ame oyero kit cam ame myero icam wunu kede koŋo ame myero imat wunu. I kare ame en oneno ni komwu mom yot calo kom awobe wadwu ame mwaka me ditogi rom aroma kede megwu, naka mio en abaka bino neka oko.”

¹¹Mannono te miyo Danieri wot baŋ agwok jami ame onwoŋo adwoŋ ame loo jo ame oroo oko oketo me loyo Danieri kede owote mere Anania, Micael, kede Ajaria,

¹²te kobbe ni, “Koŋ item omironi pi nino apar; miwa koŋ obed camo dek ape na keken kun omato ka pii.

¹³Eka koŋ ite neno komwa kun iporo kede kom awobe ame camo cem abeco ame rom aroma en abaka camo-ni I ŋe mannono yin doŋ itwero neno gin ame myero itim kede omironi.”

¹⁴En te winyo kwacgi i kop man, te temogi pi nino apar.

¹⁵I ŋe nino apar en oneno ni kom jo-ni onwoŋo nen amwonya dok daŋ ocwe ame okato awobe luŋ ame camo cem abeco ame abaka camo,

¹⁶Mannono te miyo agwokgi kwanyo cam abeco kede koŋo olok ame onwoŋo tye pirgi oko, te doŋ bedo miyogi camo dek apena keken.

¹⁷Obaŋa te miyo awobe aŋwen-ni bedo kede ŋec amala meicel, kun okwiri i kwan dok oryek atek meicel. Danieri onwoŋo ŋeo gonyo anyut apapat luŋ karacel kede lek ducu,

¹⁸I kare ame nino me agikki me kare ame rik abaka onwoŋo ociko ni tergi kede i nyime, adwoŋ ame loo jo ame oroo oko te terogi i nyim abaka Nebukadnejar.

¹⁹Abaka te kop kedgi, te nwoŋo ni i akinagi luŋ mom tye iye ŋattoro ame calli i Danieri, Anania, Micael, kede Ajaria, omio gin doŋ te bedo i nyim abaka.

²⁰Doŋ i kom kopporo luŋ me ryeko kede me ŋecs ame abaka obedo pepenyogi iye, en onwoŋo ni gin otye aber iye meicel ame okato otyet kede okor tipo luŋ ame onwoŋo tye i te loccere.

²¹Danieri te medde bedo kuno tuno naka i mwaka me agege me loc abaka Kuro.