Read lango Danieri 12 Bible Online

Danieri 12 - lango bible

Danieri 12

¹“I kare-nono Maikol bino, bino, ame en aloc adwoŋ ame loo rokwu. Kare me can bino bedo tye; can ame yam mom ru onen, cakere i kare ame rok luŋ cakere acaka tuno kede naka i kare-naca; i kare-naca obino laro rokwu; jo luŋ ame obino nwoŋo nyiŋgi ocoye i buk.

²Pol a jo ame oto ote yiko komgi piny i lobo bino ya malo, kun jo ocele ya te bedo i kwo ame perakino nakanaka, jo ocele bino ya i twon lewic adwoŋ kede acae ame perakino atwal.

³Jo ame ryek bino ryeny aryenya calo polo ame opette, kede jo ame loko jo apol doko jo a kitegi atira, bino meny amenya nakanaka calo acer.

⁴Doŋ yin Danieri, wun buk ame ocoo iye kop man oko, mwon doge oko, tuno ka kare me agikki doŋ oromo. Jo apol bino riŋo kun wirre tuŋŋi i tuŋŋi, dok daŋ bino medde.”

⁵An Danieri ate tiŋo waŋa neno jo aryo ame ocuŋ, kun acel ocuŋ i dog kulo tuŋŋi, acel ocuŋ i dog kulo tuŋ-ca.

⁶An ate kobbi dano ame onwoŋo oruko boŋo camanini, ame onwoŋo tye malo i wi pii i kulo, ni, “Man bino tero kare ame rom mene tuno ka gin me awura magi bino giko timere?”

⁷Dano ame onwoŋo oruko boŋo camanini ame onwoŋo tye malo i wi pii i kulo-nono, te tiŋo ciŋe ryoryo luŋ malo i polo, an ate winyo en ka tye ka kwoŋ, kun kwoŋo i nyiŋ ŋat ame bedo kwo nakanaka, ni mannono ginnono bino perakino pi mwakki adek kede nucu; dok ka kare me turo teko a jo acil doŋ otum, jami magi luŋ doŋ te cobe re luŋ.

⁸Awinyo gin ame en okobo cite mom aniaŋ iye, Mannono omio ate penyo ni, “Adwoŋŋa, agikki me jami magi luŋ bino bedo niŋo ba?”

⁹En te gamo ni, “Yin medde kede woti Danieri, pien koppere pwod owumo oko, omwono oko tuno ka kare me agikki oromo.

¹⁰Jo apol meicel bino lonyere, obino doko atar, kun olony odoco. Cite jo areco bino medde timo gin arac, kun ŋattoro i akina jo areco mom tye ame niaŋ iye, cite jo aryek bino niaŋ.

¹¹Don cakere i kare ame okwanyo iye mot awaŋa me nino i nino, eka ote keto iye ginnoro me kwer ame balo cuny jo, bino tero kare me nino tutumia acel kede mia aryo i pyeraboŋwen.

¹²Tye kede winyo ŋat ame kuro eka te tuno i nino tutumia acel, kede mia adek kede pyeradek wie abic.

¹³Aman yin giri medde kede wotti tuno ka nino me agikki oromo. Ibino nwoŋo weo, ibino cuŋ i kabedoni ame opokki kare me agikki.”