Read lango Danieri 5 Bible Online

Danieri 5 - lango bible

Danieri 5

¹I kare ame Belcajar, abaka, otedo twon arama moro adwoŋ meicel pi jo adoŋo ame oworo ame welgi romo tutumia acel, en omato koŋo olok i nyimgi.

²I kare ame Belcajar obilo koŋo olok, en ociko ni myero kel ikopo luŋ ame otio i jabu kede ryal ame pappere Nebukadnejar rik okwanyo i ot Obaŋa i Jerucalem, me wek en abaka, jo adoŋo me awora, monne, mon aŋeca mat i koŋo.

³Eka ote ke lo i kopo luŋ ame otio i jabu kede ryal ame rik onwoŋo okwanyo i ot Obaŋa i Jerucalem; eka abaka, wele me awora, monne kede mon aŋeca te mato i koŋo.

⁴Gin omato kono olok ote cako pako obaije ame otio i jabu, ryal, mola, nyonyo, yen kede me kiddi.

⁵Oyotoyot anyira ciŋ dano moro te nen, te cako coc i kor apa ma ame tye i paco abaka, ame otikere i gi-cibo tara; abaka oneno ciŋ dano-nono i kare ame tye ka coc i kor apama.

⁶I caa-nono waŋ abaka te lokere oko, tam te miyo tipo kome ya, lworo omake te miyo coŋe cako myemyela atata.

⁷Abaka te woto koko i dwon aloŋo ni myero ru lwoŋo okor tipo, jo Kaldaya, kede oryeko i neno acer, me obin oniaŋe gin omio can opoto i kome. Abaka te kobbi oryeko me Babulon ni, “Ŋat ame bino kwano coc man eka te gonyo tere, obino miyo ruko boŋo obedo amaramar, kun daŋ ruko nyor me jabu i ŋute, en te bedo aloc me adek i loccani.”

⁸Oryeko abaka luŋ te bino cite kwano coc kede gonyo tere te loyogi oko.

⁹Cuny abaka Belcajar te poto meicel, kome daŋ te cako balle oko, jo adoŋo ame oworo te wuro meicel.

¹⁰Kare ame agoŋ abaka owinyo kop abaka kede jo mere adoŋo ame oworo, en odonyo i ot kan ame otye acamo iye arama; en te kobo ni, “Kom abaka gire myero bed ayot nakanaka, Kur imi tam bed yelo wi i, kun wani balle k ittono.

¹¹Pien i te loccini tye iye dano ame cuny obaŋe acil meicel bedo i yie. I kare ame pappi rik tye i loc, en rik onen oko kannaler acalo dano aryek ame niaŋ kede ryeko tye baŋe, kun ryeko mere rom aroma i ryeko ame obaŋe bedo kede. Abaka Nebukadnejar, ame obedo pappi rik omio en obedo adwoŋ ame loo otyet, ok or tipo, jo Kaldaya karacel kede oryeko ame ŋeo neno acer,

¹²pien en rik oneno ni en obedo dano ame tye kede cuny amala meicel, ŋec kede niaŋ atut me gonyo lek, tuco pennyogo me ryeko kede tyeko peko apapat, ame en dano-nono nyiŋe Danieri ame abaka rik ocake nyiŋe ocele ni Belcajar. Aman myero lwoŋ Danieri me en gonnyi.”

¹³Rik ote daŋ ru kelo Danieri inyim abaka, abaka te kobbi Danieri ni, “Yin ibedo Danieri ame okobo-ni, ŋat acel i akina opii ame rik pappa okelo i Juda?

¹⁴An atyeko winyo kop i komi ni cuny Obaŋa acil tye iyii, dok ni lero kede ŋec atut kede ryeko amalo meicel, yin itye kede,

¹⁵Aman onwoŋo okelo oryeko, kede okor tipo, baŋa kan ni obin okwan coc ame tye i kor-apama ca ote gonnya tere, cite gonyo gire oloogi oko,

¹⁶Cite an atyeko winyo ni yin itwero gonyo lek kede tyeko kit peko apapat. Doŋ aman ba, ka ce itwero kwano coc-cu ite gonnya tere, obino miyi iruko boŋo obedo amaramar, ite ruko nyor me jabu i ŋuti, yin ite ruko nyor me jabu, yin ite bedo aloc me adek i te locca-ni.”

¹⁷Danieri te gamo kop abaka ni, “Gwok giri motti piri dok gin ame onwoŋo imito miya pi ticca myero imi baŋ ŋat ocele, kadi mom agamo ginnoro ame imia, an gira abino kwano coc-cu dok abino gonyo tere.

¹⁸Adwoŋ abaka, Obaŋa Amalo Meicel omio pappi Nebukadnejar obedo abaka ame loo lobo, omie daŋ dit kede kwogo kede twer ducu.

¹⁹Pi dit ame rik Obaŋa omie, omio rok luŋ ame kobo leb apapat ducu komgi omyel i nyime, kun owore meicel. Rik ka cunye omito ni enek ŋattoro, en neko; ka omito ni ewek dano moro bed kwo, daŋ weko kite ame cunye omito; ka omito ni emi dit baŋ ŋattoro daŋ mio, ka omito ni ekwany dano oko i dittere, daŋ timo kittono.

²⁰Cite i kare ame en ocako yeyea calo ogwalogwal i cunye, cunye te doko anwaŋ oko, en te cako wakere oko, omio ote ryeme oko i wi kommere me loc, kwogo mere daŋ ote kwanyo oko,

²¹Rik ote ryeme oko i akina dano, ote miye bedo i cuny a lee bedo kede, en te cako bedo karacel kede kane me tim; en te bedo camo lum calo twon kun toyo ame ton i polo dyako kome, tuno ka en oniaŋni Obaŋa Amalo Meicel loo loc a dano, dok keto ŋat ame yie mito me loyo,

²²Doŋ yin wode, Belcajar, mom imwolle i cunyi i nyime, kadi bed yin iŋeo magi luŋ,

²³Ento yin icako yiye me lweny i kom Rwot me polo; dok ame otio kede i ode okelo i nyimi, eka yin kede jo adoŋo me awora, monni, kede aŋecani ite mato wunu koŋo olok; dok daŋ ipako wunu cal obaŋe ame otio i ryal, jabu, mola, nyonyo, yat kede kidi ame mom neno, mom winyo kop, mom ŋeo ginnoro, ento mom iworo Obaŋa, ŋat ame weoni tye i ciŋe, dok ame gwoki i yore ducu.

²⁴“Mannono en omio Obaŋa ocwao ciŋ dano me coyo coc man,

²⁵Doŋ coc ame ocoo-nono ene: MENE, MENE, TEKEL MENE, kede PARSIN,

²⁶Te koppere Obaŋa otyeko moko kare ame locci bino ri kede oko dok onyuto ni agikki mere doŋ ceggi;

²⁷Tekel, te koppere ni yin doŋ otyeko pimi oko i mijan, onwoŋo ni iyot meicel;

²⁸Peres, te koppere ni, locci doŋ otyeko poko oko omio baŋ jo Medi kede baŋ jo Pacia.”

²⁹Oyot Belcajar te miyo twer, ote ruko Danieri boŋo obedo amaramar, kede nyor me jabu i ŋute, eka ote rabo kop i ko me romo lobo luŋ ni en doŋ obedo aloc adwoŋ me adek i te loc me Babulon.

³⁰I dyeworrono ikokome, ote neko abaka Belcajar oko,

³¹Dario dano me Medi te leyo loc, kun mwaka ame dittere romo pyerabicel wie aryo.