Read lango Danieri 10 Bible Online

Danieri 10 - lango bible

Danieri 10

¹I mwaka me adek me loc a Kuro abaka me Pacia, rik obin onyuto kopporo baŋ Danieri ame nyiŋe ocele Beltecajar. Kop ame onyutte-nono onwoŋo tye ateni, dok okelo arubaruba adwoŋ meicel. Danieri oniaŋ koppono, te daŋ niaŋ gin ame onyutte.

²I kare-nono luŋ, an Danieri abedo kumo pi cabit adek twal.

³Mom acamo cammoro amit, mom acamo riŋo, akadi kono olok daŋ mom ogudo doga, mom daŋ awirre kede moo kadi acel pi cabit adekkono luŋ.

⁴I nino dwe pyeraryo wie aŋwen me dwe me agege, i kare ame onwoŋo atye acuŋ i ŋet kulo moro adwoŋ, ame en kulo Tigric,

⁵atiŋo waŋa malo, ate neno dano moro ame onwoŋo oruko boŋo camanini, kun otweo pyere kede del jabu me Upaj.

⁶Kom dano-nono onwoŋo calo kidi berul ame mimila amimil, tur nyime te calo lutkot ame tye ka meny, kun waŋe calo mac rao ame alyel, eka bade kede tyene luŋ te meny calo mola ame orudo meicel, dok kop ame en kobo ka iwinyo calo lwak jo apipim en awo-nono.

⁷Anyut ame onen-nono, an Danieri keken en ame aneno, jo ame rik tye keda mom oneno, cite komgi omyel atek meicel pi lworo, ote riŋo wot pono oko.

⁸Gin oweka adoŋ kena eka ate neno twon anyuttoro adwoŋ wok-ki. I kare ame aneno, tekona te tum oko ducu, ber a koma te lokere atek meicel, tekona te tum odoco.

⁹Dok ate winyo dwone kun en tye ka kop, i kare ame awinyo koppere, arette piny aryeba cuny, ate daŋ cako nino oko atek meicel.

¹⁰Nen ba, ciŋ ŋattoro te guda, te miya rumo aruma kun ciŋa kede cena luŋ tye amyel amyela.

¹¹Dano-nono te kobba ni, “Danieri we, dano ame omaro cik yiti iwiny kop luŋ ame at ye ka kobo baŋi, ya malo icuŋ atira, pien an aman otyeko oora baŋi.” I kare ame en onwoŋo pwod tye ka kobo kop man baŋa, an aya malo ate cuŋ kun koma amyel amyela.

¹²En te kobba ni, “Kur ilwor, Danieri, pien cakere i nino me agege ame icako keto iye cunyi me niaŋ kop man kede mwolle keni i nyim Obaŋani, kop ame ibedo kobo luŋ owinyere, daŋ en koppi-nono en omio abino baŋi.

¹³Amalaika ame gwoko loc me Pacia obedo geŋa pi nino ame romo pyeraryo wie acel twal. Cite Maikol ame obedo ŋat acel i akina omalaika adoŋo, obino te bino konya, omio an ate weke kuno gin kede amala ika ame gwoko Pacia.

¹⁴Doŋ an abino me bino miyi ŋeyo gin aŋo ame bino timere i kom joni i kare ame pwod tye anyim, Pien anyut ame ineno nyuto gin ame bino timere i kare ame pwod tye anyim.”

¹⁵Kare ame en otyeko kobo kop magi ducu baŋa, akulo wia piny eka leba te menne oko,

¹⁶Nen ba, dano moro ame cal acala i dano te gudo del doga, ate cako kop oko, An ate kobbe en dano ame ocuŋ i nyima-nono ni, “Adwoŋŋa, anyut ame aneno-nono omio adoko gira agoro oko, tekona doŋ mom.

¹⁷Kara doŋ an amironi atwero kop kedi niŋo yin adwoŋŋa? Pien tekona doŋ mom, dok weo daŋ doŋ mito loya oko.”

¹⁸Ŋattoro ame cal i dano te dok mulo koma, tekona te dwogo.

¹⁹En te kobba ni, “Yin dano ame omaro atek meicel, kur ilwor, kuc obed baŋi; cuŋ atek ame cunyi nwaŋ.” Kare ame en okobo keda, adoko tek eka ate kobo ni, “Kob giri doŋ adwoŋŋa, pien doŋ imio tekona adwogo.”

²⁰En doŋ te kobo ni, “Yin iŋeo gin omio an abino baŋi? Aman an abino dok me wot lweny i kom aloc me Pacia. Ka doŋ atyeko lweny kede oko, aloc me Grik bino bino.

²¹Cite an abino me bino titti gin ame ocoo i buk ame tye iye kop me ateni, Mom tye ŋattoro ocele i ŋeta me konya lweny kono ka Maikol keken, ame obedo alocwu.”