Read lango Danieri 3 Bible Online

Danieri 3 - lango bible

Danieri 3

¹Abaka Nebukadnajer otio cal obaŋa moro me jabu, ame borrere onwoŋo tye futi pyeraboŋwen kede laccere futi aboŋwen. En te cibo callono cuŋ i bar me Dura, i lobo Babulon,

²Abaka te cwayo kop me lwoŋo odoŋe apapat, odoŋe ame loo lwak, odoŋe ame loo lobo apapat, omi-tam, ogwok lim, oŋolkop, adoŋo kede atino, kede jo adoŋo mogo me dul lobo apapat, me gin bin kwer ecuban me tiyo cal obaŋa abaka Nebukadnejar ame en omio otio-nono.

³Eka oloc adoŋo, odoŋe ame loo lwak, oloc me dul lono apapat, omi-tam, ogwok lim, oŋolkop, adoŋo kede atino, kede odoŋe ocele luŋ me dul lobo apapat te cokere karacel me bino kwero ecuban me cal obaŋa ame abaka Nebukadnejar otio te cibo cuŋ i bar me Dura. Gin luŋ ote bino cuŋ i nyim cal obaŋa ame abaka otio-nono.

⁴Gin te cako rabo koppere kun oredo i dwon aloŋo ni, “Wun rok apapat luŋ, lwak ame kobo leb apapat,

⁵ocikowu ni ka iwinyo wunu okuto bilo kede nyamulere, kun daŋ ogoo naŋa opuk, kede en ocele mege ame owero kede, wun myero iryebre wunu piny iwor wunu cal obaŋa ame otio i jabu ame abaka Nebukadnejar otyeko cibo cuŋ-ni;

⁶ŋat a mom bino ryebere piny me woro cal obaŋa, obino ru bolo oko i mac alyel ager meicel.”

⁷Mannono omio i kare ame jo owinyo bilo kede nyamulere okok, kun ogoo naŋa opuk kede kit tum ocele me wer, jo luŋ me rok apapat kede atekere apapat, ame kobo leb apapat, oryebere piny luŋ te woro cal obaŋa ame otio i jabu ame abaka Nebukadnejar ocibo ocuŋ i bar me Dura.

⁸I kare-nono jo Kaldaya mogo ame onwoŋo tye kede tam arac i kom Ojudaya te bino doto Ojudaya mogo.

⁹Gin okobo baŋ Nebukadnejar ni, “Ama abaka, komi gire myero bed ayot nakanaka!

¹⁰Yin abaka onwoŋo imio cik ni ŋat acel acel ame owinyo bilo kede nyamulere okok, kun daŋ otye ka goyo naŋa opuk kede kit tum ducu me wer, myero ryebere piny wor cal obaŋa ame otio i jabu;

¹¹kun daŋ imedo ni ŋat a mom bino ryebere piny me woro cal obaŋa-nono obino bolo oko i twon mac ame alyel ager meicel.

¹²Doŋ ba adwoŋ, tye Ojudaya mogo ame yin iketo me loyo ginnoro luŋ ame timere i lobo me Babulon; Cadrak, Micaki kede Abednego. Adwoŋ, jo man mom gire winyo koppi kadi acel; gin mom otimo ginnoro pi obaŋani apapat eme iworo kadi acel; woro cal obaŋani me jabu ame yin icibo i bar me Dura.”

¹³Akemo te mako Nebukadnejar atek meicel, te ciko i gero ni myero kel Cadrak, Micak i, kede Abednego i nyime. Ote daŋ kelo jo man i nyim abaka.

¹⁴Nebukadnejar te kobbigi ni, “Man kop ateni ni wun mom it ye ka tic wunu pi obaŋe ame an aworo, dok daŋ ikwero wunu woro cal obaŋa ama acibo ocuŋ i Dura?

