Read lango Danieri 6 Bible Online

Danieri 6 - lango bible

Danieri 6

¹Dario oneno ni twero bedo ber ka ce eketo oloc adoŋo ame romo mia acel kede pyeraryo oromo lobo ame en eloo luŋ;

²kede dok oloc ocele adek ame loogi ame gin twero miyo ripot me ticgi i nyimgi, kun Danieri tye i akina jo adekkono, me lim abaka kur rweny kannoro.

³Danieri te medde bedo dano ame neye meicel i akina owote mere luŋ kede i akina oloc ame gin oloo man otimere pi kit cuny ame rik en tye kede, omio Dario te yik o ni myero ekete obedo dano ame loo lobo ame en eloo luŋ.

⁴Mannono te miyo oloc adoŋo luŋ kede rwode te bedo yenyo yo ame myero nwoŋ kede bal i kome ame mako loc; cite yo moro me tero kokogi i kome, akadi nwoŋo balloro i kome te loyogi oko, pien en rik onwoŋo obedo dano ame genne meicel ame mom i roccoro onyo balloro,

⁵Jo-nono te doŋ kobo ni, “Mom obino nwoŋo yo moro me tero kokowa i kom Danieri kadi acel, tuno ka obeo i kom gin ame mako cik Obaŋa mere.”

⁶Oloc adoŋo kede en ame lubogi te cako wot luŋ baŋ abaka Dario, ote wot kobbe ni, “Kom abaka. Dario gire bed ayot nakanaka!

⁷Oloc luŋ ame tye i te locci, kede odoŋe ame loo lwak, rwode, omi-tam kede oloc ame loo dul lobo apapat; gin luŋ oye aboŋo ŋattoro ame oloko kop i akinagi ni abaka myero mok cik dok mi twer a mom oromo loko, ni ka ce obino nwoŋo ŋattoro ame tye ka woro obaŋa moro ocele onyo dano moro ocele ame mom abaka pi nino pyeradek, kodi dano-nono obino bolo oko i akina eŋatu.

⁸Doŋ ba adwoŋ, yin myero doŋ imok cikkono, imi coo me iket iye ciŋi me bed cik ame mom dok oromo loko, kun lubo cik a jo Medi kede me a jo Pacia, ame mom dok otwero loko.”

⁹Mannono te miyo abaka Dario keto ciŋe me moko cikkono.

¹⁰I kare ame Danieri oŋeo ni cikkono doŋ otyeko keto ciŋ iye oko, en odok i paco mere te wot donyo iyi icika mere ame tye malo, te weko wan dirica luŋ ame tye tutuŋ Jerucalem bedo twolo; en te rumo coŋe piny kun kwao Obaŋa mere, en rik te bedo timo amannono tyen adek nino acel acel, kun pwoo Obaŋa mere, kite ame en onwoŋo timo kede kare ducu.

¹¹Jo-nu te bino kite ame onwoŋo gin oyiko kede, ote nwoŋo Danieri tye ka kwayo Obaŋa mere kun bako doge i nyime.

¹²Gin luŋ ote wot doto Danieri baŋ abaka kun okobo ni, “Adwoŋ abaka! Mom rik iketo cik ame kwero woro obaŋa moro ocele kede dano moro ocele kun nino pyeradek mom ru okato, dok ni jo luŋ myero wori yin keken? Mom rik iciko ni ŋat oturo cikkono myero bol oko i akina eŋatu?” Abaka te gamo ni, “Cikkono pwod gire tye kittono kite ame cik a jo Medi kede jo Pacia tye kede, ame mom otwero loko,”

¹³Gin luŋ ote gamo kop abaka ni, “Adwoŋ, Danieri moro ca, ame obedo dano acel i akina opii ame okelo i Juda, en mom winyi kadi acel adwoŋ, mom daŋ winyo cik ame iketo, cite en tye ka kwayo Obaŋa mere nino i nino tyen adek twal.”

¹⁴Kare ame abaka owinyo kop man, cunye ocwer atek meicel, kun tye ka tamo yo me laro kwo a Danieri; te bedo yelle ceŋ iyul, kun tye ka yenyo yo me laro kwo mere.

¹⁵Jo-ni luŋ te bino baŋ abaka, kun onwoŋo ocikere acika, ote kobbi abaka ni, “Adwoŋ abaka, ŋe ni man obedo cik a jo Medi kede me a jo Pacia, ame cik ame abaka otyeko moko mom dok otwero loko kadi acel.”

¹⁶Abaka te doŋ miyo twer, ote kelo Danieri wot bolo i akina eŋatu. Abaka te kobbi Danieri ni, “Obaŋa ame yin iworo myero omedde konyi.”

¹⁷Rik ote kelo gweŋ ote bedo cego kede dog gorogoro ame eŋatu bedo iye oko, abaka te bino mwono oko kun dio atem me ciŋe iye kede me ciŋ jo mere adoŋo me awora, me kur lok ginnoro i kom kop a Danieri.

¹⁸Abaka te wot oko i ode, dyewor luŋ en te bedo kanyo kec, kun mom okelo ginnoro i nyime, ni no daŋ te rwenyo oko i waŋe.

¹⁹Odiko ame piny doŋ oyabere oko, abaka oya te wot oyotoyot i dog gorogoro eŋatu,

²⁰I kare ame en doŋ ceggi i dog gorogoro kan ame Danieri onwoŋo tye iye, en oredo kun kok i dwon me cwercuny, te penyo Danieri ni, “Ama Danieri amiro Obaŋa Akwo, Obaŋani ame iworo kare luŋ-ŋi, okonyi, omio eŋetu mom otimo ginnoro i komi?”

²¹Danieri te gamo kop abaka ni, “Adwoŋŋa, komi gire myero bed ayot nakanaka!

²²Obaŋana ocwao omalai ka te miyo dog eŋatu oko, omio mom otima ginnoro pien balla moro onwoŋo mom tye kadi acel i nyime, akadi i nyimi yin abaka, mom gire atimo ginnoro arac.”

²³Abaka te lelo atek meicel, te ciko ni myero ru kwanyo Danieri oko i akina eŋatu. Mannono te miyo kwanyo Danieri oko i akina eŋatu, kun awano moro mom tye i kome kadi acel, pien en onwoŋo ogeno Obaŋa mere.

²⁴Abaka te miyo cik, ote kelo jo ame onwoŋo odoto Danieri luŋ bolo oko i gorogoro i akina eŋatu, okelogi karacel itinogi, kede mongi. I kare ame obologi eŋatu odarogi adara, te tuturo cogo komgi oko, ŋiŋido atitino.

²⁵Abaka Dario te coyo waraga baŋ rok luŋ ame kobo leb apapat ame bedo i wi lobo, kun kobo ni, “Kuc omedde nya i akinawu.

²⁶Atyeko keto cik i lobo luŋ ame an aloo, ŋat acel acel ame tye iye myero bed kede lworo dok daŋ owor Obaŋa a Danieri, pien en obedo Obaŋa ame kwo, dok perakino nakanaka, loccere mom oromo turo, dok loccere bino romo kabedo luŋ naka iyi agikki piny.

²⁷En laro dano dok konyo dano daŋ, tio anyut kede gigi mogo me awura, i polo kede i lobo, en Obaŋa-nono ne olaro Danieri, i teko a lwak eŋatu.”

²⁸Mannono te miyo Danieri bedo aber meicel i kare me loc a Dario kede kare me loc abaka Kuro me Pacia.