Read lango Danieri 11 Bible Online

Danieri 11 - lango bible

Danieri 11

¹Aco an, i mwaka me agege me loc a Dario ame obedo jo Medi, Maikol oya malo me konya kede miya tekcuny.

²“Aman an doŋ abino nyutti kop me ateni. Nen ba, obakki ocele adek dok bino ya i lobo me Pacia, eka me aŋwennere te doŋ bedo alonyo atek meicel ame kato gin ducu; kare ame en doŋ odoko atek pi lonyo mere, en bino cako tutugo jo luŋ me lweny i kom loc a jo Grik.

³Twon abaka moro adwoŋ meicel te dok cako loc, ame abino loyo loccere i twon loccoro agwa, kun timo gin ame yie mito.

⁴Kare ame en doŋ ocako loc kittono loccere bi no tur oko te pokere yie aŋwen twal; mom ikwae en a bino loc, dok mom bi no lubo kit loccere, pien loccere obino miyo luŋ baŋ jo ocele a mom ikwae kadi acel.

⁵“Abaka acel me tutuŋ anyarolum bino bedo atek, cite aloccere moro acel bino bedo atek ame kate oko, dok loccere bino bedo twon loc adwoŋ meicel.

⁶Icennere ka mwaka mogo doŋ okato, gin bino ribere oko; i kare-nono nyaka abaka ame tye tutuŋ anyarolum bino bino baŋ abaka ame tye tutuŋ anyarodi pi yenyo yo me kelo kuc; cite dako-nono teko mere bino tum oko, mannono bino miyo abaka kede ikwae bino ol kede oko, cunygi te caye oko, karacel kede omiro mere, otino mere, anaka cware kede ŋat ame oleo lobo mere.

⁷“I kare-nono wat a dako-nono bino ya te cako lweny i kom mony me Curia, te guro cel abaka ame tye tutuŋ to, bino donyo iye te lweny kedgi loyogi oko.

⁸En bino coko cal obaŋegi kede cal jogigi karacel kede jami me wei ame otio i ryal kede jabu, te terogi i Miciri; eka pi mwakki mogo en koŋ te bedo kun mom lwenyo i kom abaka me tutuŋ anyarodi.

⁹Icennere abaka ame oya i tutuŋ anyarodi te bino lweny i lobo abaka ame tye tutuŋ anyarolum, cite bino dok gire i lobo mere.

¹⁰“Awobe mere bino cako yikere me lweny, gin obino coko lwak adwoŋ meicel me lweny, monnyono bino wot lweny i kom okworgi, obino reto oko ote bea kato acalo alele pii amol ote wot naka i cel me boma ame ocelo atek.

¹¹Akemo bino mako abaka me tutuŋ anyarolum meicel, bino kato oko te lweny abaka me tutuŋ anyarodi, bino cobo twon mony adwoŋ meicel, ote daŋ miyo mony ocele-ca i ciŋe,

¹²Ka doŋ otyeko neko lwak mony adwoŋ wokkono, en bino bedo i twon awaka adwoŋ meicel i cunye, En bino neko jo tutumia i tutumia, cite mom bino loc nakanaka.

¹³“Abaka me tutuŋ anyarodi bino dok paco te wot coko mony adwoŋ meicel ame kato maca me agege-ca oko, icennere i ne mwakki mogo en bino dwogo me bino lweny, kun tye i lwak mony adwoŋ meicel dok i jami lweny apipim.

¹⁴I kare-nono jo apol bino jem i kom abaka me Miciri, dok otim tim arac ame tye i akina jo me turwu bino yeyea ni oromo cobo anyut ame yin ineno i wan lek, cite mom gire obino twero kadi acel.

¹⁵Abaka me Curia bino bino te bino guro boma ame ocelo atek wokkaca, eka te mako oko. Ocirikale me tutuŋ anyarolum mom bino medde cuŋ i nyimgi, anaka jo atek meicel i lweny ame oyero ayera, pien mom obino bedo kede teko me cuŋ i nyimgi.

¹⁶Cite jo ame bino cobo mony i komgi-nono bino timogi cucu kite ame cunye omito, kun ŋattoro mom tye ame romo cuŋ i nyimgi. En bino cuŋ i lobo me kwogo, kun lobonono luŋ doŋ tye i te twerrere.

¹⁷“En bino yikere me bino kede teko, kun bino i mony me lobo mere luŋ, en bino cako yiko kop me kelo kuc, eka te daŋ miyo timere. En bino miye nyako ame dako onywalo me wek bin babalo loccere luŋ oko; cite mom bino twerre, mom daŋ medde wot anyim,

¹⁸Icennere en bino lokere me lweny i kom lobo ame tye tutuŋ dog nam, eka te loyo polgi; cite atel wi mony bino miyo awaka mere gik oko; ateteni, bino miyo lewic make,

¹⁹Abaka bi no doŋ lokere dok cen i cel me boma mere en ikome ame ocele atek, cite bino bedo gatte te rette oko piny, mom ote nwoŋo atwal.

²⁰“Abaka ocele dok bino leyo kakare, abaka-nono bino cwayo araocoro beo i lobo mere me kwogo luŋ, cite bino tyeko kare anonok meicel ote neke oko, kun mom oneke i wi akemo onyo i lweny.

²¹“Dano moro ocele bino leyo kakare ame mom opore bedo abaka, en bino bi no atura te gamo loc oko i yore me ryeko.

²²Obino ryemo mony oko i nyime, ote jwero jo oko ducu, naka alamdog adwoŋ daŋ obino neko oko.

²³Cakere i kare ame en bi no cako cikere i rok ocele, en bi no tiyo ticcere kun bwobwolo jo i ryeko meicel, en bino doko atek kun tye i mony anonok meicel.