¹⁵Aman doŋ ka ityeko yikere wunu, me iryebere wunu piny woro wunu cal obaŋana ame atio, doŋ ber, ka iwinyo wunu okuto bilo kede nyamulere, kun daŋ agoyo naŋa opuk kede kit tum ducu me wer, cite ka mom iworo wunu, obino ru bolowu oko i twon mac a lyel ager. Kur itam wunu ni tye obaŋa moro ame dok romo larowu i ciŋa.”

¹⁶Cadrak, Micaki kede Abednego te gamo kop abaka ni, “Adwoŋ Nebukadnejar, wan mom oyikere me kobbi ginnoro ame dok i kop man,

¹⁷Ka ce tye amannono, Obaŋa ame wan oworo bi no larowa i twon mac a lyel ager, dok en bino larowa i ciŋi, yin abaka.

¹⁸Cite ka mom amannono, myero omi iŋe ni wan giwa mom obino woro obaŋeni akadi cal obaŋa me jabu ame yin icibo ocuŋ i Dura.”

¹⁹Akemo te miyo Nebukadnejar doko doŋ ager meicel, ame waŋe doŋ onen arac okato kare i kom Cadrak, Micaki, kede Abednego. En te ciko ni myero mok mac kur atek ame kato me nino ducu tyen abiro twal.

²⁰En te ciko twoni jo mogo ame komgi tek meicel me monnyere me tweyo Cadrak, Micaki kede Abednego ote bologi i twon mac a lyel ager.

²¹Rik ote tweyo jo man oko, kun otye i rukgi luŋ i komgi, cati, kanyi, tok kede boŋŋi ocele mege ducu, ote bologi i twon mac alyel ager.

²²Pien cik abaka onwoŋo olido odoco, dok mac daŋ onwoŋo lyet atek, omio leb mac alyel obukkoro, kom jo otero Cadrak, Micaki kede Abednego,

²³Jo-ni adek-ki Cadrak, Micaki kede Abednego, obologi i cuny mac ame alyel ager meicel.

²⁴Abaka Nebukadnejar icennere te wuro atek meicel, omio te ru ya oko malo, Eka te penyo jo ame mie tam ni, “Mom onwoŋo obolo jo adek ca i mac ame otweogi oko?” Gin te gamo peny abaka ni, “Mannono kakare, adwoŋ.”

²⁵Abaka te gamo ni, “An atye ka neno jo aŋwen ame mom otweo tye ka lat i dye mac, kun daŋ mom owane kadi acel; dano me aŋwennere tye ka nen acalo wot obaŋa moro.”

²⁶Nebukadnejar te wot i doggola me kan a mac tye iye, te lwoŋo ni, “Cadrak, Micak i, kede Abednego, omiro Obaŋa Amalo Meicel, kato wunu”, me ibin wunu kan.

²⁷Eka oloc adoŋo mege, odoŋe ame loo lwak kede oloc me dul lobo apapat karacel kede jo ame mio abaka tam te cokere karacel, gin te neno ni mac gire mom owaŋo jo-nono; naka yer wigi mac mom oreo moro kadi acel, ruk i komgi daŋ mac mom ogudo, dok ŋwec mac daŋ mom ŋweye i komgi.

²⁸Mannono omio Nebukadnejar okobo ni, “Myero pwo Obaŋa a Cadrak, Micaki kede Abednego ame ocwao omalaika mere te laro omiro mere ame gene, ame te miyo cik abaka to nono, omio gin ojalo komgi i to akaka woro obaŋa moro ocele a mom Obaŋagi.”

²⁹Man omio an aketo cik aman ni, “Rokkoro, atekere onyo ŋattoro keken ame kobo kop arac i kom Obaŋa a Cadrak, Micaki kede Abednego, obino ŋiŋiido atitino, udigi daŋ obino rereto oko piny, pien mom gire tye obaŋa moro ocele ame twero laro dano i yore acalo man.”

³⁰Abaka te medo rwom a Cadrak. Micaki, kede me Abednego i lobo me Babulon.