Read lango Danieri 4 Bible Online

Danieri 4 - lango bible

Danieri 4

¹An Abaka Nebukadnejar, acoo waraga man baŋwu, wun lwak me rok ducu, atekere apapat ame kobo leb apapat i wi lobo, kuc myero medde ameda baŋwu!

²Obedo ber an me nyuto baŋwu anyuttogo kede tano mogo ame Obaŋa Amalo Meicel otyeko timo i koma.

³Anyuttoro luŋ ame en nyuto doŋodoŋo nadi, taŋo ame en tio, teko mere dwoŋŋadi! Loccere obedo loc ame perakino waŋ i waŋ, loccere tye pi lwagi jo me kare luŋ.

⁴An abaka Nebukadnejar onwoŋo at ye abedo mot i oda, kun lim daŋ tye ka bino i ciŋa i pacona.

⁵Ate leko lek ame te miya lworo meicel; dok anyuttogo obino i wia ame te miyo wia balle oko.

⁶Omio aciko ni myero kel oryeko luŋ me Babulon i nyima me gin gonnya lek ame aleko-nono.

⁷Mannono te miyo otyet, okor tipo, kede jo Kaldaya kede jo ame tye i ŋec i kom neno acer te bino baŋa; an ate tittigi lek ame alekonono cite gonyo tere te loyogi oko,

⁸Icennere Danieri te bi no cuŋ i nyima, en dano ame nyiŋe ocele olwono ni Belcajar, ame nyiŋe nono rom aroma i nyiŋ obaŋana; en obedo dano ame cuny Obaŋa Acil tye i cunye. An ate titte lekka-nono kun akobo ni,

⁹Ama adwoŋ Belcajar, adwoŋ ame loo otyet luŋ, pien doŋ atyeko ŋeyo ni cuny Obaŋa Acil bedo iyi dok daŋ ni mom tye i muŋŋoro ame tekki, doŋ lek ame aleko ene, tim ber igonya tere.

¹⁰Anyuttogo ame obino i wia i kare ame abuto piny ene: Nen ba, aneno yattoro ame tye i dye lobo; yattono bor atek meicel.

¹¹Yattono odoŋo te doko atek meicel, wie te tuno naka i polo twal, dok onwoŋo nen naka i agikki piny i kabedo ducu,

¹²Pote luŋ onwoŋo nen amwonya meicel dok nyige onwoŋo onyak apol meicel, onwoŋo obedo yat ame ginnoro luŋ akwo camo. Leyi me tim we i te tipo mere, dok winy ame twarre malo bedo i jaŋe luŋ, dok ginnoro luŋ akwo nwoŋo camgi iye.

¹³“Nen ba, i kare ame abuto i wi tandana anyuttoro obino i wia, aneno akur co pinnyoro ame obedo ŋat acil, kun bino piny ame oya i polo.

¹⁴Akurpinnyoro oredo i dwon aloŋo kun kobo ni. Toŋ yattono iret piny ite lwero jaŋe oko luŋ, me leyi ŋwec oko i tere kede winy daŋ twarre oko i jaŋe.

¹⁵Cite myero iwek ajuttere kede lwite ame odoŋ i lobo doŋ, eka ite tweyo oko abati abati me nyonyo kede me mola, me bed i dye lum alyabu i tim. Mi toyo ame ya i polo dyak i kome, dok wek obedo i akina leyi ame bedo i lum i lobo.

¹⁶Mi tammere lokere oko i tam a dano, me tam a lee en ame luny miye; en bed kittono pi mwakki abiro.

¹⁷Okur-piny en omoko cik man, kun olubo gin ame jo acil omoko, me wek i agikki mere gin ame tye kede kwo luŋ ŋe ni ŋat Amalo Meicel en ame loo loc a dano, dok tye kede twer me miyo baŋ ŋat ame yie omito, kun keto kadi ŋat ame rwommere piny rom mene me loyo lwak.

¹⁸Lek man en lek ame an abaka Nebukadnejar aneno. Doŋ ba, yin adwoŋ Belcajar, myero itucca lekkono, pien oryeko luŋ ame tye i te locca mom romo gonyo lekkono, cite yin gire itwero gonyo, pien cuny Obaŋa Acil tye iyii.”

¹⁹Danieri ame nyiŋe ocele Belcajar te koŋ dok bedo kede podo meicel i cuny pi kare moro anonok, tipo kome te ya meicel pi tam ame en obedo tamo. Abaka te kobbe ni, “Belcajar, kur imi lek man onyo gonyo tere po tipo komi.” Belcajar te gamo ni, “Adwoŋ, myero lekki-nono obed pi jo ame dagi, te koppere obed pi okworri!

