Read lango Danieri 2 Bible Online

Danieri 2 - lango bible

Danieri 2

¹I mwaka me aryo me loc abaka Nebukadnejar, abaka Nebukadnejar, oleko lek apapat; lekkono te miyo cunye jebere oko, nino daŋ te rwenyo oko i waŋe.

²Abaka te ciko ni myero lwoŋ otyet luŋ kede okor tipo karacel kede emuroko, dok myero lwoŋ daŋ jo Kaldaya me bi no gonyo lekkere. Gin te bino luŋ bino cuŋ i nyim abaka.

³Abaka te kobbigi ni, “Aleko lek ame aman omio cunya ojebere oko pi mito ni aniaŋ tere.”

⁴Jo Kaldaya te kobbi abaka ni, “Ama abaka, komi gire bed ayot nakanaka! Koŋ itittiwa wan omironi lekki-nono, wan obino gonnyi tere oko.”

⁵Abaka te gamo kop a jo Kaldaya ni, “Kop ame an akobo doŋ atyeko moko oko. Ka ce mom ibino miya wunu aŋeo lek ame alekonono, dok daŋ ite gonnya wunu tere, obino ŋiŋidowu atitino, udiwu daŋ ote rereto oko piny.

⁶Cite ka inyutta wunu lekkono ite daŋ gonnya wunu tere, ibino nwoŋo wunu mot kede bakacic i baŋa karacel kede kwogo adwoŋ meicel. Doŋ ba, myero inyutta wunu lek ame aleko dok daŋ igonnya wunu tere.”

⁷Gin dok te gamo kop abaka tyen me aryo ni, “Tittiwa lekk i-nono, wan obino gonnyi tere oko.”

⁸Abaka dok te gamo ni, “An aniaŋ ateni ni wun itye ka temo wunu medo kare ameda, pe iniaŋ wunu atira ni kop ame an akobo bedo kite ame akobo kede,

⁹Ka ce mom ibino miya wunu aŋeo lek ame aleko-nono, kop ame abino ŋolliwu tye ka acel keken aboŋo loko kadi acel. Wun onwoŋo iye wunu me bedo kobba wunu kop me goba keken kede koppogo ame medo ka bai keken ka kare olokere, Aman doŋ ba, myero ititta wunu lek ame aleko, mannono bino miyo aniaŋ ni itwero gonyo wunu lekkono.”

¹⁰Jo Kaldaya te kobbi abaka ni, “Mom tye dano moro kadi acel i wi lobo luŋ ame twero cobo gin ame abaka amito; pien mom ru onen kadi acel abaka moro i akina twoni obakki atek ame yam koŋ openyo otyet, okor tipo onyo jo Kaldaya i kodi pennyono.

¹¹Gin ame abaka openyo tek meicel ame mom tye dano moro ame twero nyutti abaka kono ka obaŋe ame mom bedo i akina dano.”

¹²Kop man omio akemo omako abaka, te doko ager meicel; omio te ciko ni myero nek oryeko luŋ me Babulon.

¹³Cik man doŋ ote cako rabo ni myero nek oryeko luŋ, ote bedo yenyo Danieri kede owote mere ni myero daŋ nekgi oko.

¹⁴Danieri te wot kop gin kede Ariok i ryeko meicel. Ariok onwoŋo obedo adwoŋ ame loo ocirikale ame gwoko abaka, ame onwoŋo owoto me wot neko oryeko me Babulon,

¹⁵En openyo Ariok ni, “Piŋo kara cik abaka gwa kit man?” Ariok te titti Danieri gin omio tye amannono.

¹⁶Danieri te wot i ot baŋ abaka, te kwayo ni abaka myero mie kare moro me wek egony lek abaka.

¹⁷Danieri te dok i paco mere, te wot miyo kop man neye baŋ owote mere Anania, Micael kede Ajaria,

¹⁸En te tittigi ni myero okwa Obaŋa me polo me tim kica yab imuŋŋono baŋgi me kur nekgi oko karacel oryeko luŋ me Babulon,

¹⁹Obaŋa te yabo imuŋ me lek abaka-nono oko baŋ Danieri dyewor i anyutta ame onyutte i waŋ lek. Danieri te cako pako Obaŋa me polo.

²⁰Danieri okobo kit man: “Nyin Obaŋa myero pak nakanaka, pien ryeko kede twer tye baŋe.

²¹En ame loko caa kede kare, en a keto abaka, dok en a daŋ kwanyo abaka, en a mio ryeko baŋ jo aryek, en a daŋ ame mio ŋec baŋ jo aniaŋ.

²²En nyuto gin opono odoco, dok nyuto imuŋŋoro ducu kannaler, en ŋeo ginnoro luŋ ame tye kannacol, lero bedo baŋe.

²³An gira apwoi dok apaki, yin Obaŋa akwariwa pien yin imia ryeko kede teko, dok aman imia aŋeo gin ame okwai iye, pien yin imiowa oŋeo kop abaka.”

²⁴Mannono doŋ te miyo Danieri wot baŋ Ariok, ame dano ame onwoŋo abaka omio twer me neko oryeko luŋ me Babulon; en owoto te wot kobbe ni, “Kur inek oryeko me Babulon: tera i ot baŋ abaka, an abino gonnyi abaka lekkere.”

²⁵Ariok te ru tero Danieri i nyim abaka, te kobbi abaka ni, “Atyeko nwoŋo dano i akina opii ame oya i Juda, ame romo gonyo lekk i.”

²⁶Abaka te penyo Danieri ame nyiŋe ocele Belcajar ni, “Yin itwero miya aŋeo lek ame aleko dok daŋ itwero gonnya lekkono?”