²⁴En bino tuno i dul lobo ame olony meicel kun jo me lobo-nono mom ŋeo kadi acel, en bino timo gin ame kwari mere luŋ, naka kwari a kwari mere daŋ mom ru yam otimo. En bino poko i akina jo mere jami luŋ ame yam oyako. En bi no yikere me cako lweny i kom boma mogo ame ocecelo atek, ento bino timere pi kare moro anonok.

²⁵“Teko mere kede tek cunye bino tugere me lweny i kom abaka me tutuŋ anyarolum ame tye kede twon mony adwoŋ meicel; abaka me tutuŋ anyarolum bino cako lweny kede i lwak mony adwoŋ dok atek meicel; cite mom gire obino cuŋ i nyime, pien obino bedo yiko koppogo me rete.

²⁶Naka jo ame camo cammere abeco daŋ bino bedo i akina jo ame bino neke; monnyere daŋ obino jwero oko ducu, jo apol obino neko aneka.

²⁷Gin obakki aryo-nono obino doŋ cako cam i meja acel kun tam i cunygi mom ber; ŋat acel acel i akinagi bino bwolo awottere i kop i doge kun cunygi tye atamo timo gin arac; cite gobagi-nono mom bi no konyogi, pien kare nwoŋo mom ru oromo ame doŋ otyeko moko oko.

²⁸En bino dok cen i lobo mere i lwak jami adwotj meicel, cite pwod bino bedo kede mit me babalo cikere Obaŋa. En bi no timo gin ame cunye mito te dok i lobo mere.

²⁹“En bino dwogo i kare ame ociko te dok tutuŋ anyarolum; cite mom dok bino bedo kite a rik obedo kede con ca,

³⁰Pien lwak mony adwoŋ bino bino kede melle me bino lweny kede, lworo bino make eka te dok oko cen, en bino dok i twon akemo meicel eka te wot cako lweny i kom cikere Obaŋa. En bino dok cen te cako winyo tam a jo ame otyeko ya oko i cikere Obaŋa:

³¹Monnyere mogo ame oya i baŋe bino bino i ot Obaŋa ote wot timo tim me ipyeda iye kede i apama cellere, eka ote kwanyo mot awaŋa ame owaŋo iye ducu. Gin te cako keto iye ginnoro me kwer ame balo cuny jo.

³²En bino cako lwenyo lwenyo me ryeko i kom jo ame doŋ otyeko turo cikere Obaŋa: cite jo ame ŋeo Obaŋagi bino medde cuŋ atek ote daŋ loyo oko,

³³Jo mogo i akina jo ame ryek bi no miyo jo apol niaŋ, kadi bed obino nekogi i pala me lweny karacel kede mac, onyo obino terogi oko acalo opii, kun daŋ oyako jamigi oko pi kare moro.

³⁴Kare ame otye ka wunogi, gin bino nwoŋo kony anonokkoro. Dok jo ocele bino lubogi pi kop me ryeko ame obwologi kede.

³⁵Jo mogo i akina jo ame ryek obino neko oko, Man bino timere me yek jo mogo areco oko, dok lony jo bed atar, tuno ka kare me agikki ame ociko doŋ oromo.

³⁶“Abaka bino timo gin ame cunye mito, en bino kette me bedo malo ame loo gin luŋ ame olwono ni obaŋa, dok bino kobo koppogo me awura i kom Obaŋa ame loo obaŋe luŋ. En bino medde timo kittono tuno ka kare me keto can i kome doŋ oromo; pien gin ame Obaŋa doŋ otyeko moko bino timere.

³⁷En mom bino paro pi obaŋe a kwari mere, akadi i kom woro jok ame mon maro wok-ki; mom gire bino paro pi obaŋa moro ocele, pien en bi no kette kene me bedo malo ame loo ginnoro luŋ.

³⁸En bino lunyo woro obaŋa me cellogo ogero atek akaka woro magi, obaŋa ame kwari mere yam mom ŋeo. En bino woro obaŋa-nono i jabu kede ryal, kidi mogo me wel kede mottogo ame welgi malo.

³⁹En bino geno cel ame ogero atek pi konnyogo ame obaŋa orok mie; jo ame ye dittere en bi no miyogi twon kwogo adwoŋ meicel kun miogi obedo oloc ame loo jo apol, dok bino poko lobo mere kun mio jo wilo awila.

⁴⁰“Ame kare me agikki doŋ ceggi, abaka me tutuŋ anyarolum bino cako lweny i kome, cite abaka me tutuŋ anyarodi bino ru bino i kome calo yamo ajuru, kun bino i gadigadi, wegi aguragura, karacel kede lwak wel apipim. En bino donyo i lobo apapat, kun bea kato calo ale le pii amol.

⁴¹En bino tuno naka i lobo me kwogo. Jo tutumia apar twal obino neko oko, cite jo Edom, jo Moab kede jo Ammon bino bwot i ciŋe, eka ote doŋ.

⁴²En bi no ryeyo ciŋe me lweny i kom lobo apol meicel, lobo i tutuŋ anyarolum daŋ mom bino bwot.

⁴³En doŋ bino bedo aloc ame loo lonyo me jabu, ryal kede jami mogo me wel ame tye tutuŋ anyarolum; jo Libia kede jo Eciopia bi no lubo yore.

⁴⁴Cite amut ame bino ya i tutuŋ kide kede tutuŋ anyarodi bino poto cunye, en te wot oko i twon akemo adwoŋ me wot neko jo apol meicel.

⁴⁵En bino guro kema me loccere i akina nam kede kidi acil ame obedo kidi me kwogo; kadi bed amannono, kare me to mere gire bino romo ame ŋattoro mom bino konye.”