²⁰Yat ame onwoŋo ineno ame odotjo odoko atek kun wie ogudo polo, dok onwoŋo nen iyi agikki piny i kabedo ducu;

²¹pote luŋ onwoŋo nen amwonya dok nyige onyak apol meicel, dok onwoŋo obedo yat ame ginnoro akwo luŋ camo; leyi me tim onwoŋo we i tipo mere.

²²Yin en idoŋo idoko atekkono adwoŋ, abaka. Dwoŋŋi doŋ odoŋo otuno naka i polo, locci daŋ doŋ onya otuno naka i agikki piny.

²³Abaka oneno akur-piny ame obedo ŋat acil kun bi no ame oya i polo ame aredo ni, ‘Toŋ yattono iret oko piny ite daŋ lwelwero oko, cite myero iwek ajuttere kede lwite doŋ piny i lobo, kun itweo oko abati abati me nyonyo kede me mola, me wek bed i dye lum alyabu i tim, Dok myero iwek toyo ame ya i polo dyak kome, kun en bedo i akina leyi ame bedo i tim, en myero bed kittono pi mwakki abiro.’

²⁴“Adwoŋ lek ame ileko-nono tye kit man: Mannono obedo cik a ŋat Amalo Meicel ame obino i kom adwoŋŋa, abaka,

²⁵ni yin obino ryemi oko i akina dano, ibino bedo karacel kede leyi i tim; ibino camo lum calo twon, dok toyo ame ton i polo bino dyako komi, ibino ri kuno mwakki abiro, tuno ka iŋeo ni Ŋat Amalo Meicel en ame loo loc a dano, dok en tye kede twer me miyo loc i ciŋ ŋat ame yie omito.

²⁶Doŋ kite acalo onwoŋo ociko ni myero wek ajut yat kede lwite, locci gire bino kuri ote dwoko i ciŋi cakere i kare ame yin doŋ iŋeo ni loc kara ya i polo.

²⁷Doŋ ba adwoŋŋa, abaka, myero iye tam ame ami-ni; ŋut oko i kom bal ame ibedo timo, ite cako bedo i kwo me kite atira, kun iweko timo bal, dok daŋ kica myero maki i kom jo ame owuno, atot ya kare me locci medde, kun itye kede kuc kede weo ame oromo.”

²⁸Kop magi luŋ otimere i kom abaka Nebukadnejar.

²⁹Iyi agikki me dwe me apar wie aryo, i kare ame en onwoŋo tye ka lat i wi ot me paco mere i Babulon,

³⁰en abaka te kobo ni, “Koŋ inen ba kite ame boma me Babulon dwoŋ kede! Mom man an agero me bed boma me cimo kwogona, tekona kede twer ame an at ye kede?”

³¹Ame abaka onwoŋo pwod tye akobo kop man, dwonnoro te katto i poto, ame kobo ni, “Abaka Nebukadnejar we, kop man otye akobbi ni locci doŋ okwanyo oko i ciŋi,

³²obino ryemi oko i akina dano, ibino cako nywako kabedo kede leyi me tim yin ibino camo lum calo twon, mannono bino timere i komi pi mwakki abiro, tuno ka doŋ ityeko ŋeyo ni Ŋat Amalo Meicel loo loc a dano, dok en twero miyo loc baŋ ŋat ame emito.”

³³Oyot koppono te ru cobere oko i kom abaka Nebukadnejar. Rik ote ryeme oko i akina dano, te cako camo lum calo twon, toyo aya i polo te dyako kome oko, te miyo yer wie lot aboco calo yer kom cur, kun lwete doŋ calo lwet winy.

³⁴I kare ame kare-nono doŋ otum, an Nebukadnejar, atino waŋa malo i polo, tipo koma doŋ te cako dwogo i koma, ate cako pwoyo Ŋat Amalo Meicel, kun apake dok amie kwogo, en ŋat ame bedo kwo nakanaka; pien loccere obedo loc ame perakino i waŋ, loccere tye pi lwagi jo me kare luŋ.

³⁵Jo luŋ ame bedo i lobo mom gire ginnoro kadi acel; en timo gin ame cunye mito i kom lwak mony a tye i polo, karacel kede i akina jo ame bedo i lobo; mom tye ŋattoro ame twero mako ciŋe, onyo ame twero penye ni, “Itimo kara ŋo?”

³⁶I kare ame tipo koma odwogo iye i koma-nono ikokome, kwogo me locca kede woro, kede twerra ote daŋ dwogo oko baŋa. Jo ame mia tam kede jo ame owoto oyenya, ote dwoka dok i locca, rik dok ote medda twon dit ocele ame rik mom at ye kede con.

³⁷Aman doŋ an Nebukadnejar, apako, adworo dok aketo kwogo i kom abaka me polo; pien ticcoro luŋ ame en tio tye atira dok yo mere tye atira. Jo ame wakere, en kwanyogi oko i ditogi te dwokogi piny.