²⁷Danieri te gamo kop abaka ni, “Mom tye oryeko moro, okor tipo, otyet onyo jo ame ryek i neno acer ame romo nyutti abaka kop me muŋ ame abaka openyo,

²⁸cite Obaŋa moro tye i polo ame twero yabo imuŋ ducu, ame en doŋ otyeko miyo abaka Nebukadnejar oŋeo gin ame bino timere i kare me anyim. Doŋ lek ame ileko-nono kede anyut ame obino i wii i kare ame ibuto piny i wi tandani-nono ene:

²⁹I kare ame onwoŋo yin ibuto piny, ama abaka, tam apapat me gin ame bino timere i nyim te bino i wi, doŋ en ŋat ame yabo imuŋ kannaler te miyi ŋeyo gin ame bino timere.

³⁰Aco an onyutta muŋ man me agony tere baŋ abaka, me abaka ne tam ame tye i cunye, cite mom pi nyuto ni an aryek akato jo luŋ.

³¹“Nen ba, Abaka, yin ineno twon calloro adwoŋ meicel. Callono onwoŋo dwoŋ atek dok ryeny atek meicel ame nennere kelo lworo i kom dano, callono obino te bi no cuŋ i nyimi.

³²Callono otio wie i jabu ame olio acil, kore kede bade ote tiyo i jabu, eka amuru mere te bedo mola.

³³Tyene te bedo me nyonyo, eka par tyene te rubere aruba ryoryo kede lobo.

³⁴I kare ame onwoŋo i tye ka neno, gweŋŋoro te bare ŋide oko kun mom dano en ame oŋido, te rette i par tyen cal-ca tuŋ ame otio i nyonyo kede lobo, te ŋiŋido oko atitino.

³⁵Mannono te miyo nyonyo, lobo mola, ryal, kede jabu ŋiŋiida oko atitino, te doko calo cuŋ kai i laro i kare me oro; yamo te bi no kologi oko teŋe ame mom dok otwero yenyogi ote nwoŋogi. Cite gweŋ ame onwoŋo orette i kom callono te doko twon kidi moro adwoŋ meicel ame oromo wi lobo luŋ.

³⁶“Man en lek ame onwoŋo yin ileko. Aman doŋ myero agonnyi tere.

³⁷Adwoŋ abaka, yin en ame ibedo abaka adwoŋ ame loo obakki ocele luŋ. Obaŋa me polo otyeko keti me bedo aloc adwoŋ dok en omii teko, twer, kede kwogo.

³⁸En oketi me loyo jami luŋ ame bedo i lobo, me loyo dano, leyi kede winy. Yin ibedo wic ame otio i jabu.

³⁹Icennere i ne locci, loccoro a mom rom i megi bino lubo megi ame abaka mere bino loyo lobo ducu, i ne mannono, loc me adekkere dok te cakere ame obedo me mola, ame bino loyo lobo ducu.

⁴⁰Loc me aŋwennere dok bino cakere ame tek calo nyonyo, pien nyonyo tek meicel ame romo turo jami ducu, dok ŋiŋiido oko atitino; loccono bino jwero loc ocele luŋ ame ogeo bedo tye kite ame nyonyo tuturo kede jami.

⁴¹Doŋ kite acalo ineno kede par tyen cal-ca orubere aruba, nyonyo kede lobo, mannono cimo ni loccono bino pokere yie aryo. Cite teko mogo ame mio cuŋ atek acalo nyonyo bino bedo tye iye.

⁴²Dok kite acalo lwet tyen caka onwoŋo tuŋcel nyonyo tuŋcel lobo, mannono cimo ni loccono bino bedo atek i kabedo mogo eka i kabedo ocele te bedo agoro meicel ame romo tur oko i kare moro keken.

⁴³Kite acalo ineno kede, nyonyo orubere kede lobo ame obedo coto, jo i loccono bino rubere kun onyomere i akinagi kengi kengi, cite bedo karacel bino loyogi oko kite ame nyonyo mom twero notte karacel i coto.

⁴⁴Dok i kare obakki-nono, Obaŋa me polo bi no keto loc ocele ame mom twero tur dok loccere daŋ mom obino weko i ciŋ ŋattoro ocele, Loc anyennono bino turo loc ocele mege kun ŋiŋiido atitino, eka te miyo locgi gik oko, en doŋ te cuŋ atwal,

⁴⁵kite ame onwoŋo ineno ni gweŋŋoro omukere i kom kidi kun mom dano moro en omuko, eka te rette i kom nyonyo ŋiŋiido oko atitino, karacel kede mola, lobo, ryal kede jabu-gu. Twon Obaŋa moro adwoŋ meicel oyabbi abaka gin ame bino timere i kare a tye i nyim. Lek ame ileko tye ateni dok te koppere daŋ tye atira.”

⁴⁶Abaka Nebukadnejar te ru ya ryebere piny woro Danieri, te dok ciko ni myero kel mot me yale, kede odok a ŋwece kur.

⁴⁷Abaka te kobbi Danieri ni, “Ateteni, Obaŋani obedo Obaŋa ame loo obaŋe ocele luŋ, dok Rwot ame loo obakki luŋ, en ayab muŋ ducu kannaler, pien en omio yin inyuto imuŋ man.”

⁴⁸Abaka te miyo Danieri woro mogo amalo meicel kede twoni mottogo adoŋo doŋo, te miyo en bedo aloc ame loo lobo me Babulon luŋ, kede adwoŋ ame loo oryeko luŋ me Babulon.

⁴⁹Danieri te kwayo abaka, omio en te keto Cadrak, Micaki, kede Abednego, me bedo odoŋe ame loo lwak, kun oneno ginnoro luŋ ame otimere i lobo me Babulon. Cite Danieri te medde bedo i paco abaka.